陸軍士官學校
陸軍士官學校，簡稱陸士、士官學校，係一間培養大日本帝國陸軍現役兵科軍官嘅軍事院校。由於日文當中軍官稱為「士官」，所以得到呢個名。
學校概覽
[編輯]學校介紹
[編輯]
陸軍士官學校之目的，乃培養未來成為帝國將校之人才
(陸軍士官學校󠄁敎育ノ目的󠄁ハ、帝󠄁國陸軍ノ將校󠄁ト爲ルベキ者󠄁ヲ養󠄁成󠄁スルニアリ)
– 『陸軍士官學校教育綱領』
陸軍士官學校係大日本帝國陸軍裡面專門負責培養現役兵科軍官嘅學校。喺大日本帝國陸軍裡面，「現役」嘅定義其實係等同於職業軍人，屬於當時日本兵役制度裡面嘅一個重要組成部分。而「兵科」嘅定義即係喺前線上戰場嘅軍人，譬如係步兵、騎兵、炮兵呢啲直接要上戰場面對住敵人嘅，都係歸類為「兵科」。而同「兵科」相對嘅呢，就係「各部」。屬於「各部」嘅軍人基本上唔到最後關頭都唔使上戰場殺敵，佢哋主要負責全個軍隊嘅後勤、禮儀、行政、庶務等等嘅嘢。所以，陸軍士官學校培養嘅都係名符其實上戰場嘅指揮官。而「士官」呢個詞語，喺大日本帝國陸軍裡面，其實就等於「尉官」咁解。喺1937年(昭和十二年)，陸軍省頒佈咗《陸軍武官官等表》（昭和十二年第12號敕令），喺裡面明確咁用「士官」代表「尉官」、「上長官」代表「佐官」，而「將官」就維持原本嘅稱呼。所以總結起上嚟，陸軍士官學校其實就係一間培養負責作戰任務嘅陸軍尉官嘅學校。
陸軍士官學校嘅正式學生叫做士官候補生，佢哋未來喺畢業後將會成為帝國陸軍嘅核心。除咗佢哋之外，陸軍士官學校仲會接受現役嘅准尉、士官、一般士兵，以及預備役嘅軍官報讀，佢哋會被稱為「學生」。而喺學校歷史上，外國派遣過嚟日本留學讀軍校嘅留學生亦都唔少（#士官候補生以外嘅學生）。
學校嘅三大分支:「陸士」、「航士」、「預士」
[編輯]喺經歷完帝國陸軍嘅初創期之後，陸軍士官學校嘅教育制度同舊制學校嘅教育制度基本上相對。當時嘅陸軍士官學校分為咗本科同預科兩部分，而佢哋嘅教育內容亦都係完全唔同嘅（#教育課程）。1937年(昭和十二年)，校方以學生人數過多為由，將原本嘅預科由陸軍士官學校裡面獨立出嚟，成為陸軍預科士官學校。而喺同一時期，由於陸軍方面希望增加對現役航空科軍官嘅相關航空訓練，所以將本科嘅航空科課程分拆咗出嚟，以「陸軍士官學校分校」嘅名義獨立自成一校。呢間學校後嚟就改名做陸軍航空士官學校。三間學校分別簡稱「陸士」、「預士」、「航士」，雖然係三間唔同嘅學校，但係仍然維持住某種程度嘅上下隸屬關係。
除咗上面提及嘅三大分支之外，下面提及嘅呢幾間軍事院校同陸軍士官學校都有一定程度嘅上下隸屬關係:
- 陸軍幼年學校(陸幼): 喺1920年代陸軍士官學校嘅本科同預科制度確立咗之後，陸軍
幼年學校就成為咗陸軍士官學校教育制度中相等於當時中學嘅學校。陸幼招收嘅
學生都係13歲以上，15歲以下嘅男仔，按照當時嘅學制，呢啲男仔最細嘅啱啱喺小學
畢業，最大嘅已經中學二年級。呢啲學生由年紀細細嗰陣就接受嚴格嘅軍事訓練，日後先後升上陸軍士官學校預科，再上本科，成為一個純粹嘅職業軍人。
- 陸軍大學校(陸大): 陸軍大學校係一間培養參謀人才嘅高等教育院校，佢每年都會定期招收介乎少尉到中尉嘅現役軍官入去深造，畢業後就會分派去唔同地方做參謀。由於呢間學校重視培養學生嘅戰略能力，亦都成為日本陸軍晉升做將官嘅必經之路。而陸軍士官學校嘅畢業生如果想晉升到一啲重要嘅職位，或者有志於成為指揮幾萬人嘅將軍，就需要考入呢間學校。
- 陸軍經理學校(陸經): 陸軍經理學校係一間培養現役陸軍經理科軍官嘅學校，佢參考咗陸軍士官學校嘅制度，喺1935年引入咗「經理科士官候補生」制度。喺陸軍內部嘅制度上，佢同陸軍士官學校屬於同一個級別。
- 滿洲國陸軍軍官學校: 滿洲國陸軍軍官學校係滿洲國軍培養現役陸軍軍官嘅學校，佢內部嘅一切制度同訓練方式都喺日籍軍事顧問嘅影響下變得幾乎同陸軍士官學校一模一樣。喺呢間學校裡面嘅日籍學生有部份會返日本本土升讀陸軍士官學校預科，而成績優異嘅滿人、蒙古人或者朝鮮人都有機會得到編入日本陸軍士官學校留學嘅機會。
學校嘅俗稱:「市谷臺」、「相武臺」、「修武臺」、「振武臺」
[編輯]最初，其實陸軍士官學校嘅俗稱「市谷臺」其實就係由於學校校舍就位於東京都市谷嘅一座丘陵上面。係日文佢地會叫呢啲丘陵做「台地」，所以陸軍士官學校嘅學生就順理成章咁將自己嘅學校叫做「市谷臺」。但係喺1937年（昭和十二年)，陸軍士官學校本科、預科同屬於本科嘅航空科分拆咗成為三間學校(#學校嘅三大分支:「陸士」、「航士」、「預士」)。原本嘅本科仍然沿用「陸軍士官學校」呢個校名，但係就搬出咗東京，去咗神奈川縣座間嗰度。喺當年嘅畢業禮，學校邀請咗昭和天皇親自出席觀禮同埋為在校品學兼優或者成績好嘅同學親自頒獎，而天皇喺得知陸軍士官學校搬咗之後就冇咗個俗稱，所以佢本人以學校所在地嘅古稱「相模國」民風尚武，培養出唔少第一流嘅武士，授予學校俗稱「相武臺」，以勉勵陸軍士官學校嘅學生努力習武同學習軍事知識，報效國家。預科同本科航空科就分別搬咗去埼玉縣入間同埋埼玉縣朝霞，為咗保留返原本陸軍士官學校喺東京嗰陣嘅傳統，呢兩間學校亦都分別邀請天皇親自觀禮，並且為兩校親自命名為「修武臺」(修練武藝嘅台地)同埋「振武臺」（提振尚武嘅風氣嘅台地），所以就因此得到咗獨一無二嘅俗稱。
受到陸軍士官學校嘅影響，其他日本陸軍系統嘅軍事院校都先後改咗個相似嘅俗稱，譬如陸軍經理學校嘅「若松臺」、東京陸軍幼年學校嘅「健武臺」、仙台陸軍幼年學校嘅「三神峯臺」、名古屋陸軍幼年學校嘅「觀武臺」、大阪陸軍幼年學校嘅「千代田臺」、廣島陸軍幼年學校嘅「鯉城臺」、熊本陸軍幼年學校嘅「清水臺」都係出名嘅例子，甚至遠在東北嘅滿洲國陸軍軍官學校都幫自己學校改咗個俗稱叫「同德臺」。
喺陸軍士官學校離開咗市谷臺之後，呢片土地就交咗俾陸軍省、參謀本部、教育總監部同埋陸軍航空總監部使用，呢四個日本陸軍重要嘅部門合稱「省部」，佢哋嘅入駐亦都令市谷臺成為當時日本陸軍嘅指揮中樞。喺二次大戰完咗之後，日本陸軍被勒令解散，而呢片土地亦都由美軍接管，然後移交俾自衛隊使用。
教育
[編輯]教育綱領
[編輯]陸軍士官學校之目的，乃培養未來成為帝國將校之人才。
軍官是軍紀、軍心和軍人精神的本源，也是國家活力的核心
因此，本校在培養學生時，必須特別注意以下幾點:1. 培養尊皇愛國的情操
2. 培養軍事知識和活力
3. 培養健康的體魄
4. 教導知識及培養文化修養
以上便是本校教育的概要。
教育負責人應竭盡所能，盡心盡力，確保教學與訓練融為一體，使教育得以完成。
(陸軍士官學校󠄁敎育ノ目的󠄁ハ、帝󠄁國陸軍ノ將校󠄁ト爲ルベキ者󠄁ヲ養󠄁成󠄁スルニアリ
抑々将校ハ、軍隊ノ楨榦、軍人精神及軍紀ノ本源ニシテ、マタ一国元気ノ枢軸タリ
故ニ、本校ニ於テハ、特ニ左ノ件ニ留意シテ教育スルヲ要ス
一 尊皇愛国ノ心情ヲ養成スルコト
ニ 軍人タルノ思想ト元気トヲ養成スルコト
三 健全ナル身体ヲ養成スルコト
四 文化ニ資スルノ知識ヲ養成スルコト
以上示ス所ハ、実ニ本校教育ノ要綱ナリ
教育ノ任ニ当ル者ハ、奮励其ノ力ヲ竭シ、至誠其ノ身ヲ致シ、教授訓育ノ両部、互ニ相連絡シテ一体ト成リ、以テ教育ノ完成ヲ期スベシ)
– 『陸軍士官學校教育綱領』(1932年(昭和七年)版)
教育課程
[編輯]陸軍士官學校嘅教育課程主要可以分為本科同預科兩個部分。預科嘅課程會較為集中係學科嘅知識之上，而本科就會集中係術科，即係軍事教育嘅部分。
預科
[編輯]預科嘅學科教育課程其實等同於當時嘅舊制高等學校，以1932年(昭和七年)為例，當時嘅士官候補生需要修讀修身、國語(即係日文)、漢文、歷史、數學、化學、物理、地理、心理、倫理、法制、經濟、圖畫等科目。除此以外，呢啲士官候補生仲要喺英文、中文、法文、德文同俄文五種外文裡面揀一種修讀。呢啲學科課程基本上都會由陸軍文官出身嘅「教授部」教官負責。
而喺術科方面，1932年(昭和七年)嘅士官候補生會係現役軍官出身嘅「訓育部」教官嘅教導下，學習基本教練、軍中行政(日文叫陣中勤務)、射擊、劍道、體操、柔道、馬術、訓話、內務指導等一系列課程，培養佢哋嘅基礎軍事能力。除此以外，學校仲會定期舉行露營訓練同泳術訓練，令士官候補生得到更全面嘅訓練。
本科
[編輯]相比起預科，本科嘅課程更着重培養士官候補生嘅軍事知識同能力，所以喺教學上，術科所佔嘅比重就會明顯多過學科。喺1932年(昭和七年)，當時嘅士官候補生需要學習戰術學、戰爭史、軍制學、兵器學、射擊學、航空學、築城學、交通學、測量及讀圖學、馬術、衛生學、教育學、校內外教練、軍中行政(上述嘅陣中勤務)、射擊、劍道、柔道、體操、撰寫軍事命令等術科，而學科就得返外文一科。而同預科時期一樣，學校亦都會提供唔同嘅訓練以拓寬士官候補生嘅眼界，譬如戰術演習、露營訓練、讀圖訓練，甚至有部隊參觀。
學校地位
[編輯]校史
[編輯]學校文化
[編輯]歷任校長
[編輯]陸軍兵學頭
[編輯]| 任數 | 任期 | 相片 | 姓名及軍銜 | 備註 |
|---|---|---|---|---|
| 第1任 | 1872年(明治五年)4月4日-1873年(明治六年)5月18日 |  | 鳥尾小彌太少將 | |
| 第2任 | 1873年(明治六年)5月18日-1875年(明治八年)5月9日 |  | 曾我祐準少將 |
陸軍士官學校校長
[編輯]| 任數 | 任期 | 相片 | 姓名及軍銜 | 備註 |
|---|---|---|---|---|
| 第1任 | 1874年(明治七年)10月22日-1878年(明治十一年)12月19日 | | 曾我祐準少將 | |
| 第2任 | 1878年(明治十一年)12月19日-1880年(明治十三年)4月29日 |  | 大山巖少將 | 後來歷任陸軍大臣、陸軍參謀總長，元帥之一 |
| 第3任 | 1880年(明治十三年)4月29日-1881年(明治十四年)10月27日 |  | 谷干城少將 | |
| 第4任 | 1881年(明治十四年)10月27日-1882年(明治十五年)2月6日 |  | 小澤武雄少將 | |
| 第5任 | 1882年(明治十五年)2月6日-1885年(明治十八年)5月21日 |  | 三浦梧樓少將 | |
| 第6任 | 1885年(明治十八年)5月21日-1885年(明治十八年)7月26日 | | 小澤武雄少將 | |
| 第7任 | 1885年(明治十八年)7月26日-1886年(明治十九年)9月30日 | | 曾我祐準少將 | |
| 第8任 | 1886年(明治十九年)9月30日-1887年(明治二十年)6月6日 |  | 滋野清彥少將 | |
| 代理 | 1887年(明治二十年)6月6日-1887年(明治二十年)11月16日 |  | 寺內正毅步兵中佐 | 後來歷任陸軍大臣、朝鮮總督及內閣總理大臣 |
| 第9任 | 1887年(明治二十年)11月16日-1891年(明治二十四年)6月13日 | | 寺內正毅步兵大佐 | 後來歷任陸軍大臣、朝鮮總督及內閣總理大臣 |
| 第10任 | 1891年(明治二十四年)6月13日-1892年(明治二十五年)11月22日 |  | 大久保春野步兵大佐 | 後來歷任韓國駐節軍司令 |
| 第11任 | 1892年(明治二十五年)11月22日-1896年(明治二十九年)9月25日 |  | 波多野毅步兵大佐 | |
| 第12任 | 1896年(明治二十九年)9月25日-1897年(明治三十年)9月28日 |  | 安東貞美步兵大佐 | 後來歷任臺灣總督 |
| 第13任 | 1897年(明治三十年)9月28日-1898年(明治三十一年)1月14日 | .jpg) | 中村雄次郎少將 | 後來歷任宮內大臣 |
| 署理 | 1898年(明治三十一年)2月18日-1898年(明治三十一年)12月23日 | | 寺內正毅少將 | 後來歷任陸軍大臣、朝鮮總督及內閣總理大臣 |
| 第14任 | 1898年(明治三十一年)12月23日-1905年(明治三十八年)6月14日 |  | 高木作藏步兵大佐 | 任期內於1892年9月8日晉升少將 |
| 第15任 | 1905年(明治三十八年)6月14日-1911年(明治四十四年)9月6日 |  | 南部辰丙少將 | |
| 第16任 | 1911年(明治四十四年)9月6日-1912年(大正元年)11月27日 | 野口坤之少將 | ||
| 第17任 | 1912年(大正元年)11月27日-1915年(大正四年)2月15日 |  | 橋本勝太郎少將 | |
| 第18任 | 1915年(大正四年)2月15日-1919年(大正八年)1月15日 | 與倉喜平少將 | ||
| 第19任 | 1919年(大正八年)1月15日-1920年(大正九年)8月10日 |  | 白川義則中將 | 後來歷任陸軍大臣，1932年在上海虹口公園爆炸事件中身亡 |
| 第20任 | 1920年(大正九年)8月10日-1921年(大正十年)3月11日 | .jpg) | 安滿欽一少將 | 後來歷任航空本部長 |
| 第21任 | 1921年(大正十年)3月11日-1922年(大正十一年)8月15日 |  | 鈴木孝雄少將 | |
| 第22任 | 1922年(大正十一年)8月15日-1923年(大正十二年)10月10日 |  | 津野一輔少將 | |
| 第23任 | 1923年(大正十二年)10月10日-1924年(大正十三年)8月20日 |  | 南次郎少將 | 後來歷任朝鮮軍司令、陸軍大臣、關東軍司令及朝鮮總督 |
| 第24任 | 1924年(大正十三年)8月20日-1926年(大正十五年)3月2日 | 宮地久壽馬中將 | ||
| 第25任 | 1926年(大正十五年)3月2日-1927年(昭和二年)8月26日 |  | 真崎甚三郎少將 | 任期內於1927年3月5日晉升為中將，後來歷任教育總監，因牽涉二二六兵變而被革職 |
| 第26任 | 1927年(昭和二年)8月26日-1929年(昭和四年)8月1日 |  | 林仙之少將 | |
| 第27任 | 1929年(昭和四年)8月1日-1931年(昭和六年)8月1日 |  | 坂本政右衛門少將 | |
| 第28任 | 1931年(昭和六年)8月1日-1932年(昭和七年)5月23日 |  | 瀨川章友少將 | |
| 第29任 | 1932年(昭和七年)5月23日-1934年(昭和九年)3月5日 |  | 稻垣孝照少將 | 任期內於1933年3月18日晉升為中將 |
| 第30任 | 1934年(昭和九年)3月5日-1935年(昭和十年)12月1日 |  | 末松茂治中將 | |
| 第31任 | 1935年(昭和十年)12月1日-1937年(昭和十二年)3月1日 |  | 山田乙三中將 | 後來歷任華中派遣軍司令及關東軍末代司令 |
| 第32任 | 1937年(昭和十二年)3月1日-1938年(昭和十三年)6月18日 |  | 篠塚義男中將 | |
| 第33任 | 1938年(昭和十三年)6月18日-1940年(昭和十五年)10月28日 |  | 山室宗武中將 | |
| 第34任 | 1940年(昭和十五年)10月28日-1941年(昭和十六年)6月20日 |  | 土肥原賢二中將 | 戰後被列為甲級戰犯，參與東京大審 |
| 第35任 | 1941年(昭和十六年)6月20日-1942年(昭和十七年)7月1日 | | 篠塚義男中將 | |
| 第36任 | 1942年(昭和十七年)7月1日-1944年(昭和十九年)8月8日 |  | 牛島滿中將 | |
| 第37任 | 1944年(昭和十九年)8月8日-1945年(昭和二十年)3月19日 | | 山室宗武中將 | |
| 第38任 | 1945年(昭和二十年)3月19日-1945年(昭和二十年)8月15日 |  | 北野憲造中將 | 陸軍士官學校末代校長 |