錦田鄉酬恩建醮

2015年錦田鄉酬恩建醮嘅醮棚

錦田鄉酬恩建醮係十年一度喺香港錦田舉行嘅太平清醮。2025年已經搞咗卅四屆，係全港已知最耐歷史嘅太平清醮。事緣清初遷界迫使到錦田鄉民離鄉別井，為咗答謝幫佢哋復鄉嘅兩位官員，鄉民就約好十年一次打醮酬恩。醮會除咗道教儀式之外，仲包括行香祈福、大士巡遊等等活動；用到嘅搭棚、紙紮之類技藝都屬於非物質文化遺產。第卅四屆醮會個醮棚仲係健力士世界紀錄認證過嘅全球最大座竹造臨時祭壇。

歷史

兩廣總督周有德

錦田鄉酬恩建醮，係香港已知最耐歷史嘅太平清醮。由1685乙丑年開始每十年一屆，到2025年已經舉辦咗卅四屆，就算係啱啱經歷完二戰嘅1945年都冇停辦過。

事緣清朝初期為咗遏制鄭成功勢力，順治帝頒令沿海五十里所有人都要撤入內陸。呢條遷界令搞到好多人無啦啦流離失所，甚至喺遷界途中監生餓死，錦田鄉民都深受其害。廣東巡撫王來任眼見遷界令帶嚟嘅禍害，好幾次上書朝廷希望撤銷；點知反而俾人話辦事不力而被革職，冇幾耐就鬱鬱而終。後嚟上任嘅兩廣總督周有德，同樣目睹災民嘅慘況，於是繼承王來任嘅遺志上書康熙，最後爭取到1683年復界。

所謂「酬恩」，就係指錦田鄉民答謝周有德、王來任兩位官員（合稱周王二公）為民請命，等錦田鄉民可以搬返去復鄉。啲鄉民唔只起咗間周王二公書院紀念兩位恩公，仲約好喺書院隔籬笪地每十年搞一次醮會；一來感激周王二公嘅恩德，二來超度緬懷因為遷界令喪生嘅族人，三來淨化鄉郊地方、幫錦田居民祈福。錦田鄉酬恩建醮，就係噉成為咗香港唯一主祀周王二公嘅太平清醮。

活動

錦田一班鄉親父老欣賞緊手托木偶神功戲。

根據傳統，酬恩建醮係由錦田六股九村合辦嘅活動。醮會開始之前第一件事，係要問杯選出六十位「緣首」做每一股嘅代表，負責齋戒同拜神。搞掂先可以擇個吉日迎神，開始打醮儀式。

酬恩建醮期間除咗唸經拜懺、分燈進燭、八門功德等等道教科儀之外，仲會舉行一系列嘅傳統活動，包括舞龍、舞獅同盆菜宴等等。核心環節之一，係喺錦田同元朗一帶行香祈福嘅巡遊，一路仲有傳統樂器伴奏。醮會嘅另一個高潮係臨尾舉行嘅大士巡遊，鄉民會捧住兩層樓高嘅大士王紮作巡鄉。等到五日六夜嘅醮會完嗮之後，醮棚會改建做戲棚，上演粵劇同手托木偶戲兩款神功戲；第卅四屆酬恩建醮仲同場加映埋獅王爭霸賽同美食嘉年華添。

保育

搞醮會用到嘅技藝好多都屬於非物質文化遺產，譬如搭棚、紙紮、花牌紮作、舞龍舞獅、神功戲等等，就連打醮本身都位列非遺。喺政府非遺辦事處同弘揚中華文化辦公室資助下，第卅四屆錦田鄉酬恩建醮就搞咗唔少新活動，好似導賞團、展覽、沉浸式劇場噉，宣揚打醮會見到嘅非物質文化遺產同錦田鄉文物。

搭棚

2025年第卅四屆錦田鄉酬恩建醮用嘅醮棚，係由十七位師傅、經過兩個月時間、用成三萬支竹搭出嚟嘅。成座有五到十層樓咁高，佔地四萬二千呎左右；唔單只係全港最大座醮棚，仲係健力士世界紀錄認證過嘅全球最大座竹造臨時祭壇。呢座企到六千個人嘅大竹棚採用咗「大金鐘」款式，中間一條柱都冇，好考師傅功力。加上外面嘅牌樓、神棚、食堂同跨越舊錦田河嘅兩條橋，全部都要搭棚師傅起出嚟，工程規模非常之大。

搭棚呢門傳統工藝屬於香港非物質文化遺產。喺2025年大埔宏福苑五級火之後，政府全面推動用金屬棚架取締竹棚；喺噉嘅背景之下，吸引咗唔少人專程嚟到錦田欣賞竹棚工藝，甚至帶動到醮會第一日人流「逼爆」。

紙紮

大士王（左）同財神（右）紮作

打醮一定唔少得同樣屬於非遺嘅紙紮藝術。錦田鄉醮周圍都可以見到用竹篾、紗紙、彩紙整成嘅大大小小紮作，譬如牌樓、獅子、漢馬、門將、玉皇殿、觀音壇同各式各樣嘅燈籠等等。第卅四屆酬恩建醮就有過千件紮作，用咗廿幾位師傅好幾個月時間先至整成。

焦點之一係十王殿嘅吊公——即係用摩打驅動嘅公仔；呢啲象徵地府同陽間百態嘅紙紮公仔手腳識得郁，望落栩栩如生，愛嚟警世同教人向善。酬恩建醮嘅另一大特色就係兩層樓高嘅粵式大士王；佢著住嗰副盔甲由一萬八千個紙紮錐體扣成，靚得嚟仲要夠實淨，因為大士巡遊嗰陣鄉民會抬住佢出出入入。大士隔籬仲有尊伸住脷嘅「財神」（又叫「一見發財」），象徵披麻戴孝嘅孝子；酬恩建醮嘅財神特別在佢同大士王一樣咁高，第度都見唔到。

睇埋

• 香港太平清醮