陳立僑

出自維基百科,自由嘅百科全書

陳立僑醫生(Dr. Lik-kiu Ding,1920年2008年6月24號),馬來西亞沙勞越詩巫出世,係香港1960年代1980年代社會運動界重要人物。佢有份創立同領導社運組織,好似基督教工業委員會、長春社、楊震社會服務中心(1990年後改叫循道衞理楊震社會服務處),重有香港民主民生協進會等等。

家庭背景[編輯]

陳立僑祖籍福建古田,阿爺陳玉潤1900年為咗逃避旱災飢荒,就跟衞理會牧師黃乃裳離開中國大陸,移居北婆羅洲。後來佢兩個仔陳天隨陳天根都嚟到北婆羅洲定居,陳天根後尾娶吳玉愛生兒育女。陳文僑嘅兄弟姐妹就係陳家喺婆羅洲土生土長嘅第一代。陳立僑出世日子不詳,只知道喺猴年年尾,即1920年。後來佢喺新加坡讀中學時,就自定第一次世界大戰歐戰休戰日,11月11號做佢自己嘅生日,佢喺自傳中話係因為當日街上多慶祝活動 [1]

早年生活[編輯]

陳立僑本身係婆羅洲沙勞越出世嘅華僑、自幼俾父母交由衛理公會撫養成人,後來得到教會獎學金送去美國留學,學成成為醫生,俾教會派返沙勞越行醫,然後喺1961年底,應岳父要求,嚟咗香港,並喺呢度過咗三十年。

社運生涯[編輯]

醫療衛生[編輯]

廿世紀六十年代佢初到香港,受到當時大量內地移民來港嘅貧困情況所感動,立志走入貧窮人群,開設平民化診所同為窮人四出奔走。佢重創立咗而家已經非常普及嘅社區保健,又首先提倡實行美沙酮戒毒治療服務,並且推廣針炙治療同鼓吹中西醫結合。

民主公義[編輯]

佢喺1971年3月3號曾經參選過市政局選舉,以「通過調查研究和行動尋求真理」做競選主題,但係輸咗,做唔成議員。嗰屆當選者有葉錫恩(Elliott, Elsie)、黃夢花楊勵賢(革新會)、公民協會嘅冼祖昭張有興。落選者包括馬超常黃博度(革新會)、公民協會嘅李啟勳鄒偉雄 [2]

同時,佢亦曾經領導草創期嘅基督教工業委員會(基工會)、靈實醫院循道衛理楊震社會服務處。喺六十年代,佢係基工會主任馮偉文嘅家庭醫生,受馮所託,係六七暴動後擔任基工會主席填補領導真空,同馮偉文劉千石等,喺爭取勞工權益之餘,亦發起反對增加電話費等反加價運動,並且喺七十年代末聲援油蔴地艇戶同金禧學潮 [3]。陳做基工會主席期間,以信任職員,支持職員自由發揮嘅模式領導,令基工會茁壯成長成為而家香港一個重要嘅勞工團體。[4]1979年,當時做緊記者嘅劉慧卿訪問過佢。[5]

八十年代初,中英就香港前途問題訂立《中英聯合聲明》。1984年,佢同杜學魁馮檢基馮可立李植悅組成民間代表訪問團,向英國國會遊說,要求俾香港人就中英聯合聲明進行全民公決,與當時保守黨後排議員,前首相希思會面 [6]。1986年,香港民主民生協進會成立,佢被推舉做首任主席,後來成為香港立法會議員嘅馮檢基李永達當時分別做佢副手,出任副主席。

環保運動[編輯]

佢曾經喺1973年做過香港第一個環保團體長春社嘅主席(及後更成為會長)。佢當年因串連九龍塘一群外藉居民同長春社一齊反對啟德夜航,識到長春社領導人之一嘅 John H. Pain;之後佢被邀請做主席,領導反對蜆殼公司喺南丫島起煉油廠同油庫,兼且推動以大學生為目標嘅環保教育工作,喺呢個方針下,培養出唔少第一代土生土長嘅環保領袖。另外,當年重做緊《虎報》記者嘅司徒蓮(Siddal, Linda)喺某次公開論壇嘅場合採訪陳立僑時,識到佢嘅好朋友列顯倫(Litton, Henry)。最終同列顯倫結為夫婦,而司徒蓮後來亦創辦咗另一個環保組織—香港地球之友 [7]

陳立僑嘅環保主張,可見於佢係長春社刊物《協調》上寫嘅文章:

「青䓤的山嶺,翠綠的原野,清徹的溪流,新鮮的空氣,這是自然的韻律。

這種韻律,能使我們生活和諧。

但隨著急劇轉變的工業化,這種和諧,已遭破壞無遺。

這是全球工業化國家的難題,本港亦不例外。今日,我們所居住的附近環境,正遭遇空前的染污所破壞,我們新界明澈的溪瀾堆滿了垃圾,我們的港海日漸污染,我們的海產包含毒質,我們的海灘難以游泳。我們不單有充滿廢氣的空氣,更有刺人欲聾的嘈音。

我們生存的和諧韻律,已給工業的發展,打上了一個無限長的休止符。

倘若情勢繼續發展,我們的下一代,將難以有健康的休憩之所。

為此,香港保護自然景物協會 [8][9],乃於三年前創立,目的是盡可能,保護自然的和諧。軔創之始,主其事者多非本地人仕,港人對環染污此一大問題,顯未曾給予適當之注意。

香港為一華人城市,居住環境境之好壞,息息相關。對自然景物之保護,責無旁貸。

為了下一代的生存,我們有責任防止空氣,食水,食物和景物的染污。

這份刊物的創辦,除了使港對能己的責任有所了解外,亦希望通過了解的途徑,而促致行動[10]。」

退休生活[編輯]

退休後嘅陳醫生簡居於美國加州三藩市。退休後,佢嘅生活仍然保持過往嘅平實同簡樸。除咗因記憶力稍退而要請管家協助家居生活之外,佢所住嘅係平常嘅住宅、着嘅係超級市場買返嚟嘅衫、食嘅係又平又簡單嘅素菜、代步嘅係最普通嘅日本小房車、最佳嘅消閒係揸車到附近墳場思念亡妻同去超級市埸逛街做運動。

佢喺2008年6月24號響美國三藩市病逝,享年87歲。[11]

家庭[編輯]

  • 爸爸:陳天根
  • 媽媽:吳玉愛
  • 兄弟姐妹:大家姐陳立芬(1913 –?)、二哥陳立才(1914 – 1940)、細佬陳立遠(11歲時夭折)
  • 老婆:陳蕙蘭
  • 仔女:陳錫慧(Ding, Vivian)、陳錫靈(Ding, Mary May)、陳錫恩(Ding Grace)、孻仔陳錫麟(Ding, Luke)
  • 女婿:Michael Woodman, Dr. Soroosh Firoozan
  • 媳婦:森英子
  • 孫:Anthony, Allison, Oliver

自傳[編輯]

馮斌嶽著(2001),《走出陰影—陳立僑的生平和時代》,循道衞理楊震社會服務處出版

基金[編輯]

Dr & Mrs L.K. Ding Charitable Foundation in memory of Mr & Mrs James M. Hoover, 基金通訊地址:香港郵政信箱2247號

[編輯]

  1. 陳立僑自傳第一至第五章
  2. 嶺南大學香港選舉資料庫
  3. 陳立僑自傳第十六章
  4. 工人權益網:主題論述—教會與工運
  5. 新聞檔案 2012-10-25
  6. 陳立僑自傳第十七章
  7. 陳立僑自傳第十七章
  8. 長春社係廿世紀七十年代別稱
  9. 景物,解作風景或風貌。《洛陽名園記》有云:「獨富鄭公園最為近闢,而景物最勝。」
  10. 《協調》第一卷第一期,一九七三年三月,香港保護自然景物協會、青年環境行動組季刊
  11. HK's 'grandfather of democracy' dies at 87[失咗效嘅鏈]

出面網頁[編輯]