陳夢家

出自維基百科,自由嘅百科全書
陳夢家(1940年代)

陳夢家1911年4月20號1966年9月3號[1]),筆名陳慢哉,係中國考古學家詩人。佢專研究古文字,尤其係商周古文字。佢最後因為受唔住文化大革命造反派嘅折磨,自殺而死。

屋企[編輯]

陳夢家鄉下響浙江上虞,之不過佢響南京出世。陳夢家出身基督教家庭[1]

陳夢家有老婆趙蘿蕤,係翻譯家比較文學家。趙蘿蕤係神學家趙紫宸之女[2],學生時代係燕京大學校花[1]。兩人響1935年8月結緍[2]

就學[編輯]

陳夢家就讀中中央大學,即家下南京大學法律系。其間佢係亦係詩人,登喺文學雜誌《新月》,所以佢同徐志摩等人,都叫做新月詩人。1931年,佢編咗本《新月詩集》,收咗十幾位新月詩人嘅詩,包括佢同徐志摩嘅詩[1]。1932年,陳夢家中央大學畢業。同年一二八事變,佢有份響上海抵抗日本侵略。

1932年,佢到北京,讀燕京大學宗教學院[3]

1934到1936年,佢又攻讀容庚古文字學研究生[3]

教學同研究[編輯]

陳夢家先後響青島大學燕京大學、同二戰時昆明西南聯合大學任教。佢師事徐志摩聞一多,係新月派詩人。陳夢家響青島大學工作期間,開始中意研究古文字,入咗研究院研究古文字,進而從事古史和考古研究[1]。1944年佢同老婆拎到獎學金去美國,佢哋去咗芝加哥大學。趙蘿蕤讀講文學博士學位,而陳夢家就敎授古文字學。期間佢收集流散響歐美嘅商周青銅器資料,研究古代的宗教、神話、禮俗而治古文字、古史同考古研究[3]。佢收集到850件青銅器古文,準備響美國出書,但最終都無出到。

1947年陳夢家返中國,而佢老婆1948年先返。佢去咗北京。趙蘿蕤響燕京大學敎英語系,而陳夢家響清華大學中文系[1]

1949年,中國共産黨取得中國。1951年,因清華大學受政治干擾,陳夢家分派去中國科學院考古研究所,做研究員

佢學術著作有,1936年嘅《古文字中之商周祭祀》、1940年嘅《西周年代考》、1945年重慶商務印書館嘅《老子今釋》、1946年北京圖書館商務印書館嘅《海外中國銅器圖錄考釋第一集》、1955年到1956年嘅《西周銅器斷代》、1956年《殷墟卜辭綜述》、1957年商務印書館嘅《尚書通論》、1962年科學出版社嘅《美帝國主義劫掠的我國殷周銅器集錄》等等。

當中《美帝國主義劫掠的我國殷周銅器集錄》,就係陳夢家響美國無出嘅書。1962年,佢經已畀打成右派,呢本書個書名,唔到佢改,書亦無提過佢名。之不過本書研究太重要,就算陳夢家係右派,都照出。

打成右派[編輯]

陳夢家留響北京,畀中國共產黨發動一場場政治運動波及。

1951年,共產黨搞過「知識份子思想改造運動」,針對高級知識分子,而唔停咁檢討改造自己,告發他人。陳夢家夫婦嘅朋友巫寧坤,後尾寫過1951年嘅事。陳夢家聽到燕京大學大喇叭廣播,要求全體師生參加集體工間操,就話:『這是1984來了。這麼快。』1949年George Orwell寫本《1984》嘅書,預言未來極權社會嘅景況。陳夢家無諗到1951年就出現[1]

共產黨之後又搞「院系調整」,有基督敎會背景嘅燕京大學停辦,清華大學要取消文科系。陳夢家除咗畀人批判,要離開學校,畀人分配到考古研究所[1]。佢老婆趙蘿蕤畀人刺激過度,導致精神分裂。

1957年,陳夢家發咗兩篇文,叫《慎重一點「改革」漢字》同《關於漢字的前途》。佢唔贊成文字改革,用簡化字同拉丁化中文字。所以畀人定性為「章羅聯盟反對文字改革嘅急先鋒」[1]

陳夢家畀自己嘅研究助理李學勤,舉報有經濟問題。1957年,陳夢家畀人打成右派,罰「降級使用」,《考古學報》上連載文章要停發[1]

文化大革命[編輯]

1966年,毛澤東發動文化大革命,一早畀人打成右派嘅陳夢家,情況好慘。

1966年8月,陳夢家響考古所畀人批判斗爭,畀人抄家。夫婦間屋人霸咗來用,畀人趕到車房爛屋。老婆發病兩次,但送唔到去醫院。佢畀人迫佢長跪院中,畀人吐口水,罪證係攻擊革命烈士聞一多「不洗澡,不換衣服,身上臭得要命」[1]

1966年8月24號傍晚,唐曆七月初九,陳夢家響考古研究所畀人鬥完,去到朋友屋企,「我不能再讓別人把我當猴子耍了」。佢唔想畀人玩,但無耐畀人追上門,畀人撳,畀人鬧。迫佢返考古研究所,成晚唔畀返屋企。當晚可能聽到附近折磨人死嘅聲。就係咁,佢寫遺書,食大量安眠藥自殺,但唔夠份量,死唔去[1]

十日後,9月3號,陳夢家上吊自殺死[1]。但亦都有人懷疑係畀人打死,然後裝成自殺咁樣。

文化大革命結束之後,陳夢家嘅罪名同冤案,先至得以昭雪平反[3]

興趣[編輯]

陳夢家中意睇戲,同寫劇評。佢識得魏喜奎筱白玉霜常香玉馬金鳳呢啲明星[1][2]

[編輯]

  1. 1.00 1.01 1.02 1.03 1.04 1.05 1.06 1.07 1.08 1.09 1.10 1.11 1.12 1.13 . 原著喺2009年10月4號歸檔. 喺2009年10月27號搵到.
  2. 2.0 2.1 2.2 . 原著喺2010年12月28號歸檔. 喺2009年10月27號搵到.
  3. 3.0 3.1 3.2 3.3 . 原著喺2016年3月4號歸檔. 喺2009年10月27號搵到.