陳冠明

陳冠明
出世	(1956-10-18)1956年10月18號 中國江蘇徐州銅山縣
死	2017年10月18號(2017-10-18)（61歲） 阿根廷聖古絲省聖胡利安港
出名原因	第一位踹單車行嗮中國大陸冚唪唥省市嘅人 三輪車環球追奧運會第一人

陳冠明（粵拼：can4 gun3 ming4；簡化字：陈冠明；1956年10月18號—2017年10月18號）係中國一位奧運發燒友，江蘇徐州銅山縣人。佢試過從2001年11月18號到2008年7月11號之間，一個人踹單車行嗮中國80%以上嘅省份而出名。2017年10月18號喺阿根廷踹車出車禍過身。

生平

陳冠明喺1956年10月18號喺江蘇徐州銅山縣張陳鄉二陳村出世，細個時好鍾意做體育運動，尤其係馬拉松同踹單車比較多。喺屋企嗰時成日朝早4點鐘起身跑成廿幾公里路。正因為噉而開始決定踹三輪車行勻成個中國大陸。 2001年7月13號北京申辦2008奧運成功之後，佢即刻去買咗抽炮仗來燒，重厝錢開始買三輪車做搭客仔生意足足四個月，直到2001年11月18號開始一人踹單車環遊世界，目的係宣傳「和平」同埋「環保」。雖然出發嗰日俾好多屋企人反對陳冠明嘅所為，但一樣冇阻住佢嘅內心，試過從徐州開始，先後踹單車去咗南京、上海、浙江、江西、廣西、雲南、廣東、香港、澳門等地，期間亦經過中緬邊界、三峽、長白山、布達拉宮、舟曲縣、及壺口瀑布等地，去到2008年8月就快舉辦奧運嗰時到達開幕式主辦地北京國家體育場之後，佢總共行咗將近65500公里嘅路，第一個人踹單車行勻嗮中國而一夜成名。

雖然2008年奧運結束之後返到徐州住過下，但第二年又繼續出發，先後經過浙江杭州、福建廈門，2010年亦睇過世界博覽會，同年7月1號去到近南友高速公路西南邊出入口嘅友誼關出境到越南。出境之後亦先後去過胡志明市、柬埔寨金邊、泰國、緬甸、馬來西亞、星加坡、巴基斯坦、伊朗、土耳其、希臘雅典、意大利、法國等12個國家，最後喺2012年坐船到英國倫敦睇奧運。

佢喺2012年奧運結束之後冇返去中國大陸，而係繼續踹車，喺2013年9月到咗利物浦搭船橫跨大西洋到加拿大新省哈利法斯，之後經過安大略省多倫多同曼尼托巴省温尼辟、穿過落基山脈到卑詩省溫哥華、重喺2015年3月26號踹到美國加州三藩市，同年4～9月間先後到咗洛杉磯、紐約州紐約、華盛頓州華盛頓呢啲城市，行到墨西哥之後經中美地峽，跨過巴拿馬運河同安第斯山脈，最後入巴西去到里約熱內盧州里約熱內盧睇2016年奧運。

2016年奧運結束之後，陳冠明又開始從里約熱內盧出發繼續追喺日本東京舉辦嘅2020年奧運會，2017年7月成功到達阿根廷密西安尼斯省波薩達斯，同年8月13號成功到咗巴西同阿根廷嘅交界——伊瓜蘇瀑布。

死

陳冠明本來諗住繼續踹車到火地島搭船跨戴基海峽到南極洲，半路計劃直接去聖古絲省艾卡拉法第西南邊嘅皮里托莫雷諾冰川睇景，但2017年10月18號，佢踹車到國家3號高速公路嘅聖胡利安港以南大概40km嘅位發生車禍，部三輪車俾部貨櫃車撞冧。雖然陳冠明第一時間被送到就近醫院搶救，但當地時間嗰晚黑證實不治，終年61歲。