錢雲會案

錢雲會案（中國大陸官方叫樂清蒲岐"12·25"交通肇事案）係中國一單車死人案，2010年12月25號上晝九點幾，浙江省溫州市嘅樂清市蒲岐鎮寨橋村村民錢雲會，響虹南公路寨橋村路段，畀架車牌「皖K5B323」嘅解放牌重型自卸貨車碌死，司機係啱啱出獄幾日嘅費良玉. 之後幾日有暴動，亦有網上同各國媒體報道，同埋一連串調查。

死者錢雲會死前幫寨橋村村民爭取權益，"上訪"咗好多次^幾多次？。2005年，喺寨橋村村民委員會主任嘅民主選舉裏面，錢雲會得 2300 票（九成二嘅選票）當選，村民叫佢做村長。案發之後，死者嘅親屬同埋目擊證人話錢雲會俾人謀殺，之後樂清市警方召開新聞發佈會，叫呢件事做「交通事故」， 當地政府對包括死者女兒女婿嘅家屬，知情嘅村民，同埋外地嚟嘅公民記者未審先判，又派人恐嚇村民，規定村民只能講同公安一致嘅講法，否則就拉人。

公安搶屍引發警民衝突

案發後，村民組織起嚟保護現場。當地公安其後兩度試圖帶走錢雲會條屍，最後喺嗰日晏晝4點將條屍帶走，重同村民衝突。有六個村民後來俾當地警方用涉嫌尋釁滋事呢個理由刑事拘留，當中包括件事嘅目擊證人。錢雲會個女、女婿同埋個仔都俾公安帶走， 囚禁喺看守所。

錢雲會嘅堂細佬錢雲龍（化名）住喺虹橋鎮，佢響10點左右嚟到事發現場。當時交警話畀佢聽，呢單係交通事故，要清理現場。家屬同意清理現場，但要睇咗監控片段，確定死因先。家屬跟住交警去派出所睇，但俾人擋喺門外，話村民打傷咗鎮上嘅警察。

樂清市公安局向《三聯生活周刊》表示，由於村口嘅攝影機測試緊，公安聯絡咗電話公司後，錄咗村民圍攻警察嘅片段。