需求嘅價格彈性

需求價格彈性低嘅情況：好似米噉嘅基本糧食就算貴咗，消費者都焗住要照買。

需求嘅價格彈性，或者叫需求價格彈性，係經濟學上分析需求同供應嗰陣提到嘅概念，講緊手上嗰種貨品或者服務嘅需求量對其價格變動有幾敏感。根據需求定律，假若某商品嘅價格升，對佢嘅需求量會跌；不過對於某啲商品嚟講，需求量跌幅會較大。價格彈性指嘅就係：每當價格上升 1%，假設第啲條件冚唪唥不變，需求量會變幾多百分比，譬如某商品嘅需求價格彈性係 -2 咁多，即係話其價格每升 1%，對佢嘅需求量就會跌 2% 。

基本定義

内文：需求同彈性 (經濟學)

睇埋：需求嘅收入彈性

需求定律係經濟學上關於需求嘅基本定律。根據呢條定律，假設其他條件不變，當商品嘅價格升，需求量就會跌；而當商品價格跌，需求量就會升。即係話需求曲線實係向下斜嘅，斜率為負數。由於呢條定律嘅關係，需求嘅價格彈性正常會係負數，不過一般討論嗰時好多時會省略咗個負號佢，即係話經濟學研究者話需求彈性為 2 嘅時候，佢哋係講緊需求彈性為 -2 。

用數學化嘅方式講，設 Q 做對某商品嘅原先需求量，P 做佢原先嘅價格，Δ（希臘字母 delta）為新舊需求量或者新舊價格嘅差，噉需求價格彈性 $E_{d}$ 可以定義為：

$E_{d}={\frac {\Delta Q/Q}{\Delta P/P}}={\frac {\Delta Q}{\Delta P}}\cdot {\frac {P}{Q}}$

有關呢條式用嘅數學符號嘅詳情，可以睇吓微積分嘅相關內容。

用圖像表達嘅話，可以用需求同供應嘅圖嚟思考，下邊兩幅圖，打戙軸係價錢，打橫軸係需求量：

• 
  高嘅彈性：價格跌少少，需求量大增。
• 
  低嘅彈性：價格跌好多，需求量都冇乜點變。

彈性程度

對於唔同嘅需求價格彈性程度，有以下幾個常見分類：

• 當 $E_{d}=0$：完全無彈性，條需求曲線會係打戙嘅直線
• 當 $0<|E_{d}|<1$：無乜彈性、不富彈性或缺乏彈性
• 當 $|E_{d}|=1$：單位彈性、單一彈性，或恆一彈性
• 當 $1<|E_{d}|<\infty$：富有彈性
• 當 $E_{d}=\infty$：完全彈性或完全有彈性，條需求曲線會係打橫嘅直線

影響因素

需求價格彈性高嘅情況：「鵝肝（奢侈品一種）貴咗，噉咪食少啲囉。」

有好多因素都會影響某件商品嘅需求價格彈性。

• 替代品嘅多寡：一件商品替代品愈多，其需求彈性就愈大；用飲品做例子，喺飲品市場入便有百事可樂同可口可樂等嘅多種產品，假如可口可樂加價，消費者大可以改為飲百事可樂，兩種可樂就係彼此嘅替代品，所以消費者對佢哋嘅需求彈性較高。
• 商品支出喺總收入嘅比例：報紙唔係必需品，但因為只係賣好平嘅價錢，支出比例好細，需求彈性就較低。
• 商品係咪襟擺襟用：假如某隻襟擺襟用嘅商品加價，消費者好可能會選擇留住手上嘅現有產品，遲啲先抌，延後購買新品，即係話呢啲商品嘅需求彈性就會較高。
• 屬於必需品定係奢侈品：
  • 必需品：諸如係米等嘅基本糧食，對生活嚟講不可或缺，細幅度嘅價格變動唔會令需求量急劇改變，需求彈性通常偏低。
  • 奢侈品：好似紅酒、名牌手袋等嘅物品，對生活嚟講唔必需，一旦漲價消費者大可以選擇唔買，需求彈性通常偏高。
• 品牌忠誠度：品牌忠誠度係營銷學上有關牌子嘅概念，忠誠度係指消費者對某隻牌子保持長期嘅偏好同信任，買嘢嘅時候會優先揀返自己鍾意嗰隻牌子；品牌忠誠度被指會降低價格需求彈性，令到消費者冇咁易因為商品價格升而改買第隻產品。

參見

• 市場調查
• 競爭優勢
• 需求與供應

引咗

引用來源：

• Gillespie, Andrew (1 March 2007). Foundations of Economics. Oxford University Press. ISBN 978-0-19-929637-8. 喺28 February 2010搵到.
• Goodwin; Nelson; Ackerman; Weisskopf (2009). Microeconomics in Context (第2版). Sharpe. ISBN 978-0-618-34599-1.

資源

• （英文）需求嘅價格彈性，投資百科