醉瓊樓 (香港)
(由醉瓊樓飯店跳轉過嚟)
醉瓊樓 （Chui King Lau）係香港一個客家菜酒樓品牌，1956年開始出現，曾經喺香港有多間同名酒樓，但東主未必相關，出名菜式包括鹽焗雞同梅菜扣肉。
第一間醉瓊樓係由泉章居其中一個創辦人陳日章喺1956年4月開喺香港島銅鑼灣怡和街近樂聲戲院側跟，1958年再喺九龍佐敦西貢街開分店。不過由於「醉瓊樓」呢個名未有註冊，所以之後有舊伙計甚至同原班人馬無關嘅人都用呢個名經營。
現存經營最耐嘅醉瓊樓就係1958年開業嘅佐敦「醉瓊樓飯店」。而香港島最後一間醉瓊樓就係灣仔「醉瓊樓酒家」，喺灣仔軒尼詩道289號地下B號舖，喺1962年開張，原本宣佈咗會喺2025年10月執笠[1]，不過之後同業主傾好後，收返執笠決定。
除咗灣仔醉瓊樓酒家，用醉瓊樓呢個名嘅食肆有幾間，包括佐敦嘅「醉瓊樓飯店」、油塘嘅「醉瓊樓飯店」，同埋長沙灣嘅「醉瓊樓小廚茶餐廳」。