雅各與以掃
雅各與以掃（英文：Jacob and Esau）係希伯來聖經《創世記》入便嘅故事。雅各同以掃係一對孖生兄弟，以撒為父，利百加為母，亦即係話佢哋係亞伯拉罕同撒拉嘅孫。大仔以掃身形魁梧，係個獵人，細仔雅各就性格內斂，溫文有禮。爾個故事講到以掃因為肚餓，為咗一碗湯就將長子名份賣俾雅各，及後雅各喺母親利百加嘅幫助下，假扮成以掃得到父親嘅祝福。以掃一度怨恨雅各，但最終兄弟重修舊好。喺猶太教傳統之中，爾個故事係上帝應許嘅一部份，亦反映古時猶太人對其民族起源嘅理解。
背景
[編輯]以掃同雅各係希伯來聖經《創世記》一書提到嘅孖生兄弟，佢哋阿爸係以撒，阿媽係利百加，亦即係話佢哋係亞伯拉罕同撒拉嘅孫。
根據聖經記載，利百加一開始懷胎嗰陣，就覺得肚入面嘅兩個仔好似喺度互相搏鬥噉，而上帝喺異象中同利百加講，話爾兩兄弟第時會各產生一個民族，而且阿哥要服事弟弟。等到生產嘅時候，以掃率先出世，而弟弟出世嗰陣手仲捉住哥哥嘅腳踭，因而得名雅各，呢個名原意據講係腳踭噉解。
聖經講到，兩兄弟無論外形定係性格都有明顯差異：以掃渾身多毛，皮膚發紅，外貌粗獷，大個咗就成為勇猛嘅獵人。相比之下，雅各身體冇乜毛，份人比較文靜內斂，鍾意留喺帳棚入面。猶太傳統一般認為[註 1]，以撒比較鍾意以掃，而利百加就比較鍾意雅各[1]。
長子名份
[編輯]兄弟衝突，始於創世記第 25 章。話說有一次以掃打完獵返到屋企，覺得非常肚餓，咁啱雅各喺度煲緊湯，以掃就開口話想食嘢。雅各乘機提出，如果以掃願意將長子名份[註 2]賣出，就俾碗湯佢飲。以掃當時太肚餓，就一口答應，仲話：
- 「我都餓到就嚟死，長子名份有咩用？」
就係噉，以掃為咗一碗湯，將本應屬於長子嘅權利讓俾細佬[2]。根據聖經記載，及後以掃做咗更多令上帝不悅嘅事，包括係唔理上帝旨意，娶咗兩個在地嘅女子為妻，而呢兩個女子同老爺奶奶不和[3]。
除咗唔重視長子名份，某啲猶太傳統故事仲有講到以掃嘅種種不是[註 1]：根據傳統，雅各當時煲湯係為咗悼念當日過身嘅祖父亞伯拉罕[註 3]；而當日以掃賣名份之餘仲犯咗罪，包括係污辱當地一名婦女，對祖父非常不敬。
祝福之爭
[編輯]
創世記第 27 章講，以撒年紀日趨老邁，雙眼唔係好睇到嘢[註 4]，諗住將其臨終祝福賜俾長子以掃。然後，以掃聽父親嘅說話出去打獵，用打獵得到嘅肉做禮物俾父親。同時以撒嘅老婆（以掃同雅各之母）利百加暗中聽到。利伯加醒起上帝嘅旨意係想雅各做族長，就叫雅各假扮成哥哥，去攞父親嘅祝福。雅各起初有啲猶豫，但最後聽母親吩咐，假扮成以掃去見父親。
以撒雖然覺得有啲懷疑，但最終仍然將祝福賜俾雅各。以掃返嚟得知發生咗乜嘢事，就非常震怒，仲大聲痛哭，向父親要求祝福。但以撒已經將主嘅祝福交咗俾雅各，只能賜以掃一份次要嘅祝福。自此之後，以掃心生怨恨，發誓要殺死雅各，利百加於是就安排雅各離家，到利百加嘅阿哥（兩兄弟嘅舅父）拉班嗰度暫避[4]。
兄弟和好
[編輯]
雅各離鄉後，服侍舅父拉班成二十幾年咁耐，期間娶咗舅父嘅兩個女做妻室，同兩位老婆育有多個仔女。而且雅各因為勤勞而事業有成，最後變得仲有錢過舅父。多年後，佢喺上帝嘅指引下帶住妻兒同僕人返家鄉，心入面非常驚惶，驚以掃會記恨報復。
雅各去見以掃嘅途中仲發生咗一段小節，講到雅各同上帝嘅使者摔角。雅各撞到髖骨骹都甩埋，但佢仍然堅持繼續打，最後獲上帝賜名叫以色列[註 5]－呢個名意思大致係同上帝搏鬥嘅人噉解。
創世記第 33 章記載，雅各分開妻兒僕婢，另一方面自己先行一步去見以掃，同時派人表示謙卑同贈以厚禮。及後，以掃帶住四百人前嚟，佢見到多年冇見嘅細佬，又見到細佬送嘅厚禮，最後佢並冇動武，反而係上前去擁抱雅各，兩兄弟抱頭痛哭。最後，以掃卒之原諒雅各，兩兄弟和好返[5]。
其後，雅各帶住家眷搬咗去示劍城住，詳情可以睇睇佢個女底拿相關嘅故事，亦可以睇埋再後期啲，若瑟相關嘅故事。
此後，兩兄弟仲有接觸。例如創世記第 35 章有記載，兩人喺父親過身嗰時有再見面，仲一齊安排埋父親嘅喪事[6]。
宗教評論
[編輯]呢個故事體現咗天主嘅智慧—即係由惡帶出善嘅智慧。全能嘅天主由一開始，就揀選咗雅各做佢應許嘅承繼人。人嘅錯失（譬如以撒偏愛以掃、雅各行詐）都改變唔到佢所命定嘅事；相反，喺天主嘅引導之下，呢啲錯失反而成為成就佢旨意嘅方法，尤其係雅各因為佢嘅詭詐而承受後果—長期流亡同埋受到舅父奴役，最後令佢更堅定信靠天主，亦藉此得到煉淨。透過呢啲經歷，佢喺謙卑同虔敬上堅固，接受訓練，成為一個屬天主嘅聖人，一個配得上應許嘅人。
傳統上喺拉比嘅教導中，上帝揀選雅各想雅各擔任族長，係有理由嘅：以掃為咗一碗湯就放棄名份，反映佢為人輕率衝動，而且唔重視神賜嘅長子地位，事實係創世紀第 25 章第 34 節嗰度提到話以掃唔珍惜佢嘅長子長子名份；同時雅各縱使係有少少狡詐，但係佢嘅舉動唔違法，而且反映佢識睇大局同埋有遠見過佢阿哥，更適合賦予長子之名，俾佢將來做一族之長。亦有種睇法話，上帝係教導人選擇領袖嗰陣，寧可揀有些微狡詐但有遠見嘅人，都唔好揀草率短視嘅人[8]。
利百加同雅各欺騙以撒，亦引起討論：就噉睇，兩母子嘅行為係喺度呃緊屋企人，但猶太教同基督教都有傳統指出，件事唔可以單純視為惡行；由於上帝早喺雅各出世前就啟示咗利百加，話身為次子嘅雅各要做承繼人，所以利百加嘅行為可以理解為係喺度確保上帝嘅應許實現；而依個諗法，亦被指係帶出一點－為咗顧全大局，人有陣時需要做出一啲「惡行」，縱使呢啲行為喺正常情況下會屬於中至輕度嘅惡行[9]。
睇睇
[編輯]- 該隱與亞伯：都係創世紀講到嘅兄弟衝突。
註釋
[編輯]引述
[編輯]- ↑ Jacob and Esau in the Bible.
- ↑ 創世記25章（馬所拉經文：בראשית 25；可以睇埋：基督教和合本：創25、天主教思高本：創二十五）.
- ↑ Genesis 26:34–35
- ↑ 創世記27章（馬所拉經文：בראשית 27；可以睇埋：基督教和合本：創27、天主教思高本：創二十七）.
- ↑ 創世記33章（馬所拉經文：בראשית 33；可以睇埋：基督教和合本：創33、天主教思高本：創三十三）.
- ↑ 創世記35章（馬所拉經文：בראשית 35；可以睇埋：基督教和合本：創35、天主教思高本：創三十五）.
- ↑ Knecht, Friedrich Justus (1910). "A Practical Commentary on Holy Scripture, XV. Esau and Jacob". A Practical Commentary on Holy Scripture. B. Herder.
- ↑ Elazar n.d.
- ↑ Parshat Toldot: Rebecca's Choice – Deception for the Sake of Heaven.
參考文獻：
- Elazar, Daniel J. (n.d.). "Jacob and Esau and the Emergence of the Jewish People". Jerusalem Center for Public Affairs. 喺11 February 2021搵到.
拎
[編輯]
- （英文）聖經中嘅雅各同以掃，留意唔少猶太傳統都好似爾篇文噉，將以掃描寫成負面嘅形象。