關鍵時期假說（參見英文：critical period hypothesis）係語言學界一個長期有爭議嘅假說，講人類學語言係咪真係有一個特定嘅關鍵時期。根據呢個假說，人喺某個年齡期內學語言係特別有效率嘅，由於呢段時間人腦對語言輸入特別敏感，所以學語言會易啲。關鍵期假說指出，生命最初幾年係學語言嘅關鍵時期，如果喺呢段時間入面有足夠刺激，人就有能力掌握第一語言。但係如果過咗呢段時期，語言學習會困難得多，尤其係語法方面。
