鏈球菌快速檢測

鏈球菌快速檢測
MedlinePlus	003745
LOINC	78012-2

鏈球菌快速檢測（英文： Rapid strep test ，簡稱RST ）係臨床上廣泛用嚟輔助診斷鏈球菌性咽炎嘅快速抗原偵測檢驗 （ RADT ），呢隻病嘅致病原係A 群鏈球菌（ GAS ）。目前有幾種用緊嘅 RST ，雖然每種都採用唔同嘅技術，但都係由喉拭樣採集嘅樣本偵測患者係咪有 GAS 嘅抗原。

醫療用途

鏈球菌快速檢測（ RST ）能夠協助臨床醫生判斷係咪要開抗生素畀咽喉炎（最常見嘅喉嚨感染）嘅病人 ，咽喉炎大部分都係病毒感染，但細菌感染都唔少（小朋友大約20 % 至40 % ，成人大約5 % 至15 % ） 。病毒同細菌感染嘅症狀難以區分，但係細菌感染者可以用抗生素快速治癒。由於多數細菌性咽喉炎嘅致病原係 A 群鏈球菌（ GAS ），患者嘅喉嚨存在呢隻菌可以作為開立抗生素嘅必要條件 。鏈球菌性咽喉炎係一種自限性感染，通常喺冇藥物治療下會喺一星期內緩解，但係抗生素可以縮短疾病嘅病程同嚴重度，並降低少見但嚴重嘅併發症風險 。

RST 亦有公共衛生上嘅好處。防止濫用抗生素除咗可以避免對患者產生不必要嘅副作用，亦都可以減少產生抗藥性細菌。藉由鑑別感染係咪由細菌造成有助於減少病毒感染患者誤用抗生素 。

有啲地方臨床指引建議對咽炎嘅患者進行 RST ，但有啲唔會；其中美國嘅指引相比歐洲較推薦使用 RST 。用 RST 可能喺第三世界國家中最有幫助，因為嗰度嘅鏈球菌感染併發症較多，但係呢啲地區嘅使用情況仍未被研究 。

RST 之外，喉試樣微生物培養係另一種可靠而且唔貴嘅替代方法，對於感染源嘅鑑別具有高敏感性同高特異性。但微生物培養需要特殊嘅設備，而且要48小時先可以確認結果；相比之下， RST 只需要幾分鐘 。

檢驗方法

首先用醫用棉片碰觸喉嚨以採集黏膜樣本。喺大多數嘅 RST 入面，呢啲樣本會同含有 GAS 抗體嘅反應劑接觸，若有產生特定可見嘅反應，就會被判為陽性。目前有三種主要嘅 RST ：第一種係1980年代開發出嘅乳膠吸附試驗 ，目前幾乎已經唔再用，呢種方法採用覆有抗原嘅乳膠圓珠，若患者樣本入面有 GAS 抗體，圓珠就會凝集；第二種係目前最廣泛使用嘅側層流試驗，樣本放喺一條硝化纖維試紙上面，如果樣本入面有 GAS 抗原，試液就會同試紙上嘅抗體結合而形成一條可見嘅線條；第三種係光學免疫分析法 ，為目前最新、最貴嘅技術，呢個方法將樣本同標記過嘅抗體混合，再同試紙上特殊嘅受質反應，如果有 GAS 抗原存在，反應就會令試紙嘅顏色改變 。

結果判讀

RST 對 GAS 存在嘅特異性至少有95 % ，部分研究嘅資料甚至接近100 % ；因此如果檢驗結果為陽性，噉 GAS 非常有可能存在。不過5 % 到20 % 嘅人就算喉嚨有 GAS，都冇任何症狀，所以 GAS 嘅存在唔代表佢係咽炎嘅致病原 。側層流試驗嘅敏感度較低（約65 % 至80 % ） ，所以陰性結果唔代表患者冇鏈球菌性咽炎；相比之下，細菌培養有高達90 % 到95 % 嘅敏感度 。而新一代嘅光學免疫分析法就有高達94 % 嘅敏感度 。

雖然 RST 無法分辨 GAS 係咪感染嘅元兇，但主流意見建議對 RST 陽性嘅喉嚨痛患者開抗生素 。美國嘅醫療指引建議對 RST 陰性嘅患者做細菌培養同後續追蹤 ，但歐洲嘅指引就建議將佢視為非鏈球菌感染處理 。

參見

• 疾病篩檢
• 診斷性檢測