雅息特

出自維基百科,自由嘅百科全書
雅息特徽章
由左上角順時針方向:雅息特大教堂; 雅息特鐘樓; 德文郡政府; 大教堂坊; 鐵橋
雅息河畔
雅息特既位置

雅息特(英文:Exeter,讀音:/ˈɛksɪtər/) 係一座大教堂城,亦係英格蘭西南(South West England)德文郡(Devon)既郡城。雅息特係喺雅息河畔,市中心同舊城區(羅馬/中世紀城牆遺址內)喺河既東岸,河既西岸係雅息特既聖湯馬斯(St. Thomas)區。雅息特喺西南部最大城市碧仙桃(Bristol)既西南方,距離大約係65英里(105公里);喺西南部第二大城市普利茅夫(Plymouth )既東北方,距離大約係36英里(58公里)。

喺羅馬不列顛(Roman Britain)時代,雅息特係維斯帕先(拉丁文:Vespasiānus,羅馬帝國既第九位皇帝,喺69年到79年在位)親自指揮既柯格斯塔第二軍團既基地。 雅息特係中世紀既宗教中心,雅息特大教堂喺11世紀中起好,喺16世紀英國宗教改革既時候,成為英國聖公會既大教堂。雖然喺第一次世界大戰時,雅息特衰落咗,但係當時佢仍然係富裕既羊毛貿易中心。 第二次世界大戰之後,市中心既大部分地方俾德軍既報復性轟炸摧毀咗,需要重建,不過大教堂同埋唔少有歷史價值既建築物只係受到輕微既破壞。依家,雅息特係德文郡同歌和老(Cornwall)郡既教育、商業同旅遊中心。

根據2021年既中期人口普查數據 [1],雅息特既人口規模喺過去十年增加咗11.1%,從2011年既大約117,800人增加到2021年既大約130,800人。呢個數字比英格蘭既總體增幅(6.6%)高。而人口年齡既中位數係35歲,係西南部既第二低,只係稍為高過碧仙桃城既34歲,遠低過英格蘭既40歲。原因係,雅息特有兩間學生人數相當高既高等教育學院,其中雅息特大學喺人口普查既同期(即係2021/22年度)有學生32,465人,而雅息特有大約11,000個學生;佔人口33%既高等教育學生,拉低咗雅息特人口既平均同中位數年齡。

個名既來源[編輯]

雅息特既名,Exeter,喺由古代英文 Escanceaster 發展出嚟既,源自雅息河(river Exe)同埋古代英文後綴 「-ceaster」。後綴 「-ceaster」既意思係城堡或者係設防既城鎮,就好似多實郡(英文:Dorset County)既郡府多車士打(Dorchester)城,同埋告羅士打郡(英文:Gloucester County)既郡府告羅士打城一樣。

雅息特既威爾斯文係 Caerwysg,城堡思係「雅息河上面既城堡」(英文:fortress on the Exe)),Exe 呢個名係 Brittonic 名,意思係「水」,或者更確切啲講,「好多魚」(英文:full of fish 或者 abounding in fish)。喺英文,Exe 同 Axe、Esk、威爾斯既 Usk(威爾斯文:Wysg)既意思都係「好多魚」。例如:流經德文郡同多實郡既河叫 River Axe,北約克郡既 River Esk,威爾斯既 River Usk。

歷史[編輯]

史前[編輯]

雅息特最初係喺一個小山脊上面既定居點,山坡既西南面係一條可以俾大船通航既河流,河裏面有好多魚,附近有好肥沃既地。雖然雅息特無發現重大既史前遺跡,但係呢啲優點表明雅息特好早就已經有人住[2]

喺雅息特發現希臘化王國(Hellenistic kingdoms)硬幣,表明最早喺公元前250年,雅息特就同地中海有貿易往來[3]。正如 Julius Caesar 喺佢既評論嗰度描述,呢種早期城鎮係羅馬前既高盧(pre-Roman Gaul)既一個特徵,好可能呢啲城鎮喺不列顛尼亞(英文:Britannia,羅馬帝國對不列顛島既稱呼)。

雅息特西南方郊外既 Dartmoor,喺青銅時代開始既經濟係農業同採礦混合模式[4][5][6][7][8],雅息特可能就喺佢哋既主要市場同埋集散地[9]。註:Dartmoor 係英格蘭西南部德文郡南部,雅息特既西南面既高地,由1951年開始,嗰度係國家公園[10]

據說 Geoffrey of Monmouth(大約1095–1155年)曾經表示,當 Vespasian 喺公元49年圍攻雅息特呢座城市既時候,雅息特既些路迪(Celtic)名係 Kaerpenhuelgoit,意思係「高樹林下山上既城鎮」(town on the hill under the high wood)[11]

羅馬統治[編輯]

公元55年左右,羅馬人建立咗一座佔地42英畝(17公頃)既「啤牌」形(有圓角、兩條短邊同兩條長邊既長方形)城堡(拉丁文:castrum),叫做 Isca。 個城堡係 Fosse Way(安東尼行程既15號路線)既西南終點站,同埋有20年係做擁有五千軍人既第二奧古斯塔軍團(Legio II Augusta)既基地,呢個軍團曾經係由未做羅馬皇帝既維斯帕先(拉丁文:Vespasian)帶領。佢哋之後搬咗去威爾斯既 Caerleon,嗰度都係叫做「Isca」。

Fosse Way 係公元一、二世紀既時候喺英國起既一條羅馬道路,連接西南既 Isca Dumnoniorum(依家既雅息特,德文郡既郡城)同東北既 Lindum Colonia(依家既林肯,林肯郡既郡城)途經 Lindinis(依家既 Ilchester,森麻實郡郡既一條村莊)、Aquae Sulis(依家既巴斯,Bath,森麻實郡既一座城)、Corinium(依家既 Cirencester,告羅士打郡既一個鎮)同 Ratae Corieltauvorum(依家既李斯特城,Leicester)。

雅息特既部分羅馬同中世紀城牆

為咗區分兩個「Isca」,羅馬人將雅息特叫做「Isca Dumnoniorum」(又叫做「Devonian Isca」),「Dumnonii 水城」(Watertown of the Dumnonii)同 Caerleon 叫做「Isca Augusta」。Topsham 仲有一座小堡壘;2010年喺 Topsham Road 附近既 St Loyes 挖到一個喺連接 Topsham 小堡壘同雅息特城堡之間既古道上既補給站[12]

喺起城堡既同時,亦令到附近需要額外起一啲俾當地人同士兵家屬組成既平民社區,叫做 vicus(喺古羅馬,拉丁文 vicus 係指較大定居點附近既村莊)或者 canabae(軍團要塞附近既平民定居點),大部分喺城堡既東北部(例如依家既 St. Sidwell 附近)。呢個定居點係 Dumnonii 人既部落首都(civitas)[13],同埋俾 Ptolemy 喺佢既《地理學》嗰度列做佢哋既四個城市(希臘文:poleis)之一[14](亦都出現喺7世紀既《拉文納宇宙論》(Ravenna Cosmography)嗰度,,佢似乎好明顯係同 Scadu Namorum 混淆咗既條目[15])。當城堡喺公元75年左右俾軍隊放棄之後,嗰度俾人改做民用:嗰度既一個好大既浴場俾人拆咗,改成論壇廣場同宗座聖殿,然後喺東南面起咗一個比較細規模既浴室[16]。1970年代,考古學家係大教堂草坪(Cathedral Green)挖掘過[17][18][19],但係由於靠近依家既大教堂,所以無辦法俾公眾參觀。 2015年1月,雅息特大教堂宣布啟動修復浴室,同埋開放地下中心俾遊客參觀既計劃[20]

公元2世紀尾,舊城堡周圍既溝渠同壁壘防禦工事俾堤岸同城牆取代,而且圍成更大既面積,約 92英畝(37公頃)[21]。雖然大部分依家可以見到既結構都係更古老既,但係羅馬城牆喺之後既一段時間都喺雅息特既城牆,所以大約70%既羅馬城牆依家仍然存在,而且部分仲可以俾遊客行上去[22]。雅息特(當時既 Isca Dumnoniorum)似乎喺四世紀上半葉最繁榮:喺城市既周圍發現咗千幾個羅馬硬幣,而且有證據顯示當時既雅息特周圍既鄉村有銅同青銅加工場、牲畜飼養場、牲畜、農作物同陶器製品既市場[21]。但係,到依家為止,發現既硬幣既年代越後越少,呢點表明;幾乎無發現任何公元380年之後既硬幣[2]

中世紀[編輯]

Rougemont 城堡既門樓

Ussher 主教鑑定咗俾《不列顛歷史》(History of the Britons)列做英國28個城市之一既,Pensa vel Coyt 據點(古威爾斯文:Caer),認為係城壘(Isca)[23][24],雖然 David Nash Ford 將嗰度解讀做 Penselwood(森麻實郡既一條村),又認為佢更可能係更近雅息特既 Lindinis(依家叫 Ilchester,森麻實郡既一條村)[24]。從大約410年羅馬人喺英國撤軍一直到公元7世紀,考古學家對雅息特既認識可以話係幾乎一無所知[25]。 當時,雅息特呢座城市已經俾撒克遜人(Saxons)佔領咗,撒克遜人喺658年喺森麻實郡既 Peonnum,打敗咗頓諾尼亞王國(British Dumnonians,包括依家既德文郡、康和郡同部分既森麻實郡) 之後,到咗雅息特[26]。 撒克遜人似乎保留咗依家既 Bartholomew 街附近(大約係聖尼古拉修道院、鐵橋、Bartholomew 公墓附近)既四分之一個雅息特城堡[27](依家雅息特舊城既西北部分),俾布立吞人(Britons)根據佢哋自己既法律。Bartholomew 街,直到公元1637年都叫 Britayne 街,用嚟紀念嗰度之前既居住者[28]

撒克遜人叫雅息特做 Escanceaster[29]。876年,雅息特俾丹麥維京人攻打同埋短暫佔領。第二年夏天,亞弗列大帝(Alfred the Great,當時係西撒遜國王,佢喺886年做咗「盎格魯-撒遜」(Anglo-Saxon)國王)將佢哋驅逐出英格蘭[30]。喺跟住既幾年,佢將雅息特提升做德文郡既四個城堡之一,同埋重建羅馬城牆[31];依家睇到既城牆其實有啲係羅馬城牆,有啲係中世紀城牆。重建城牆令到呢座城能夠更好咁去抵禦893年丹麥人既另一次攻擊同圍攻[31]。艾塞斯坦國王(King Athelstan,當時既英格蘭國王)喺928年左右再次加固咗城牆,同時將剩餘既英國人趕出咗雅息特[30]。(不過,我哋唔肯定佢哋係喺羅馬時期就一直住喺城裏面,定係喺亞弗列大帝加強防禦既時候喺鄉村返回城裏面。[32])根據馬姆斯伯里既威廉(William of Malmesbury)所講,佢哋俾人送咗去添馬河(River Tamar,普利茅夫既一條河)以外,嗰條河係德文郡同康和郡既邊界。(嗰度亦可能係前頓諾尼亞王國裏面既領土邊界[33]。)其他文獻表明,當時既英國人,可能只係搬咗去依家既聖大衛(St David's),距離雅息特城堡既北牆(依家既 Northernhay)只有大約1公里 。英國人騰出既地方,顯然俾人改建成「伯爵既堡壘」(the earl's burh),嗰度到咗12世紀仍然叫做 Irlesberi[30]。公元1001年,丹麥人又再次攻打雅息特城堡,不過就入唔到城,不過佢哋最終喺公元1003年,佔領咗呢座城,原因係有人俾佢哋入城。准佢哋入城既人喺法國長官諾曼第既愛瑪(Emma of Normandy),雅息特城堡係愛瑪嫁俾「無準備者埃塞爾雷德」(Æthelred the Unready)既部分聘禮[30];結婚之後,愛瑪既「盎格魯-撒遜」名係 Ælfgifu。註:埃塞爾雷德二世(Æthelred II)之所以俾人叫做「無準備者埃塞爾雷德」(古英文:Æþelræd Unræd;現代英文:Æthelred the Unready)係因為佢喺他10歲既時候(實際年齡唔清楚,不過最多唔超過13歲),佢既同父異母哥哥愛德華俾人謀殺咗,所以佢喺毫無準備之下,做咗英格蘭王國國王。喺佢在位期間,丹麥人經常入侵英格蘭。

中世紀雅息橋遺跡,大約係1200年起好[34]
由一個不知名藝術家,喺1870年創作既油畫。呢啲屋後嚟拆咗,塊地用咗嚟起聖 Edmund 教堂。呢幅畫描繪咗雅息河既邊緣,喺舊雅息橋既三個拱門下面流過,橋上同河岸上有屋,左上方可以睇到聖 Edmund 教堂。

諾曼人征服咗英格蘭既兩年之後,雅息特叛亂反抗威廉國王。喺希斯汀戰役(英文:Battle of Hastings)戰死既前任國王哈羅德既老母 Gytha Thorkelsdóttir 當時住喺城裡面,威廉立即向西進軍,發動圍攻。 18日之後,威廉接受咗呢座城既光榮投降(honourable surrender),同埋發誓唔會傷害呢座城市,亦唔會增加佢既貢錢(ancient tribute)。但係,威廉好快就安排喺雅息特既北面建造魯日滿城堡(Rougemont Castle) ,加強諾曼人對雅息特既控制。撒克遜人地主擁有既財產被轉移到諾曼人手中,1072年 Leofric  主教去世之後,Norman Osbern FitzOsbern 被任命做佢既繼任人[35]

1136 年,無政府狀態初期,Baldwin de Redvers 佔領咗魯日滿城堡對抗史蒂芬國王(King Stephen)。Redvers 喺俾國王既軍隊圍困三個月之後就投降咗,投降既原因唔係城堡裏面既三個井乾咗水,而只係因為駐軍用既飲用、烘烤、烹飪既大量葡萄酒用哂[36],加上圍攻者向堡壘掟火把[36]。Baldwin 派咗代表去見史蒂芬國王,應承交出城堡,條件係唔可以殺佢哋。史蒂芬起初唔肯,但係因為自己既軍隊俾佢既壓力,最後都應承咗,俾佢哋離開堡壘。喺圍攻期間,史蒂芬國王係嗰度起咗個土製防禦工事,依家(錯誤咁)俾人叫做丹麥城堡(Danes Castle)[37]

雅息特市早於公元1213年起,每星期都有一次市集;到咗公元1281 年,雅息特係西南諸城之中,唯一每星期舉辦3次市集既城鎮。呢度亦都曾經一年有過七次既年度博覽會既記錄,最早既一次可以追溯到公元1130 年,所有呢啲年度博覽會至少持續到16世紀初[38]

喺1290年英格蘭驅逐猶太人之前,雅息特係英格蘭最西端既猶太社區所在地[39][40]

喺中世紀全盛期,大教堂神職人員同公民都可以用複雜既供水系統,呢啲系統將純淨既飲用水喺鄰近既 St Sidwell(以前嗰度係雅息特隔離既一條村,依家係雅息特既一部分)既泉水引入城市。部分供水系統係通過一個隧道網絡同地下通道進行輸送既,呢啲隧道同地下通道,依家基本上仲係完好無損既,今天仍然可以俾人參觀[41][42][43]

雅息特同碧仙桃主辦咗中世紀英格蘭第一個有記錄既共同委員會(Common Council)[44]; 關於呢個共同委員會既存在同活動既第一個詳細而持續既證據係喺1345年之後發現既[45]。個共同委員會由十二名「更好、更謹慎既人」(拉丁文:duodecim meliores)組成,每年選舉一次,最初既目的係控制同防止少校同佢既四名管家,喺主持區域法院(borough court)同軍事法庭(provost court)既時候,濫用職權。同少校同埋管家一樣,共同委員會既成員都係嚟自同樣既富裕公民精英[46],呢種關係喺市政府機構中,引發咗第二次利益衝突。

現代[編輯]

1563年雅息特既插圖,題為 Civitas Exoniae (vulgo Excester) urbs primaria in comitatu Devoniae

都鐸王朝同史超域王朝[編輯]

1537年,雅息特成為郡級城市。 1549年,雅息特成功抵禦咗所謂既《祈禱書叛軍》(Prayer Book rebels)長達一個月既圍攻:德文郡同康和郡既民眾對愛德華六世國王既激進宗教政策感到憤怒。起義軍佔領咗雅息特郊區,燒咗兩道城門,仲想破壞城牆,但係喺同國王軍隊既一系列血戰當中慘遭失敗之後,最終被迫放棄攻城。然後,好多叛亂分子立即處決咗[47];Heavitree 既 Livery Dole 公屋(almshouses)同教堂(chapel)喺1591年3月開始起,喺1594年完工。 註:喺中世紀,Livery Dole 係處決地點,而 Heavitree 呢個名既來源,一般認為係古英文 heafod-treow(依家既英文:「head tree」),指既係掛罪犯人頭既樹[48],雖然 W. G. Hoskins 提出既另一種解釋係「百人法庭」(hundred court)既聚會場所(meeting place)[49]

喺公元1561年,當 John Hooker 喺市政府打工既時候,佢創立咗孤兒法庭(Court of Orphans),令市政府可以為嗰啲因為家庭經濟支柱死亡而破碎既家庭提供服務。佢亦都被任命做共同委員會既委員,做留俾雅息特孤兒既任何遺產既合法託管者,直到啲孤兒年滿21歲先至可以攞返錢[50]。 孤兒稅俾用嚟資助雅息特運河既建設[51]

雅息特既座右銘係「Semper fidelis」(永遠忠誠,Always faithful),傳統上認為係伊麗莎白一世提出既,用嚟表彰雅息特喺公元1588年幫手擊敗西班牙無敵艦隊所做出既貢獻[52]; 不過,喺1564年伊麗莎白一世統治時期,盾徽同帶有座右銘既徽章加入咗呢句「座右銘」[53]。另一個講法係喺1660年,國王查理斯二世英國內戰期間,得到雅息特居民既支持,所以授予呢座城市「semper fidelis」既稱號[54]

公元1638年,牧師 John Wheelwright 俾人喺麻省灣殖民地(英文:Massachusetts Bay Colony)流放,之後佢喺 Squamscott River 既河岸建立咗一個社區,他以雅息特命名嗰度。美國獨立戰爭期間,雅息特成為紐咸西州(New Hampshire)既首府[55]

在英國內戰初期,雖然屬於議會派(Parliamentarians)既雅息特已經加強防禦能力,抵抗保皇派(Royalists),但係喺1643年9月,佢俾 Maurice 親王領導既 Cornish 保皇黨軍隊佔領。呢件事之後,雅息特一直牢牢咁喺國王既控制之下,直到戰爭接近結束既時候,成為最後落入議會派手中既保皇派城市之一[56]。 公元1646年4月,Thomas Fairfax 喺 Poltimore House 談判達成雅息特投降協議[57]。 喺嗰陣時,雅息特係一個經濟實力雄厚既城市,羊毛貿易十分發達。Count Lorenzo Magalotti 喺26歲既時候,訪問咗呢座城市,佢表示,部分原因係周邊地區「比前一天更加肥沃,居住條件也更好」[58]。 Magalotti 話,德文郡有超過三萬人做羊毛同布料工業相關工作,呢啲產品賣到去「西印度群島、西班牙、法國和義大利」等地方[59]。 C喺18世紀初,Celia Fiennes 亦喺呢段時期訪問咗雅息特。佢評論雅息特既「巨大貿易」(vast trade)同「難以置信既數量」(incredible quantity),仲記錄咗「呢度係英格蘭一星期可以賺到最多錢既地方」,大約係10,000英鎊到15,000 英鎊之間[60]

佐治時代同維多利亞時代[編輯]

John Rocque 喺公元1744年畫既雅息特地圖
Shapter 醫生既《1832年雅息特霍亂史》封面插畫

喺工業革命既早期,雅息特既工業喺當地農產品既基礎上發展起嚟,由於城市喺水流湍急既河邊,可以隨時得到水力,所以早期既工業場地都係喺雅息特西面既干涸沼澤地,雅息島(Exe Island),發展起嚟。 註:雅息島係依家既都鐸街(Tudor Street)、新橋街(New Bridge Street)、西部路(Western Way)、Bonhay Road,同埋佢哋附近一帶。

但係,當19世紀蒸汽動力取代水力既時候,雅息特距離煤炭(或鐵)既礦源太遠,無辦法進一步發展。結果,呢座城市既相對重要性下降咗,並無經歷過19世紀既快速發展,嗰次發展改變咗好多歐洲歷史名城。喺呢段期間,大規模既運河重建進一步擴大咗雅息特既經濟,「15至16噸既船隻載住貨物同商品,從 Topsham 到城市碼頭(City Quay)」[61]。 I公元1778 年,一座橫跨雅息河既新橋起好咗,取代咗中世紀既舊橋。呢座耗資30,000英鎊建造既新橋,有三個拱門,用石頭建造[62]

喺1832年,席捲歐洲既霍亂蔓延到雅息特。關於呢件事既唯一已知記錄係 Thomas Shapter 醫生,佢係疫情期間在場既醫生之一[63]

第一條到達雅息特既鐵路係碧仙桃與雅息特鐵路公司(Bristol and Exeter Railway)喺1844年喺雅息特市中心既西北部、雅息河東岸既聖大衛(St Davids)起咗雅息特第一個火車站。 T南德文鐵路公司(South Devon Railway Company)將線路向西延伸到普利茅斯(Plymouth),喺聖湯瑪士既 Cowick Street 東段起咗個比較細既高架車站(雅息特聖湯瑪士火車站)。喺1860 年,倫敦與西南鐵路公司(London and South Western Railway)開通咗來往倫敦既替代路線(唔需要經碧仙桃去倫敦),同埋喺皇后街(Queen Street)起咗一個更接近市中心既雅息特中央火車站(Exeter Central)。為咗更方便咁利用大西部鐵路將啲肉類產品從雅息特運到倫敦賣,屠夫 Lloyd Maunder 喺1915年搬到依家既 Sidwell Street 既本部(Headquarter)[64]

大約1895年既高街

雅息特既第一間電力公司係雅息特電燈公司(Exeter Electric Light Company),嗰間公司喺1880年代尾成立,但係喺 1896年俾政府市政化,成為雅息特市電力公司(City of Exeter Electricity Company)[65]。 喺1896年,公司花費88,000英鎊建造污水處理系統,降低傳染病既風險[66]

雅息特既第一條馬拉「電車」(horse-drawn trams)喺1882 年開始營運,總共有3條線路,以東門(East Gate)做總站,呈放射狀去市內既唔同既地方。 第一條路線由東門去聖大衛火車站,途經新北路(New North Road)、方尖碑(Obelisk,依家嗰度係鐘樓,Clock Tower)、聖大衛山路(St David's Hill);第二條路線沿住 Heavitree Road 去 Livery Dole;第三條路線沿著 Sidwell Street 去 Mount Pleasant,大約係聖雅各教堂(St James' Church)同聖馬可教堂(St Mark's Church)之間。而車庫就喺新北路(New North Road)附近[67]

廿世紀[編輯]

1905年雅息橋既街燈,呢盞街燈喺1983年安裝咗喺雅息特碼頭邊(Exeter Quayside)既手動纜索渡輪

一座橫跨雅息河既新橋喺1905年3月29號啟用,取代咗以前既佐治時代橋(Georgian bridge)。它由條橋係鑄鐵同鋼製成既,用咗三鉸鏈拱形(three hinged arch)設計,耗資25,000英鎊,由巴里爵士(Sir John Wolfe Barry)設計[68]。同樣係喺1905年,有軌電車取代咗馬拉「電車」[69],開咗一條沿住高街(High Street)、前街(Fore Street)同新雅息橋(new Exe Bridge)既新路線。一穿過雅息河,路線就分開咗,一條路線沿住 Alphington 路,另一條路線沿住 Cowick 街。而來往聖大衛火車站既路線就改為沿住皇后街行駛,而唔再沿住新北路行駛,另外來往 Heavitree 既線路亦都延長咗[70]。 1917年3月17日,一架電車喺前街(Fore Street)嗰度失控咗,撞向一架馬車,然後係雅息橋(Exe Bridge)上面翻咗車;車上既一名女乘客死咗[71]。 到咗1920年代,雅息特狹窄既路上面,因為電車行得慢,出現咗塞車問題,加上需要昂貴既路軌更新工程等問題,經過好幾次討論,市議會決定用雙層巴士取代有軌電車服務,最後一班有軌電車喺1931年8月19號運行。依家仲可以見到既雅息特有軌電車,係19號車,搬咗去海邊既西頓鎮(Seaton),做觀光電車,由西頓軌道電車公司(Seaton Tramway)繼續運營[72]

Olive Wharry 創作既水彩畫,佢畫既係1942年雅息特聖 Sidwell 教堂俾閃電戰轟炸之後既情況。1942年5月4號凌晨,一粒重250公斤既炸彈直接落咗喺聖 Sidwell 。教堂塔樓仍然矗立住,但係由於損壞嚴重,無幾耐就俾人拆咗。喺原址起咗一座替代既教堂。來自皇家亞厘畢紀念博物館(Royal Albert Memorial Museum)既收藏 (63/2004/4)。

喺第二次世界大戰期間,雅息特俾德國空軍轟炸,1940年至1942年間,雅息特總共受到18次空襲,市中心既大部分地區都俾德國空軍既轟炸夷為平地。 1941年4月到1943年4月期間,駐紮喺雅息特機場,綽號叫「利沃夫雕鴞」(Lwów Eagle Owls)既第307波蘭夜間戰鬥機中隊(Polish Night Fighter Squadron)保衛咗雅息特,令城市避免再受德國轟炸機既襲擊。利沃夫市(Lwów)同雅息特市有相同既座右銘「Semper Fidelis」(永遠忠誠)。

1942年4月同5 月,作為 Baedeker 閃電戰(Blitz)既一部分,特別係為咗回應英國皇家空軍對德國北部城鎮 Lübeck 同 Rostock 既轟炸,德軍將雅息特市既40英畝(16公頃)土地用燃燒彈夷為平地。市中心既好多歷史建築物,尤其係鄰近高街同 Sidwell 街一帶,幾乎完全俾德軍摧毀哂,包括大教堂在內既其他建築亦都受到唔同程度既破壞。 5月4號夜晚,波蘭307中隊出動咗四架仍然可以用到既飛機,對抗40架德國容克斯Ju 88(Junkers Ju 88)轟炸機,成功阻止咗其中四架德軍飛機喺雅息特投放炸彈。呢次轟炸,做成156人死亡,不過波蘭中隊無軍人傷亡。

為了紀念第307波蘭夜間戰鬥機中隊同雅息特之間建立既友誼,307中隊喺1942年11月15號喺雅息特大教堂外,向雅息特贈送咗一面波蘭國旗(雅息特係第一個獲得呢種殊榮既英國城市)。自2012年起,每逢11月15號,波蘭國旗就會喺雅息特既市政廳(Guildhall )升起;呢一號,喺依家既雅息特,叫做「307 中隊日」(307 Squadron Day)。喺2017年11月15號,波蘭大使 Arkady Rzegocki 喺雅息特大教堂既聖雅各禮拜堂(St James Chapel)為紀念307中隊既牌匾舉行咗揭幕儀式。

市中心既大片地區喺20世紀50年代開始重建,當時幾乎無嘗試保護或者修復歷史建築。為咗改善交通問題,令交通更加流通,街道既規劃改變咗;牧師合唱團(Vicars Choral)既聖羅倫斯學院(St Lawrence),同埋百福(Bedford)馬戲團等前地標都消失咗。現代建築同喺閃電戰當中倖存既紅砂岩建築,形成鮮明既對比[73] 。一個值得注意既例外係「搬家之屋」(The House That Moved),佢係歐洲最古老既私人住宅之一[74];原本因為修建新路,間屋要拆,但係喺工務部(Ministry of Works)既干預之下,得以保存,整間屋搬咗去新地點(喺西街同 Lower Rackclose Lane 之間,近樓梯街Stepcote Hill 既街尾)[75][76]

1960年洪水之後起好既雅息河防洪通道

喺1960年10月27號,大雨過後,雅息河氾濫,淹沒咗雅息特既一大片地區,包括 Exwick,聖湯瑪士,Alphington 等地方。部分地區水位上升到離地面2米;當地既 Beach Bros 公司,有150名員工被困9個鐘頭;2,500間屋浸咗水。同年既12月3號,雅息河既水位再次上漲,浸咗1,200間屋。呢啲洪水令到雅息特需要建造新既防洪設施,工程喺1965年開始,用咗12年,耗資800萬英鎊完成。防禦工事包括三個防洪通道,同時起兩座既石屎橋(分別喺1969年同1972年),用嚟取代舊既雅息橋,原因係舊橋既橋躉比較大,阻礙咗河水既流動,令洪水問題變成更加嚴重[77]

1997年,雅息特市發生咗一單引人注目既隨機兒童謀殺案,到依家呢單仍然係英國最引人注目既未破謀殺案之一。 1997 年11月15號,當時14歲既女學生 Kate Bushell,佢係西雅息(West Exe)學校既學生,佢喺 Exwick 既 Exwick Lane 放狗既時候,俾身份不明既襲擊者割喉。雖然警方堅稱兇手一定係當地人,而且好幾次呼籲當地人喺犯罪觀察網站上提供信息,但係襲擊者既身份,始終無被確認。警方認為,Kate Bushell 既謀殺案,可能同一年之後既1998年喺康和郡放狗者 Lyn Bryant 既謀殺案有關。警方掌握咗 Kate Bushell 案中既DNA 證據,而且懸賞10,000英鎊,希望有人提供到呢這兩單案件既資訊[78]

廿一世紀[編輯]

雖然受到當地既一啲反對[79],大教堂坊(Cathedral Close)同高街附近既 Princesshay 購物中心喺2005年到2007年期間進行咗重建[80][81]。重建之後既購物中心上面有123個住宅單位[82]。喺2017年,Princesshay 購物中心既購物空間有390,000平方英尺,其中130,000平方英尺係百貨集團 Debenhams 擁有。大約有1,200名員工喺購物中心既商店、餐廳、保安、清潔、維護同中心管理等部門做嘢[83]

為咗令行動不便既人士能夠享受雅息特既城市生活,雅息特社區交通協會(Exeter Community Transport Association)提供手動同電動輪椅,同埋輪椅代步車(Mobility scooter,呢啲代步車係英國「Shopmobility」計劃既一部分),提供俾任何患有短期或者長期行動障礙既人用,方便佢哋用市中心既購物設施、活動、同朋友見面[84]。註:ShopMobility UK 係一個全國性計劃,目的係令行動不便既人能夠進入城鎮、城市或者購物中心裡面既商店同休閒設施,呢啲代步車既租賃服務都係低成本,有時甚至係免費既[85]

2008年5月,Princesshay 既 Giraffe 咖啡館遭受到恐怖襲擊,但係放炸彈既人成為呢單恐怖襲擊既唯一傷者[86]

John Lewis Building, adjacent to Waterstones in the busy high street.
John Lewis 大廈(右),隔離係繁忙大街既 Waterstones(左)

喺2012年10月12號,John Lewis 喺 Sidwell Street 開咗佢哋喺雅息特既第一間高街家居店,面積達到65,000平方英尺,喺當年開設既 John Lewis 商店之中最大間既[87],佢哋請咗300名員工[88]。John Lewis 既頂樓,有一間大型既咖啡館餐廳,供應唔同既飲品同食品,包括早餐、午餐、兒童餐、小吃、蛋糕、冷熱飲品等[89]

2015年3月,一項耗資3000萬英鎊既防洪改進計劃獲得批准。個計劃包括拆除檢查堰(check weirs),並且喺排水道中心建造更深既「曲流」(meandering stream),以改善水流。個計劃係喺環境署(Environment Agency)既一項研究之後製定既,個研究揭示咗嗰陣時洪水防禦措施既弱點[90]。雅息特曾經喺2015年9月1號推出社區貨幣(community currency),叫雅息特鎊(Exeter Pound)[91],不過喺2018 年9月30號停用[92],停用既原因係社會轉向無現金交易,而雅息特缺乏開發自己既數位貨幣既能力同監管框架[93]

2016年10月28號,雅息特市中心既建築物發生咗嚴重既火災。皇家克拉倫斯酒店(Royal Clarence Hotel)、大教堂庭院18號(18 Cathedral Yard)同埋 Well House Tavern 酒吧等建築物喺火災既時候嚴重受損[94][95][96]。 2017年7月,修復計畫正式公佈,當時預計重建工作將會用18個月完成,酒店計畫喺2019年重新開業[97][98] ,大教堂庭院18號喺2018年11月完成修復。之後,工程進行第二輪招標完成重修 The Well House,同埋將皇家克拉倫斯酒店重建成擁有74間房間既酒店[99][100][101]。 不過,喺2021年尾,酒店計劃被宣布「明顯行唔通」(significantly unviable)[102] ,皇家克拉倫斯酒店既位置會改建成有23間住宅單位既豪華公寓,底層作為休閒同接待空間[103] 。個新計劃喺2022年10月11號獲得正式批准,呢項工程涉及剩餘結構既清拆同重建,已經喺2023年夏季動工,估計工程會持續18個月[104]

2021年2月27號,喺一個建築工地發現咗一個2,200磅(1,000 公斤)重既二戰炸彈,疏散咗大約2,600人。拆彈小組用咗大約400噸既沙嚟保護佢。 喺下晝6點12分,安全引爆咗佢[105] 。到咗3月1號,由於炸彈爆炸造成既損壞,幾百人要撤離受影響既地方,無得返番去自己既屋企[106] 。3月2號,市議會同意受影響既居民返番屋企,同時指出好多人可能「現階段無法居住」(uninhabitable at this stage)。雅息特大學報告話,大約有300個學生(疏散既1,400名學生之中既部分人)仲未返番學[107]

露宿者[編輯]

截至2020年秋季既統計[108],雅息特每晚既露宿者數量,喺英格蘭所有地方當中,排名第六,比2019年增加咗19%[108] 。2014 年,雅息特係「......倫敦以外,人均露宿率最高既城市」[109] 。喺武肺大流行期間,作為政府既「Everybody In」指引既一部分,雅息特既102名露宿者或者面臨無家可歸風險既人,得到咗安置[110][111]。 喺雅息特市議會最近既「露宿計畫」(Rough Sleeping Delivery Plan),總共撥款 3,351,347英鎊用喺2020-2021年度,減少露宿行為[112] 。政府既「下一步住宿計畫」(Next Steps Accommodation Programme)亦向雅息特市議會提供咗44萬英鎊,用嚟幫助減少雅息特街頭露宿者既數量[113] 。市議會繼續致力於長期減少露宿者既數量,「300萬英鎊既資本計劃競標創建咗31套新既長期住宿單位,計劃喺2021年3月31號之前提供專門既支援」[111]。不過依家,雅息特市中心,尤其係高街、前街、皇后街一帶既超級市場門口,仍然有幾個露宿者。

治理[編輯]

議會選區[編輯]

雅息特法院
雅息特文娛中心

雅息特有兩個議會選區,大部分地區係屬於雅息特市選區,但係兩個地方(St Loyes 同 Topsham)屬於東德文郡選區。自第二次世界大戰以嚟,直到依家,雅息特本身都係相對處於邊緣既地位,雅息特既議會議員通常係執政黨既。不過近年選出既議員主要都係工黨既,依家雅息特日益成為工黨既據點。依家既雅息特議員係 Ben Bradshaw[114]、青年議員係 Georgia Howell[115],同埋代表東德文郡既 Simon Jupp[116]。喺2020年英國脫歐之前,雅息特係英格蘭西南部歐洲選區既一部分,嗰個選區選舉咗6名歐洲議會議員。

地方政府[編輯]

雅息特市議會係一個地區權力機構,同德文郡郡議會共同負責雅息特市既地方政務。自從2012年5月,工黨成為議會既大多數黨。雅息特市議會提出咗將雅息特市改變成「單級治理」(Unitary Authority)形式,將上級既「郡」同下級既「市」政府合併,形成只有「單一層級既政府結構」,申請最初喺2010年2月獲得部長批准。 不過之後德文郡議會提出司法覆核,法院認為部長同時授予雅息特市「單級治理」地位既行為係非法既,不過,2010年大選之後,新既聯合政府喺2010年5月宣布重組計畫受阻[117][118]

從撒克遜時代開始,雅息特市就係屬於 Wonford 百戶[119]。 註:Wonford 百戶係英國德文郡32個古代行政單位既名。雅息特從大約1207年起就有市長,直到 2002 年,雅息特市係除咗倫敦市(City of London)、溫車士打市(Winchester)以外,英格蘭最古老既榮譽(Right Worshipful)市長制既地方,榮譽市長喺所有既遊行同儀式場合都擁有領導地位[120]

作為伊莉莎白二世登基五十週年慶祝既一部分,雅息特市被選中成為接受市長(Lord Mayor)既城市。2002年5月1號,喺女王既訪問期間,授予雅息特市「特許證書」(Letters patent),Granville Baldwin 議員(Councillor)成為雅息特市既第一任市長。 市長每年喺39名雅息特市議員當中選舉產生,任期內唔涉及政治。

公共服務[編輯]

雅息特既治安由德文暨康沃爾警察局(Devon and Cornwall Constabulary)提供,總部位於雅息特市東部既 Middlemoor。

消防服務由德文暨森麻實消防及救援局(Devon and Somerset Fire and Rescue Service)提供,佢既總部位於雅息特附近既 Clyst St George。佢有兩個消防站,分別係喺丹麥城堡(Danes Castle)附近,同埋 Middlemoor。

皇家德文大學醫療保健(The Royal Devon University Healthcare)國民健康服務(NHS)基金會信託基金喺市中心東南部設有一間大型醫院,皇家德文郡暨雅息特醫院

(Royal Devon and Exeter Hospital)。雅息特既救護車服務係由西南救護車服務(South Western Ambulance Service)NHS 信託公司提供。 西部信託(West Trust)既分區總部同埋999控制中心,位於雅息特,為德文郡、康和郡、森麻實郡同埋錫利群島(Isles of Scilly)提供服務。註:錫利群島係康和郡東南面既一群小島,喺145個小島入面,有5個島有人住,總共既人口係2,271(2021年既人口普查數據)。

地理[編輯]

雅息河

雅息特既市中心區域喺雅息河東岸,喺河邊既陡峭山脊上面。喺雅息特既東北面,近雅息特大學既東面對出既火車軌隔離,雅息河同 River Creedy 匯合,嗰度係廣闊既沖積平原同河口,加上呢度雨水比較多,雨後呢兩條河既水流都比較急,所以經常有洪水氾濫問題。歷史上,嗰度係雅息河既最低橋點(lowest bridging point,河流最近海既橋樑跨越位置),雅息河喺漲潮既時候,可以從海邊通航到城市,直到後來起咗河堰之後,啲船先至去唔到上游。再加上易於防禦既山脊,地勢比較高,令到雅息特市成為定居同貿易既自然選擇。佐治·奧利花(George Oliver)喺《雅息特市既歷史》既書嗰度話,最初啲人定居喺雅息特呢度,最可能既原因係「周圍鄉村既肥沃土地」同呢度「美麗而居高臨下既海拔」、「湍急而又可以通航既河流」[121]。雅息特既林地亦都非常適合自然資源同狩獵。

雅息特主要係砂岩(sandstone)同礫岩(conglomerate)地質,但係周邊地區既結構各有唔同[122] 。構成城市主幹既山脊地形包括一座火山塞(Volcanic plug),Rougemont 堡壘就係坐落喺火山塞上面。大教堂喺山脊既邊緣,所以喺相當遠既距離之內,都可以睇到佢。

雅息特喺梳士巴利(Salisbury)西南偏西80英里(130 公里),倫敦西南偏西158 英里(254 公里),托基(Torquay)北面18 英里(29 公里),普利茅斯(Plymouth)東北36 英里( 58 公里),杜羅(Truro)東北偏東74 英哩(119 公里)既地方。

氣候[編輯]

罕見降雪之後既大教堂草地廣場

雅息特既冬季輕微潮濕,期間會出現(通常短暫)既寒冷天氣;無風既時候,即使冬天溫度比較低,不過感覺唔會太冷;不過如果風大既時候,即使溫度唔太低,仍然可以好寒冷。夏季既特徵係天氣溫暖多變,有時炎熱、涼爽有時、有時大風、有時多驟雨。 同緯度一樣既其他地方比較,雅息特全年既氣溫變化唔算太大;但係,因為地形既原因,雅息特既晝夜溫差,可以相差好幾攝氏度,雅息河沿岸,因為屬於山谷地形,例如碼頭區(Quayside)、聖湯瑪士(St Thomas)同 Exwick,日夜溫差會比較大,夜晚會更冷,日頭會更暖;唯一既例外係冬天反氣旋活動期間,天氣會變成多霧同有霜凍,有時霧氣會持續一整天,令到日頭既氣溫受到抑制。同樣,相同既天氣模式亦會提高每日既最高氣溫,最熱既月份是7 月,平均最高氣溫為21.7 °C(71.1 °F),最凍既月份喺1月,平均最高氣溫只有8.8°C(47.8 °F)。十月係最潮濕既月份,平均每日既降雨量係88.9 毫米(3.50英吋)。呢啲讀數係喺雅息特機場既天文台收集既;將每日最高氣溫讀數增加一攝氏度,同埋將夜間最低氣溫減一攝氏度,就大致可以覆蓋唔同位置既差異。因為受到 Dartmoor 既阻擋,雅息特比其他西南地區(例如普利茅斯)更容易遭受霜凍。出於同樣既原因,雅息特夏天亦比較乾燥同溫暖。雅息特既最高氣溫記錄係喺1976年6月記錄到既33.5°C(92.3°F)[123],而最低記錄氣溫係喺2010年12月記錄到既 -16.4°C(2.5°F)[124]

Exeter (EXT), elevation: 27 m(89 ft), 1991–2020 normals, extremes 1958–present氣候平均數據
月份 1月 2月 3月 4月 5月 6月 7月 8月 9月 10月 11月 12月 全年
歷史最高温 °C(°F) 16.6
(61.9)
14.9
(58.8)
21.0
(69.8)
23.6
(74.5)
27.5
(81.5)
33.5
(92.3)
32.2
(90)
33.0
(91.4)
26.9
(80.4)
26.0
(78.8)
18.6
(65.5)
15.9
(60.6)
33.5
(92.3)
平均高温 °C(°F) 9.1
(48.4)
9.4
(48.9)
11.3
(52.3)
13.8
(56.8)
17.1
(62.8)
20.0
(68)
21.8
(71.2)
21.6
(70.9)
19.3
(66.7)
15.5
(59.9)
12.0
(53.6)
9.4
(48.9)
15.0
(59)
每日平均氣温 °C(°F) 5.9
(42.6)
5.9
(42.6)
7.4
(45.3)
9.3
(48.7)
12.2
(54)
15.2
(59.4)
17.0
(62.6)
16.9
(62.4)
14.6
(58.3)
11.6
(52.9)
8.2
(46.8)
6.0
(42.8)
10.9
(51.6)
平均低温 °C(°F) 2.6
(36.7)
2.4
(36.3)
3.5
(38.3)
4.8
(40.6)
7.3
(45.1)
10.4
(50.7)
12.1
(53.8)
12.1
(53.8)
9.9
(49.8)
7.8
(46)
4.4
(39.9)
2.7
(36.9)
6.7
(44.1)
歷史最低温 °C(°F) −15.0
(5)
−9.3
(15.3)
−9.6
(14.7)
−4.4
(24.1)
−1.7
(28.9)
0.9
(33.6)
2.1
(35.8)
2.0
(35.6)
−1.0
(30.2)
−3.9
(25)
−6.2
(20.8)
−16.4
(2.5)
−16.4
(2.5)
平均降水量 mm(英寸) 85.6
(3.37)
65.1
(2.563)
62.3
(2.453)
61.4
(2.417)
51.0
(2.008)
53.8
(2.118)
48.2
(1.898)
64.1
(2.524)
60.3
(2.374)
92.5
(3.642)
95.3
(3.752)
90.1
(3.547)
829.2
(32.646)
每月平均日照時數 58.4 82.7 117.1 167.4 195.5 194.7 193.8 171.8 151.2 106.8 69.5 52.6 1,561.6
出處 #1:Magic seaweed
出處 #2:KNMI[127]

人口統計[編輯]

2021年雅息特既人口金字塔

根據2011年既人口普查,國家統計局公佈咗雅息特地區人口總數係117,773人[128] ;比 2001年(十年前)上次人口普查既111,076人,增加咗6,697人[129] ;而2011年雅息特人口既種族組成係93.1%係白人,其中最大既少數族裔係華人,佔1.7%[130] 。從2001年人口普查以來,英國白人、愛爾蘭白人同其他族裔數量都有所下降(分別係 -1%、-6% 同 -10%),同時,中國人同其他亞洲人就大幅增加(分別係429%同434%)[130][131] 。呢啲數據唔包括2011年人口普查,新增既兩個民族分類:吉普賽人(Gypsy)或者愛爾蘭旅行者(Irish Traveller)同埋阿拉伯人(Arab)。以下係2011年雅息特既10大移民群體[130]

Country of Birth 雅息特既新移民(2011 年人口普查)
中華人民共和國 1,665
波蘭 1,296
德國 710
印度 653
愛爾蘭共和國 469
南非 438
美國 350
法國 310
菲律賓 295
澳洲 242

2011年,雅息特市(City of Exeter) 既人口係117,773人,其中內城區(inner urban subdivision)既人口係113,507人。雅息特既城市分區(urban subdivision,USD),唔包括 Topsham 鎮,雖然喺行政上,Topsham 係雅息特市既一部分,Topsham 通常被認為係一個單獨既定居點,並且事實上,Topsham 亦唔係喺城市選區裏面。

雅息特2011 雅息特城市分區 雅息特市
英國白人 88.1% 88.3%
亞洲人 4.0% 3.9%
黑人 0.6% 0.5%

[132]

2011 年,雅息特既城市分區既人口當中,有11.9%係非英國白人,而雅息特實際城市同周邊行政區既比例係11.7%。

2009 年,雅息特市既英國白人比例係89.1%,而2011年呢個比例係88.3%[133]

2014 年,雅息特城區人口係124,079 人[134],而雅息特市同行政區的人口係124,328 人。雅息特都會區同年人口係467,257 人,包括雅息特同 Teignbridge、中德文郡同東德文郡[135]。 喺德文郡既所有地區之中,雅息特接待咗嚟自東德文郡既通勤者數量最多,其次係 Teignbridge。全市少數民族人口當中,大部分住喺市中心、西北同東郊。截至2011年,Pinhoe、Cowick 同昂貴既 Topsham 郊區等邊遠地區既居民當中,95%都係英國白人。

種族[編輯]

1991年至2021年雅息特市既種族情形:

民族 年份
1991[136] 2001[137] 2011[138] 2021[139]
人數 % 人數 % 人數 % 人數 %
白人:總計 96,811 98.7% 108,459 97.6% 109,590 93.1% 118,034 90.3%
白人:英國人 105,231 94.7% 104,013 88.3% 108,095 82.7%
白人:愛爾蘭人 668 629 875 0.7%
白人:吉普賽人或者愛爾蘭旅行者 93 100 0.1%
白人:羅馬人 181 0.1%
白人:其他 2,560 2.3% 4,855 4.1% 8,783 6.7%
亞洲人或亞洲英國人:總計 663 0.7% 1,107 1% 4,595 3.9% 6,375 4.8%
亞洲人或亞洲人英國人:印度人 212 284 946 1,588 1.2%
亞洲人或亞洲英國人:巴基斯坦人 37 67 164 274 0.2%
亞洲人或亞洲英國人:孟加拉人 80 142 227 513 0.4%
亞洲人或亞洲英國人:中國人 185 378 1,998 2,020 1.5%
亞洲人或亞洲英國人:其他亞洲人 149 236 1,260 1,980 1.5%
黑人或英國黑人:總計 202 0.3% 225 0.2% 667 0.6% 1,137 0.9%
黑人或英國黑人:加勒比海 51 62 128 893 0.7%
黑人或英國黑人:非洲人 76 142 492 137 0.1%
黑人或英國黑人:其他黑人 75 21 47 107 0.1%
混血:總計 924 1% 1,938 1.6% 3,308 2.6%
混血:白人同加勒比海黑人 179 403 503 0.4%
混血:白人同非洲黑人 108 278 484 0.4%
混血:白人同亞洲人 350 773 1305 1.0%
混血:其他 287 484 1016 0.8%
其他:總計 449 0.5% 361 0.3% 983 0.8% 1,853 1.4%
其他:阿拉伯人 659 802 0.6%
其他:任何其他種族群體 449 0.5% 361 0.3% 324 1,051 0.8%
總人口 98,125 100% 111,076 100% 117,773 100% 130,707 100%

宗教[編輯]

宗教 2001[140] 2011[141]
人數 % 人數 %
有宗教信仰 78,839 70.9 67,382 57.2
基督徒 76,773 69.1 63,486 53.9
佛教徒 375 0.3 683 0.6
印度教徒 123 0.1 372 0.3
猶太教徒 152 0.1 155 0.1
穆斯林教徒 858 0.8 1,855 1.6
錫克教徒 76 0.1 160 0.1
其他宗教 482 0.4 671 0.6
(無宗教信仰/無註明信仰) 32,237 29.1 50,391 42.8
無宗教信仰 22,719 20.5 40,862 34.7
無註明宗教信仰 9,518 8.6 9,529 8.1
總人口 111,076 100.0 117,773 100.0

經濟[編輯]

Princesshay 購物中心,背景係雅息特大教堂
1943年雅息特既 The Higher Market;當時,較大既公司,包括 Mac Fisheries,同其他小店既攤位一齊,呢啲攤位喺戰前同埋鄰近既 Goldsmith Street 一齊拆咗;塊地依家起咗新既購物中心。

英國氣象局係英國主要既天氣預報機構,亦都係世界上最重要既天氣預報機構之一,喺2004 年初,佢哋由柏莎郡(Berkshire)既 Bracknell 搬咗嚟雅息特。 佢喺雅息特最大既僱主之一,其他大型僱主包括雅息特大學、德文郡議會、皇家德文郡暨雅息特 NHS 信託基金會(Royal Devon and Exeter NHS Foundation Trust)。

每日大約有35,000人從附近既周邊城鎮通勤到雅息特[142] 。雅息特為市內居民,同埋嚟自 Teignbridge、中德文郡、東德文郡,即係所謂既「雅息特暨德文郡中心地區」(Exeter & Heart of Devon area,EHOD),提供服務、就業同購物;所以,雅息特服務範圍包括整個 EHOD 地區既457,400名居民[143]

雅息特係企業十大最賺錢既地點之一[144]。 截至2022年,雅息特39%既人從事專業職業,遠高於全國平均既26%。不過,全職工人既工資中位數就低過英國既整體數字,但係都高過英格蘭西南部既數字[145]

雅息特市中心提供大量既購物設施。高街主要係全國性連鎖店既分店:新經濟基金會(New Economics Foundation,NEF)2005年既一個調查,將雅息特評為英國克隆城鎮(clone town)最差既例子,雅息特市既高街只有一間獨立商店,商店既多樣性(就商店既類別數量而言)比任何其他接受調查既城鎮都要低[146]。喺2010年,一項類似既調查報告話,雅息特仍然係最糟糕既克隆城鎮[147] 。截至2019年,大街上最後一間獨立商店已經關閉[148]。 同高街相連既三個重要購物區,提供咗更多樣化既選擇。Princesshay 係一個連接高街南側既戰後重建既零售區,喺2007年重建之前,曾經係好多獨立商店既所在地,但係依家亦嗰度主要都係全國性既連鎖商店。 根據雅息特市議會2023年10月既計劃草稿,雅息特會鼓勵本地既獨立商店[149]。高街近皇后街,Lakeland 對面既 House of Fraser 大樓俾當地一家財富績效管理公司 Prydis 收購咗,Prydis 將建築物重新開發做三層高既酒店,屋頂有間酒吧,亦會有零售商店[150]。依家間酒店由洲際酒店團體(InterContinental Hotels Group)旗下既英迪格酒店(Hotel Indigo)經營,有104間房,有一間叫「Colson's」既酒吧餐廳、一間叫「Becketts」既屋頂酒吧(可以近距離睇到大教堂)、 一間叫「The Dugout Sports bar」既酒吧(有大電視俾人睇比賽)等設施[151]

喺高街既另一邊,半隱密既市政廳購物中心(Guildhall Shopping Centre)裡面有全國性同埋更多地區性既商店,並同全封閉既 Harlequins 中心相連,嗰度以小型商店為主。高街附近比較細既街道,例如甘迪街(Gandy Street)亦都有一系列既獨立商店[152]

2004年6月26日,雅息特獲得公平貿易城市既地位[153]

雖然雅息特擁有好多旅遊景點,但係雅息特並唔係以旅遊業為主,只有7%既就業係依賴旅遊業,而整個德文郡依賴旅遊業既比例係 13%(2005 年數據)[154]

作為「雅息特增長點」策略既一部分,市議會計劃發展喺同雅息特邊界接壤既 Teignbridge 同東德文郡地區既土地。其中包括將距離雅息特5英里(8公里),機場北面既村莊Cranbrook,全面擴建[155][156][157],成為一個有20,000人住既新市鎮[158]

參考[編輯]

  1. "How the population changed in Exeter, Census 2021 - ONS". www.ons.gov.uk (英文). 喺2024-01-17搵到.
  2. 2.0 2.1 Hoskins, William George (2004). Two Thousand Years in Exeter. Phillimore. pp. 4–5. ISBN 9781860773037.
  3. Hoskins, William George (2004). Two Thousand Years in Exeter. Phillimore. p. 1. ISBN 9781860773037.
  4. Thorndycraft, Varyl R.; Pirrie, Duncan; Brown, Antony G. (2004–03). "Alluvial records of medieval and prehistoric tin mining on Dartmoor, southwest England". Geoarchaeology (英文). 19 (3): 219–236. doi:10.1002/gea.10114. ISSN 0883-6353.{{cite journal}}: CS1 maint: date format (link)
  5. Price, D.G. (1985). "Changing perceptions of prehistoric tinning on Dartmoor". Report of the Transactions of the Devonshire Association. 117: 129–138.
  6. Price, D.G. (1993). "Dartmoor: the pattern of prehistoric settlement sites". The Geographical Journal. 159: 261–280.
  7. Thorndycraft, V.R., Pirrie, D., & Brown, A.G. (2003). An environmental approach to the archaeology of tin mining on Dartmoor. In P. Murphy & P. Wiltshire (Eds.), The environmental archaeology of industry (pp. 19– 28). Oxford: Oxbow Books.
  8. Newman, P. (1994). "Tinners and tenants on south-west Dartmoor: A case study in landscape history". Transactions of the Devonshire Association. 126: 199–238.
  9. Hoskins, William George (2023). Two Thousand Years in Exeter. Phillimore. The History Press. ISBN 9781803990668
  10. "VisitDartmoor - Official Tourism Website for Dartmoor". VisitDartmoor (英國英文). 喺2024-01-18搵到.
  11. Harvey, Hazel (1984). Discovering Exeter 4/Pennsylvania (PDF). Exeter Civic Society. p. 2.
  12. "fragments of incence burner or tazza (vessel (sherd))". Royal Albert Memorial Museum & Art Gallery (英國英文). 喺2024-01-17搵到.
  13. Bidwell, Paul T. (1980). Roman Exeter: fortress and town. Exeter: City Council. ISBN 978-0-86114-270-5.
  14. "Dumnonii Celtic Tribe". Roman Britain (英國英文). 喺2024-01-17搵到.
  15. "Exeter (Isca Dumnoniorum) Roman Fort". Roman Britain (英國英文). 喺2024-01-17搵到.
  16. Bidwell, Paul T. (1980). Roman Exeter: fortress and town. Exeter: City Council. ISBN 978-0-86114-270-5.
  17. "Remains of Roman defences discovered under Exeter's Bus Station site". news.exeter.gov.uk (美國英文). 喺2024-01-17搵到.
  18. "Visiting a Roman Bathhouse" (PDF).{{cite web}}: CS1 maint: url-status (link)
  19. Vowles, Charlotte (2022-02-27). "Roman baths are buried under Exeter". Devon Live (英文). 喺2024-01-17搵到.
  20. "Excavation plans for Exeter's Roman Baths". BBC News (英國英文). 2015-01-16. 喺2024-01-17搵到.
  21. 21.0 21.1 Bidwell, Paul; Gould, David (2021-04-28). Roman Exeter:. Oxbow Books. pp. 51–92.
  22. "Other Self-Guided Walks - The City Wall Trail - Exeter City Council". Exeter City Council website (英國英文). 喺2024-01-17搵到.
  23. Nennius (attrib.). Theodor Mommsen (ed.). Historia Brittonum, VI. Composed after AD 830. (拉丁文) Hosted at Latin Wikisource.
  24. 24.0 24.1 Newman, John Henry & al. Lives of the English Saints: St. German, Bishop of Auxerre, Ch. X: "Britain in 429, A. D.", p. 92. 互聯網檔案館歸檔,歸檔日期21 March 2016. James Toovey (London), 1844.
  25. Hoskins 2004, p. 15
  26. Sellman (1985), p. 16.
  27. Hoskins (2004), pp. 15–16.
  28. Hoskins (2004), p. 159.
  29. Ekwall, Eilert (1991). The concise Oxford dictionary of English place-names (第4. ed., repr版). Oxford: Clarendon Press. ISBN 978-0-19-869103-7.
  30. 30.0 30.1 30.2 30.3 Hoskins (2004), p. 23.
  31. 31.0 31.1 Sellman (1985), p. 17.
  32. Higham (2008), p. 47.
  33. Higham, Robert. "Making Anglo-Saxon Devon : emergence of a shire". (No Title) (英文).
  34. "The Exe Bridge, Exeter". Devon County Council. 原著喺8 February 2015歸檔. 喺30 August 2014搵到.
  35. Hoskins (2004), pp. 26–27
  36. 36.0 36.1 Hoskins (2004), pp. 31–32.
  37. "Exeter Memories - Danes Castle". www.exetermemories.co.uk. 喺2024-01-19搵到.
  38. Myhill (web), Samantha Letters (content); Olwen (2003-06-18). "Gazetteer of Markets and Fairs to 1516: Devon". archives.history.ac.uk (英文). 喺2024-01-19搵到.
  39. Meyer, Hannah (2011). Beattie, Cordelia; Fenton, Kirsten A. (編). Gender, Jewish Creditors, and Christian Debtors in Thirteenth-Century Exeter. Genders and Sexualities in History (英文). London: Palgrave Macmillan UK. pp. 104–124. doi:10.1057/9780230297562_6. ISBN 978-0-230-29756-2.
  40. "The Jewish Community of Exeter". The Museum of the Jewish People at Beit Hatfutsot. 原先內容歸檔喺2 July 2018. 喺2 July 2018搵到.
  41. Stoyle, Mark (2014). Water in the city: the aqueducts and underground passages of Exeter. Exeter (GB): University Of Exeter Press. ISBN 978-0-85989-877-5.
  42. "Underground Passages - Visitor information - Exeter City Council". Exeter City Council website (英國英文). 喺2024-01-19搵到.
  43. "Exeter's Underground Passages - Historic Site in Exeter, Exeter - Visit Exeter". www.visitexeter.com. 喺2024-01-19搵到.
  44. James Tait (1936). The Médieval English Borough, Studies on Its Origins and Constitutional History. Manchester University Press. OCLC 1069280340.. Work cited by Richard Holt; Gervase Rosser (2014). The Medieval Town in England 1200-1540 (英文). Routledge. p. 190. ISBN 978-1317899815. 原先內容歸檔喺11 May 2019. 喺11 May 2019搵到..
  45. The Mediæval Council of Exeter. Manchester University Press. 1931. 原先內容歸檔喺11 May 2019. 喺11 May 2019搵到.
  46. Kowaleski, Maryanne (1995). Local markets and regional trade in medieval Exeter (第1. publ版). Cambridge: Cambridge Univ. Press. ISBN 978-0-521-33371-9.
  47. Stoyle, Mark (2003). Circled with stones: Exeter's city walls, 1485-1660. Exeter: University of Exeter Press. ISBN 978-0-85989-727-3.
  48. Gover, J. E. B., Mawer, A. & Stenton, F. M. (1931). "The Place-Names of Devon". English Place-Name Society. Vol Ix. Part II. Cambridge University Press: 439–40.{{cite journal}}: CS1 maint: multiple names: 作者名單 (link)
  49. Falla, Trevor (1983) Heavitree (Discovering Exeter) p.2
  50. Robert Turner (16 December 2018). "Thorverton Society members heard about Exeter's fascinating history". 原先內容歸檔喺11 May 2019. 喺14 August 2019搵到.
  51. Charles Carlton (August 1973). "John Hooker and Exeter's Court of Orphans". Huntington Library Quarterly (英文). University of Pennsylvania Press. 36 (4): 307–316. doi:10.2307/3816690. JSTOR 816690.
  52. "Exeter's Coat of Arms". Exeter City Council website. 原著喺13 February 2008歸檔. 喺13 July 2008搵到.
  53. Lee, A.H., 1908. More Texts from Towns. Quiver, (441), pp.1166-1169.
  54. Kitson, R., 2020. Exe Men: The extraordinary rise of the exeter chiefs. Birlinn Ltd.
  55. "Exeter – Its History". American Independence Museum. 原著喺9 March 2015歸檔. 喺23 March 2015搵到.
  56. Stoyle, Mark (1996). From Deliverance to Destruction: Rebellion and Civil War in an English City. Exeter: University of Exeter Press. pp. 62–108. ISBN 978-0859894784.
  57. Hoskins, W.G. (2003). Devon. Phillimore and Co. pp. 196–198. ISBN 978-1860772702.
  58. Gray 2000, p.16
  59. Gray 2000, p.18
  60. Gray 2000, p.31
  61. Oliver, George (1861). History of the City of Exeter. p. 107. ISBN 0217799973.
  62. "Exeter Memories - the history of the Exebridge". www.exetermemories.co.uk. 喺2024-01-20搵到.
  63. Shapter, Thomas (1848). The History of the Cholera in Exeter 1832. ISBN 0854096744.
  64. "Lloyd Maunder Butcher". Lloyd Maunder Butcher (美國英文). 喺2024-01-19搵到.
  65. Neville 2010, p.27
  66. Schama, S.2009. A History of Britain The Fate of the Empire 1776-2000.p 312 ISBN 978-0786868995
  67. Neville 2010, pp.18–19
  68. "History of the Exe Bridges". Exeter Memories. 原先內容歸檔喺23 July 2012. 喺15 September 2012搵到.
  69. Neville 2010, p.30
  70. Neville 2010, pp.86–89
  71. Neville 2010, pp.76–78
  72. Neville 2010, pp.104–124
  73. Payne, John (2011). The West Country: A Cultural History. Andrews UK Limited. p. 176. ISBN 978-1-908-49350-7.
  74. Mildren, James (1985). 125 years with the Western Morning News. Bossiney Books. p. 103. ISBN 9780948158025.
  75. "The House that Moved, Exeter". Britain Express.
  76. Brown, Stewart (2010). The Exe Bridge, Exeter (PDF). Exeter City Council. p. 31.
  77. "The Exeter floods of the 1960s". Exeter Memories. 28 October 2010. 原先內容歸檔喺28 October 2012. 喺15 September 2012搵到.
  78. "Murder of Exeter schoolgirl Kate Bushell remains unsolved after 23 years". DevonLive. 15 November 2020. 喺4 August 2022搵到.
  79. "High Street revamp plans criticised" (英國英文). 2003-03-04. 喺2024-01-20搵到.
  80. "Doors open at Princesshay". BBC Devon. 20 September 2007. 原先內容歸檔喺17 February 2008. 喺21 September 2007搵到.
  81. "Heaven for shoppers as Princesshay gets off to a flying start with huge crowds for opening day". Express & Echo. 21 September 2007. 喺21 September 2007搵到.
  82. "Key facts about Princesshay". Princesshay.com. Land Securities Group. 原著喺14 October 2007歸檔. 喺21 September 2007搵到.
  83. Richards, Alex (2017-09-07). "Princesshay is 10 years old". Devon Live (英文). 喺2024-01-20搵到.
  84. "Shopmobility". Exeter Community Transport Association. 原著喺6 April 2012歸檔. 喺13 July 2008搵到.
  85. "About ShopMobility". ShopMobility UK (英國英文). 喺2024-01-20搵到.
  86. "Nail-bomber given life sentence". BBC News Online. 30 January 2009. 原先內容歸檔喺17 February 2009. 喺15 September 2012搵到.
  87. "John Lewis Exeter announces opening date".
  88. "Exeter's John Lewis store opens". BBC News. 12 October 2012. 原先內容歸檔喺28 July 2023. 喺28 July 2023搵到.
  89. "John Lewis & Partners | Homeware, Fashion, Electricals & More". John Lewis & Partners (英文). 喺2024-01-20搵到.
  90. "Exeter flood defence scheme". 原先內容歸檔喺30 May 2015. 喺30 May 2015搵到.
  91. "Exeter Pound: City launches its own currency". BBC News. 1 September 2015. 原先內容歸檔喺17 July 2018. 喺21 June 2018搵到.
  92. "Home Page – Exeter Pound". www.exeterpound.org.uk. 原先內容歸檔喺7 December 2018. 喺2018-12-06搵到.
  93. Finch, Hannah (2018-07-31). "What went wrong for the Exeter Pound?". Devon Live (英文). 喺2024-01-20搵到.
  94. "Architecture experts mourn loss of "irreplaceable" interior in building where fire started", Express & Echo, 29 October 2016 互聯網檔案館歸檔,歸檔日期30 October 2016.. Retrieved 29 October 2016
  95. Exeter fire wrecks 'oldest hotel in England' 互聯網檔案館歸檔,歸檔日期25 October 2018. BBC
  96. Exeter blaze destroys hotel thought to be oldest in Britain 互聯網檔案館歸檔,歸檔日期29 October 2016. The Guardian
  97. "Fire-hit 'oldest hotel in England' restoration unveiled". BBC News (英國英文). 25 July 2017. 原先內容歸檔喺3 November 2017. 喺30 March 2018搵到.
  98. "The Royal Clarence Hotel reveals plans for restoration after last year's fire". Boutique Hotelier (英國英文). 26 July 2017. 原先內容歸檔喺1 October 2018. 喺30 March 2018搵到.
  99. "Company confirms it has made an offer for Exeter Royal Clarence fire site – but doesn't have hotel plans". Devon Live (英國英文). 8 November 2019. 原先內容歸檔喺8 November 2019. 喺12 November 2019搵到.
  100. "16-17 Cathedral Yard And Royal Clarence Hotel Cathedral Yard Exeter Reconstruction". Exeter City Council. 5 December 2019. 喺14 November 2019搵到.[失咗效嘅鏈]
  101. "Exeter's historic Royal Clarence Hotel site is sold". Devon Live (英國英文). 18 August 2020. 原先內容歸檔喺19 August 2020. 喺18 August 2020搵到.
  102. "Fire-ravaged Royal Clarence Hotel site derelict five years on". BBC News (英國英文). 28 October 2021. 喺1 December 2021搵到.
  103. "Royal Clarence Hotel: £17m Exeter flats plan revealed". BBC News (英國英文). 1 December 2021. 喺2 December 2021搵到.
  104. "Royal Clarence Hotel Exeter: Luxury flats approved". BBC News (英國英文). 11 October 2022. 喺11 October 2022搵到.
  105. "Exeter WW2 bomb detonated after homes evacuated". BBC News (英國英文). 27 February 2021. 原先內容歸檔喺27 February 2021. 喺27 February 2021搵到.
  106. "Exeter WW2 bomb: Doors and windows 'blown through'". BBC News. 1 March 2021. 原先內容歸檔喺2 March 2021. 喺2 March 2021搵到.
  107. "Exeter WW2 bomb: Home Office 'responsible' for bomb damage". BBC News. 2 March 2021. 原先內容歸檔喺2 March 2021. 喺2 March 2021搵到.
  108. 108.0 108.1 "Rough sleeping snapshot in England: autumn 2020". GOV.UK (英文). 原先內容歸檔喺18 May 2021. 喺2021-05-06搵到.
  109. Exeter City Council (6 May 2021). "Emergency Exits 003" (PDF). Exeter Committees. 原先內容歸檔 (PDF)喺6 May 2021. 喺6 May 2021搵到.
  110. Merritt, Anita (2020-11-23). "The grim extent of homelessness in Exeter". DevonLive (英文). 原先內容歸檔喺6 May 2021. 喺2021-05-06搵到.
  111. 111.0 111.1 "Plans to tackle rough sleeping in Exeter". news.exeter.gov.uk (美國英文). 原先內容歸檔喺6 May 2021. 喺2021-05-06搵到.
  112. "Published Local Authority Rough Sleeping Delivery Plan" (PDF). exeter.gov.uk. 原先內容歸檔 (PDF)喺6 May 2021. 喺6 May 2021搵到.
  113. "Exeter gets major funding boost to tackle homelessness". news.exeter.gov.uk (美國英文). 原先內容歸檔喺6 May 2021. 喺2021-05-06搵到.
  114. "Mr Ben Bradshaw".{{cite web}}: CS1 maint: url-status (link)
  115. "TEDxYouth@GandyStreet | TED". www.ted.com. 喺2024-01-20搵到.
  116. "Simon Jupp".{{cite web}}: CS1 maint: url-status (link)
  117. "The Coalition: our programme for government" (PDF).{{cite web}}: CS1 maint: url-status (link)
  118. Hennessy, Patrick (22 May 2010). "The Queen's Speech: Bill by Bill". The Daily Telegraph. 原著喺25 May 2010歸檔. 喺24 May 2010搵到.
  119. "The hundreds of devon". GENUKI. 原先內容歸檔喺27 April 2016. 喺18 June 2011搵到.
  120. "ExeterMemories - The Mayor's Office". www.exetermemories.co.uk. 喺2024-01-20搵到.
  121. Oliver, George (1861). History of the City of Exeter. p. 1. ISBN 0-217-79997-3.
  122. DEFRA. "Southwest EDRP Geographical Area and Physical Context". 原著喺13 November 2008歸檔. 喺13 July 2008搵到.
  123. "June 1976". 原先內容歸檔喺11 March 2016. 喺5 March 2016搵到.
  124. "December 2010". 原先內容歸檔喺11 March 2016. 喺5 March 2016搵到.
  125. "Exeter Airport (Devon) UK climate averages". Met Office. 喺1 January 2022搵到.
  126. "South West England climate". Met Office. 喺16 January 2019搵到.
  127. "Exeter extreme values". KNMI. 原著喺2018年2月2號歸檔. 喺8 November 2011搵到.
  128. "Key Figures for 2011 Census: Key Statistics". Office for National Statistics. 原先內容歸檔喺29 June 2014. 喺18 July 2013搵到.
  129. "Key Figures for 2001 Census: Key Statistics". Census 2001. The Office for National Statistics. 原先內容歸檔喺21 February 2014. 喺19 July 2013搵到.
  130. 130.0 130.1 130.2 引用錯誤 無效嘅<ref>標籤;無文字提供畀叫做ethnicity嘅參照
  131. "Ethnic Group, 2001". Office for National Statistics. 9 November 2004. 原先內容歸檔喺29 June 2014. 喺19 July 2013搵到.
  132. "Official Labour Market Statistics". nomisweb.co.uk. 原先內容歸檔喺22 October 2016. 喺19 April 2016搵到.
  133. "Neighbourhood Statistics". neighbourhood.statistics.gov.uk. 14 April 2008. 原先內容歸檔喺6 October 2016. 喺30 April 2016搵到.
  134. "United Kingdom: Urban Areas in England – Population Statistics in Maps and Charts". 原先內容歸檔喺13 April 2016. 喺1 May 2016搵到.
  135. "What is the Exeter Travel to Work Area? – Exeter City Futures". 1 November 2016. 原先內容歸檔喺26 April 2019. 喺2 April 2018搵到.
  136. Data is taken from United Kingdom Casweb Data services of the United Kingdom 1991 Census on Ethnic Data for England, Scotland and Wales (Table 6)
  137. "Office of National Statistics; 2001 Census Key Statistics". webarchive.nationalarchives.gov.uk. 喺2021-09-07搵到.
  138. "2011 Census: Ethnic Group, local authorities in England and Wales". webarchive.nationalarchives.gov.uk. 喺2021-12-15搵到.
  139. "Ethnic group - Office for National Statistics". www.ons.gov.uk. 喺2022-11-29搵到.
  140. "KS007 - Religion - Nomis - 2001". www.nomisweb.co.uk. 喺2022-10-18搵到.
  141. "KS209EW (Religion) - Nomis - 2011". www.nomisweb.co.uk. 喺2022-10-18搵到.
  142. "Exeter commuters". Exeter City Council. 原著喺7 August 2011歸檔. 喺1 June 2011搵到.
  143. "EHOD population" (PDF). Exeter City Council. 原著 (PDF)喺4 September 2013歸檔. 喺1 February 2009搵到.
  144. Dun & Bradstreet, 2001
  145. "Labour Market Profile - Exeter". Nomis. Office for National Statistics. 喺30 June 2023搵到.
  146. "Clone Town Britain, New Economics Foundation" (PDF). 2005.{{cite web}}: CS1 maint: url-status (link)
  147. "Traders hit back after 'clone town' attack". Western Morning News. 15 September 2010. 喺15 August 2016搵到.
  148. Finch, Hannah (9 March 2019). "A farewell to McGahey The Tobacconist: Exeter High Street's last independent". DevonLive. 原先內容歸檔喺28 October 2020. 喺4 November 2020搵到.
  149. Bialyk, Phil (2023). "The Exeter Plan. This is our city. This is our future" (PDF).{{cite web}}: CS1 maint: url-status (link)
  150. Smith, Colleen (2019-04-10). "First pictures of House of Fraser plans show dramatic rooftop bar". Devon Live (英文). 喺2024-01-20搵到.
  151. aldo (2022-12-15). "Hotel Indigo Exeter officially opens to the neighbourhood" (英國英文). 喺2024-01-21搵到.
  152. "Independent Shopping on Gandy Street - Visit Exeter". www.visitexeter.com. 喺2022-01-20搵到.
  153. "Fairtrade - Exeter City Council". Exeter City Council website (英國英文). 喺2024-01-20搵到.
  154. South West Tourism (2006) 互聯網檔案館歸檔,歸檔日期20 April 2009., The Value of Tourism in Devon 2005. Exeter: SWT
  155. "Exeter Growth Point". Devon County Council. 1 January 2011. 原先內容歸檔喺21 May 2011. 喺1 January 2011搵到.
  156. "Cranbrook Plan". East Devon. 原先內容歸檔喺26 April 2019. 喺2019-04-10搵到.
  157. "Cranbrook – Exeter and East Devon Growth Point". www.exeterandeastdevon.gov.uk. 原先內容歸檔喺26 April 2019. 喺2019-04-10搵到.
  158. Clark, Daniel (2023-04-29). "Town's expansion in full as 20,000 people set to call it home". Devon Live (英文). 喺2024-01-20搵到.