中華民國陸軍軍官學校
(由陸官跳轉過嚟)
| 中華民國陸軍軍官學校 | |
|---|---|
 校旗 | |
| 類型 | 國立軍事院校 |
| 校訓 | 親愛精誠 |
| 校歌 | 中央軍事政治黨校校歌 |
| 成立 | 1924年6月16號 |
| 校長 | 張捷（少將） |
| 學系 | 9 |
| 校址 |  中華民國高雄市鳳山區維武路1號 |
| 網站 | http://www.cma.edu.tw |
| 聯絡電話 | 07-7462151 |
中華民國陸軍軍官學校（簡稱陸軍官校、陸官）係中華民國國立軍事院校，隸屬中華民國國防部，宗旨係培養中華民國陸軍嘅軍官。軍校1924年喺廣州黃埔港長洲島創立，所以又叫黃埔軍校；1949年後轉咗去臺灣鳳山辦學。
陸軍軍官學校有四個歷史時期，分別係：黃埔時期（1924年～1927年）、南京時期（1928年～1936年）、成都時期（1937年～1949年）同鳳山時期（1950年～而家）。學校初時叫中國國民黨陸軍軍官學校，係當時中國國民黨嘅黨校。1927年，搬去中華民國首都南京，隸屬國民政府，改名叫中央陸軍軍官學校。1937年，中國抗日戰爭爆發，走難搬咗去成都。1946年，陸軍官校因應軍隊國家化改名叫中華民國陸軍軍官學校，個名一直用到而家。1949年，中華民國政府喺國共內戰輸咗畀中國共產黨，12月7號正式公告政府搬去臺灣，幾日後爆發成都戰役，軍校校園連同成都市成個一齊畀解放軍佔領咗，正式解散。1950年，陸軍官校喺臺灣復校，揀咗1947年喺高雄鳳山成立嘅陸軍軍官學校臺灣訓練班嘅場地做校址。
中華民國統治大陸時期，陸軍官校出咗好多軍事人才，大部份嘅畢業生都打過北伐、中原大戰、抗日戰爭同國共內戰等嘅仗。復校臺灣之後，陸軍官校畢業生主要任務係保障臺海安全[1][2]。