鑲嵌圖

  提示：呢篇文講嘅唔係鑲嵌畫。

幅圖打戙軸係音樂主題，打橫軸係時間。成幅圖係畫緊啲人對唔同主題嘅偏好點樣隨時間變化。唔同音樂主題冇得想像成同一個變數嘅唔同高低值。

鑲嵌圖（參見英文：mosaic plot）係一種統計圖，用嚟視覺化噉表示兩個或以上定性變數（唔可以用高低數值嚟量化）之間嘅關係，當中一個定性變數嘅每個可能數值都有一笪面積代表，而嗰笪面積嘅大細反映有幾多個個案屬於嗰個值。透過鑲嵌圖，研究者可以快速噉觀察多個變數間嘅相依關係，仲有係數據展示嘅分佈情況。

繪製方法

睇埋：列聯表

鑲嵌圖一般係用於定性變項嘅。呢啲變項唔可以用數值高低嚟量化：諸如溫度（物理學同化學會研究）、容量（物理、化學同工程學）或者體重（醫學同生物學）等嘅變項都可以用數值高低嚟表示；但例如家陣做語言學研究，樣本係一班人，而唔同個體喺「以咩方言或語言為母語」呢個變項上都唔同，呢個變項冇得用數值高低嚟代表。

繪製鑲嵌圖之前，首先要決定變項嘅順序，因為唔同變項順序會影響最後出嗰幅圖嘅結構。每個變項會對應其中一個方向（打戙軸或者打橫軸），然後根據每個變項嘅分類情況，將個矩形切割成對應區域。每一個細矩形嘅面積代表嗰個組合類別所佔嘅比例，而顏色同陰影就可以用嚟標示邊個矩形係邊個變項。

想像依家要分析鐵達尼號上邊啲人生還邊啲人死亡，用鑲嵌圖呈現變項之間嘅關係，考慮嘅變項包括

• 性別（英文：gender）：男或女
• 艙等（英文：class）：頭等艙、二等艙、三等艙、船員
• 係咪生還（英文：survived）：Yes（成功生還）或 no（並冇生還）

當中係咪生還係想預測嗰個變項，而另外兩者係用嚟做預測嘅變項。呢幾個變項都係定性嘅，唔可以用數值高低嚟表達。

性別	生還與否	頭等	二等	三等	船員
男	否	118	154	422	670
男	是	62	25	88	192
女	否	4	13	106	3
女	是	141	93	90	20

喺製圖時，三個變項安排如下：

順序	變項	軸向
1	性別	打戙
2	艙等	打橫
3	生還與否	以顏色分

首先以性別做垂直切割，將成幅圖分做上（男）同下（女）兩大區域。男性佔大約四分三，而女性佔大約四分一。

然後喺每個性別區域入便，再按艙等將圖像打橫分做四截，分別代表頭等艙、二等艙、三等艙同船員。呢幾截闊度唔一樣，表示唔同分類所佔比例都唔同。例如男性人員中，船員所佔比例較大；而女性中就以三等艙乘客人數最多；女性船員人數極少，幾乎唔顯眼。

最後再將生還與否應用落去每個區域度，用顏色區分：深色代表死亡，淺色代表生還。齋靠睇圖像就可以發現，頭等艙女性嘅生還率最高，而整體而言，女性生還率明顯高過男性生還率。再進一步觀察，可以見到頭等艙乘客比其他艙等更有機會生還。

最後得出下圖，當中 Titanic 嗰幅圖反映由鐵達尼號得到嘅數據，而 Independent 嗰幅圖反映「獨立」（冇任何變項會影響生還率）嘅數據。

睇埋

• 熱圖
• 棒形圖
• 量度層次
• 離散變數