鏗鏘集

出自維基百科,自由嘅百科全書
跳去導覽 跳去搵嘢

鏗鏘集》(英文Hong Kong Connection,1996年前英文名係The Common Sense[1])係香港電台電視部製作嘅每週新聞紀錄片電視節目,內容圍繞香港政治、經濟、教育、社會民生、弱勢社群、環保、中國現況、國際視野等等,議題廣泛。節目模式同後嚟無綫電視嘅《新聞透視》、《星期×檔案》系列同埋Now TV嘅《經緯線》相似。節目响1978年3月5日首播,首集名爲《金飯碗》[2],係香港最長壽嘅新聞紀錄片電視節目,過去多年曾經得到多個國際新聞、傳媒等獎項。

歷史[編輯]

曾經爲《鏗鏘集》擔任旁述嘅有李學儒殷巧兒劉家傑陳志雲陳耀華張炳強鍾子綸張國良韋以莊李慧妍鄧藹霖林武山潘福炎王永祥黃麗娟許金峰葉冠霖周萬聰蘇敬恆等等,而家嘅旁述就係衛立言

節目演變[編輯]

《鏗鏘集》開播初期,主要有戲劇等成份,亦曾經拍攝藝人MV,其後節目經過多次改革,逐漸演變爲紀錄片同幕後解說相結合嘅時事節目。[3]

《鏗鏘集》曾經喺1990年11月至1996年5月期間唔定時推出《鏗鏘集·兒童系列》,內容主要圍繞香港本地兒童成長。

《鏗鏘集》自開播以嚟,從來冇安排喺麗的電視第一台(後改名亞洲電視中文台/黃金台/本港台)播映;[4]但1986年底至1992年底期間,亞洲電視英文台/鑽石台(1989年2月改名「國際台」)曾經偶然播放過節目嘅英文版Hong Kong Connection,並以每週一次播放(1993年7月起改由無綫明珠台播放直至2017年9月停播,2018年8月改由奇妙電視旗下嘅香港國際財經台播放)。

2017年1月9日至2017年3月31日,港台電視推出60集節目《時代的記錄—鏗鏘集》,由李家文高芳婷主持,節目由《鏗鏘集》三十幾年,過千個故事當中,嘗試梳理出香港城市脈搏嘅起伏高低,以專題形式同觀眾回顧香港歷史[5]

2019年7月29號,《鏗鏘集》播出節目《721 元朗黑夜》,介紹元朗襲擊事件嘅事發經過。節目按時序重組當晚從現場拍攝嘅唔同片段,訪問當事人,質問警方點解喺當時失蹤。就喺影片獲得網民嘅讃好,喺YouTube同Facebook上獲得300多萬點擊量時,消息指無綫會抽起下星期嘅節目。不過,節目組之後喺Facebook專頁回應市民嘅憂慮,澄清原星期一時段會一連四星期播放《鏗鏘說》,新一期《鏗鏘集》改爲星期三晚7點半喺港台電視31、31A播出。[6]

《鏗鏘集》因爲涉及敏感嘅時事題材,成日畀中國大陸封殺,當喺無綫電視翡翠台直播時,廣東有線會用預先錄製節目覆蓋部份或者全部內容。但中國大陸人能夠喺香港電台嘅官網上睇到鏗鏘集嘅全部內容。鑑於通訊局喺2020年3月4號宣佈撤銷商營免費電視台播放港台節目規定,無綫電視第二日開始即刻抽起所有港台節目而改播其他節目,《鏗鏘集》自此唔再喺無綫電視播出。

片頭變遷[編輯]

1989年以前,《鏗鏘集》節目並無開頭動畫,淨係用標題說明,但每集廣告過場則有動畫提示。1989年以後,《鏗鏘集》就啟用開頭動畫。歷年嚟開頭動畫有唔同改革,但保留「透明波擊打標題立體字並發出響聲」嘅經典動畫。

爭議[編輯]

編導查車牌報道元朗襲擊事件被捕[編輯]

編導蔡玉玲喺2020年11月3號晚上10點幾獲准保釋
2020年11月10號,編導蔡玉玲涉製作元朗 7.21 專題時以車牌查冊,作出虛假陳述被捕同埋起訴,喺粉嶺裁判法院提堂。港台工會、記協以同埋多名區議員到場聲援。
2021年1月14號,蔡玉玲提堂,香港電台節目製作人員工會成員等約10人到場聲援。

2020年11月3號,警方拘捕《鏗鏘集》編導蔡玉玲,被指製作元朗721事件週年追蹤節目《721誰主真相》期間查閱車主資料時涉嫌虛假陳述,取得有關車主嘅個人資料後用喺唔符合聲明所指用途,違反《道路交通條例》第111(3)條,暫控兩項「爲取得道路交通條例下嘅證明書而作出虛假陳述」罪。新界北總區重案組警員到其位响美孚清麗苑嘅住所搜查,之後將佢帶返大埔警署,到同日晚上10點幾獲准保釋,案件喺11月10號喺粉嶺裁判法院提堂。蔡玉玲離開警署時表示拘捕記者事件恐怕讓公眾擔心警方係否藉此打壓新聞自由,甚至會會否爲新聞工作者帶嚟寒蟬效應,不利香港或港人。但同時呼籲同業繼續「信守價值,無畏無懼無私」。

事件亦震動新聞界。香港記者協會香港電台節目製作人員工會等8間傳媒工會組織發聲明,嚴正要求警方交代,並且對警方橫蠻無理同埋荒誕嘅行動表示極度震驚同埋憤怒。廣播處長梁家榮形容今次事件確係少有,關注會唔會出現寒蟬效應,認爲成個新聞界應該認真看待事件。[7]民主黨立法會議員林卓廷批評警方拘捕追查真相嘅記者,但就唔拉7.21事件當日好多個仍然在逃嘅白衣人,認爲非常荒謬。[8]

美國國務院首席副發言人布朗喺美國駐港澳總領事館嘅facebook專頁發帖,表示對事件深表關注帖,表示中國共產黨同埋佢哋喺香港嘅代理人必須停止衝擊新聞自由。[9]

警方話接獲市民投訴,指有人喺電視節目中公開報道車主相關資料,懷疑侵犯個人私隱。調查後拘捕一名37歲女子,涉响2020年5至6月,透過運輸署「車輛登記細節證明書」網上系統,取得相關車主嘅個人資料。而根據查閱車牌網上系統,申請資料時需要喺「進行法律程序」、「買賣車輛」同埋「其他有關交通同埋運輸嘅事宜」選項中選擇一項,但冇一項同新聞工作相關。而因反修例運動期間,有警員車牌被「起底」後,網民發現原本申請用途「其他,請註明」一項,改爲現時嘅「其他有關交通同埋運輸嘅事宜」。[10]

收視[編輯]

《鏗鏘集》綜合經香港電台網站、流動程式、香港電台YouTube頻道同埋Facebook專頁統計,响2020年3月14日經Facebook專頁發布「十大最多瀏覽人次集數」,當中最高收視嘅「721元朗黑夜」瀏覽次數超過840萬次[11]

參考[編輯]

  1. 明報2008年3月6日MP+ A27版《鏗鏘有聲30年》
  2. 鏗鏘集-金飯碗
  3. YouTube: 鏗鏘集:鏗鏘四十關鍵詞:尋回‧青春記憶
  4. 港台消息:鄧忍光倡《鏗鏘集》轉亞視播
  5. 香港電台網站:時代嘅記錄-鏗鏘集
  6. "【有種紀錄 叫鏗鏘】721 元朗黑夜 《鏗鏘集》網上總瀏覽人次衝354萬". 明報OL. 2019-08-03. 喺2019-08-05搵到.
  7. "回應港台編導被捕 梁家榮關注會否出現寒蟬效應". 香港電台. 2020-11-03. 喺2020-11-04搵到.
  8. "鏗鏘集編導蔡玉玲被捕 消息:涉違道路交通條例 林卓廷向港台了解:同7.21事件報道相關". 明報. 2020-11-03. 喺2020-11-03搵到.
  9. "美國國務院對港台編導被捕深表關注促停止衝擊新聞自由". 香港電台. 2020-11-05. 喺2020-11-05搵到.
  10. "查車牌申報用途 冇新聞工作選項". 明報. 2020-11-04. 喺2020-11-04搵到.
  11. 《鏗鏘集》十大最多瀏覽人次集數

睇埋[編輯]

出面網頁[編輯]