針對香港泛民主派嘅流料

出自維基百科,自由嘅百科全書
跳去導覽 跳去搵嘢

香港泛民主派周不時會成為流料嘅攻擊對象,有啲流料來源甚至涉及一啲香港政府官員或者親中陣營嘅立法會議員。亦有一啲親中陣營嘅人,就算喺啲流料被釐清否定之後,仍然繼續攞嚟攻擊泛民主派。有香港嘅傳媒人同海外嘅研究都指出,呢啲針對泛民主派人士同行動嘅流料謠言,好有可能係背後有人操控。

事例[編輯]

陳方安生獲十成按揭謠言[編輯]

內文:陳方安生獲十成按揭謠言

2007年8月8號,民建聯港島區立法會議員馬力死咗,佢嘅議席空缺,需要進行補選。陳方安生喺勝出泛民主派初選後出戰呢次選舉。因為陳太出選,謠言再度被廣泛流傳,被一啲親中陣營政治人同媒體用來喺選舉論壇等場合質疑佢[1]

2011年公民黨支持外傭居港權謠言[編輯]

內文:公民黨支持外傭居港權謠言

喺2011年,有唔同媒體報導,話公民黨透過法律訴訟,爭取同支持香港外籍家庭傭工住滿7年後獲得居港權,成為香港永久性居民嘅謠言。縱然公民黨已經否認並提出有關黨員只係依照《大律師行為守則》行事,但由於事件臨近2011年香港區議會選舉,謠言仍然被一啲唔支持公民黨嘅人,或者一啲親中陣營嘅炒作。

雨傘革命期間嘅謠言[編輯]

  • Facebook上曾經有一個名為Marc Tan嘅網民留言,聲稱一位朋友嘅大肚老婆,因為佔中令交通擠塞,遲咗去到律敦治醫院分娩,令女嬰嚴重腦缺氧、大量腦細胞死亡。但係文章一出之後,就有網民釐清,律敦治醫院無設有產房,直指呢啲係五毛作故仔,醫院管理局新聞組亦同律敦治醫院核實,稱佔領行動發生之後,並無接受呢個個案[2][3]
  • 有一個自稱叫做「容姐」嘅人,打咗上去香港電台phone-in節目《有李同行》,話因為佔中令佢喺隧道內「塞咗四個鐘」,結果未能同家人到港島見癌症病重媳婦最後一面,但事後有唔少網民話,當日紅隧交通非常疏落。時事評論員范中流亦指,如果塞車四個鐘,必定係大新聞,但各大傳媒未見報道[2][4][5]。資深傳媒人區家麟撰文回應事件嘅時候,形容事件令人心寒,又話呢啲謠言散播係有組織同計劃[4]

2015年無綫新聞謊稱民主、公民黨反對大嶼山新路[編輯]

喺2015年10月,汲水門大橋因為有船撞橋而封閉,搞到大嶼山有兩個鐘變咗孤島,無綫新聞之後報導重提2002年連接大嶼山同元朗嘅十號幹線方案,錯誤報導民主黨同公民黨反對方案。但當時公民黨未成立,民主黨議員投票贊成,反而係民建聯自由黨聯手否決。通訊局裁定投訴成立,向無綫同無綫網絡電視出警告。不過,無綫新聞只係低調更正報道,無正式更正聲明或者道歉[6]

黃之鋒以二千萬買樓假新聞[編輯]

喺2019年10月,網上流傳一單假新聞話黃之鋒,以二千萬購入南區豪宅貝沙灣分層戶,當中指明係貝沙灣南灣六座中高層B室單位,買賣由美聯物業促成。黃之鋒否認事件,美聯物業之後回應話佢哋無幫黃之鋒做過任何買賣,《星島日報》記者去土地註冊處做查冊亦未見嗰個單位易手[7]

不過,有啲激進建制派嘅人,仍然攞呢單新聞嚟做文章。例如喺2020年香港立法會選舉民主派初選嘅投票日,黃之鋒喺太古康怡廣場外為袁嘉蔚拉票嘅時候,石房有忽然現身騷擾佢哋嘅拉票活動,用電話拍攝佢哋,又指罵黃之鋒係「漢奸走狗」,用呢單新聞老屈佢。擾攘約10分鐘後,在場好多人指罵石房有,結果石房有自行離開現場[8]

羅范椒芬散播假新聞聲稱有少女向激進派示威者提供性服務[編輯]

2019年9月9號逃犯條例修訂草案風波期間,行政會議成員羅范椒芬喺接受香港電台英文台節目《Backchat》嘅時候,宣稱有年輕少女為一啲激進示威者提供免費性愛服務,又宣稱已經證實咗件事,聲稱對於呢啲少女被誤導而提供免費性服務感到悲哀[9]

羅范椒芬嘅說法令公眾嘩然,泛民主派有唔少人,例如當時出席同一節目嘅吳文遠,仲有黃碧雲同埋陳淑莊都批評佢放流料引起公眾恐慌,行為唔能夠接受[10][11][12],有傳媒亦做咗事實核查,否咗佢嘅說法[13]

中國「中央政法委」散播民主派聘請職業示威者假新聞[編輯]

逃犯條例修訂草案風波期間,中國「中央政法委」微信官方帳號曾經發布新聞,指控運動背後係有人聘請示威者,甚至講到如果殺警,最高會有2000萬。但台灣事實查核中心就查證新聞入面提及Telegram頻道嘅「死士招募組」,發現根本無提及酬勞、撫恤金等訊息。查證又發現佢哋攞咗路透社嘅照片看圖作文,同埋老作涉及壹傳媒嘅重要股票交易公告,確認呢段係假新聞[14]

2019年香港區議會選舉攻擊泛民主派當選人嘅留言[編輯]

喺選舉結果公佈後,有多名泛民主派當選人疑似被微博等一啲社交網站傳聞有不良行為或者生理缺陷。其中喺深水埗南昌北選區擊敗民建聯鄭泳舜公民黨男性當選人劉家衡,就被指係「著名援交女」、「AV天使」;喺油尖旺佐敦南選區擊敗民建聯葉傲冬陳梓維被傳為係庇護工場嘅弱智人士,「自理能力差少少」;而出戰北區清河選區嘅註冊社工袁浩倫就被指啱啱喺戒毒中心完成療程出嚟[15]。其後求驗傳媒批評,呢啲改圖係不實指控[16],被抹黑嘅劉家衡握就回應話無諗過有一日連自己嘅性別都需要澄清[17]

假新聞攻擊背後嘅操作[編輯]

  • 美國獨立社交平台研究公司Graphika喺2021年2月發表報告,指出有數以百萬計嘅虛假社交平台帳戶有組織同有系統咁幫中共唱好,攻擊香港泛民主派人士同香港修例風波,又點名提到,包括港人講地在內嘅多名親中陣營人士同網媒,仲有新民黨成員陳志豪、中國外交部發言人趙立堅、多位中國駐外大使等,有份參與散播垃圾流料(spamouflage)。報告又話,有關活動有幕後組織同資金支持[18][19][20]
  • 資深傳媒人區家麟喺分析一啲同佔中有關嘅流言個陣,形容呢啲謠言嘅散播有組織有計劃,識得講故仔,有畫面感有細節,仿真度極高,渠道亦揀得好[21]

參考[編輯]

  1. 第二場論壇激戰 陳方安生拒輪攻挺民主 - 大紀元. 大紀元 www.epochtimes.com (繁體中文). 2007-11-26. 喺2022-04-22搵到.
  2. 2.0 2.1 Https://Www.post852.com, 852郵報 (2014-10-02). 范析852 X 遍地開花│抹黑佔領故事何其多 作假弄虛靠常識揭破|852郵報. 852郵報 (香港中文). 原著喺2021-03-06歸檔. 喺2021-03-05搵到. {{cite web}}: External link in |last= (help)
  3. 香港人,你為何健忘? | 別橋. . 喺2021-03-05搵到.
  4. 4.0 4.1 令我心寒的一段錄音 | 區家麟. . 喺2021-03-06搵到.
  5. 紅隧塞車阻見病媳? 區家麟質疑真偽 - 20141002 - 港聞. 明報新聞網 - 每日明報 daily news (繁體中文). 喺2021-03-06搵到.
  6. 誤報民主、公民黨反對大嶼山新路 通訊局警告無綫 | 立場報道 | 立場新聞. 立場新聞 Stand News. 原著喺2021-06-25歸檔. 喺2021-06-23搵到.
  7. 頭條日報. 【Kelly Online】傳二千萬購貝沙灣 黃之鋒:假新聞. 頭條日報 Headline Daily (香港中文). 喺2021-03-03搵到. {{cite news}}: no-break space character in |title= at position 23 (help)CS1 maint: url-status (link)
  8. 頭條日報. 【立會選舉】譚文豪初選街站義工遇襲 黃之鋒與「大波man」口角. 頭條日報 Headline Daily (中文). 喺2021-03-03搵到.
  9. 羅范亂傳少女讓勇士洩慾 | 蘋果日報. Apple Daily 蘋果日報 (香港中文). 原著喺2021-06-21歸檔. 喺2021-03-05搵到.
  10.  . 明報. 2019-09-09.
  11. 吳倬安 (2019-09-09).  . 香港01.
  12. 羅范:朋友的朋友稱 有女生供性服務 黃碧雲:若無證據應道歉 示威者:未聽聞 - 20190910 - 要聞. 明報新聞網 - 每日明報 daily news (繁體中文). 喺2021-03-06搵到.
  13. 李忠謙 (2019-09-09). . 風傳媒.
  14. 【錯誤】網站文章「香港暴徒的酬勞曝光:『殺警』最高給2000萬!」?. (繁體中文). 2019-11-15. 喺2021-06-08搵到.
  15. 【Emily】當選者劉家衡被當「天使」遭問價. 原先內容歸檔喺2019-11-29. 喺2019-11-30搵到.
  16. 勝負乃兵家常事,何必屈人吸毒及弱智?
  17. 南昌北 劉家衡 Facebook 專頁
  18. 美報告踢爆中共系統性轉發假消息 點名趙立堅港人講地新民黨員. Radio Free Asia (英文). 喺2021-03-04搵到.
  19. "Spamouflage Breakout - Chinese Spam Network Finally Starts to Gain Some Traction" (PDF).{{cite web}}: CS1 maint: url-status (link)
  20. 自由時報電子報 (2021-02-06). 立堅是你?美報告踢爆中國官員系統性轉發假訊息 - 國際. (中文). 喺2021-03-04搵到.
  21. 令我心寒的一段錄音 | 區家麟. . 喺2021-03-06搵到.