韋應物

出自維基百科,自由嘅百科全書
韋應物
義博
出世開元二十五年(737年)前後
貞元七年(791年)
墓地少陵原(而家陝西西安長安區
國籍大唐
別名韋蘇州、韋江州
籍貫京兆杜陵(而家陝西西安)
知名作品《滁州西澗》
風格大曆詩風
父母韋鑾

韋應物粵拼wai4*5 jing3 mat6737年791年[註 1][1],字義博ji6 bok3),別名韋蘇州wai4*5 sou1 zau1)、韋江州wai4*5 gong1 zau1),中國唐代京兆杜陵人(而家陝西西安),係中唐有名嘅詩人,《唐詩三百首》收有佢嘅詩12首。

生平[編輯]

韋應物係長安人(而家陝西省首府西安[2],出身自京兆韋氏,係發家自漢朝嘅名門之家,不過到佢嗰代時家道衰落。佢後生時喺太學讀過書[3]。喺太學讀書前,由於任俠負氣,生性崇尚俠義[1],做咗唐玄宗嘅近衞侍官(三衞郎),出入於宮禁,曾經一度橫行鄉里,蝦蝦霸霸,做人狂放[4][5]。後來安史之亂起,佢流落失職,歸鄉之後幾貧窮[4]。從此畀心機讀書,及到咗進士[6],之後佢轉爲下級地方官[4]。由於後悔後生時,從此佢性格變得好高潔,變到清心寡慾,每去邊處居留,佢都要掃地、焚香先至坐低[7]。佢唔係交遊廣闊嘅人,詩友只有劉長卿顧況中文顧況釋皎然日文釈皎然[8];而佢經常將自身譬喻爲陶潛[8]

廣德年間,韋應物做洛陽[9],之後做河南兵曹。永泰年間,佢嚴懲軍兵啲不正行爲,結果畀人告佢狀,於是佢以病咗爲理由辭任棄官[10]。不過辭官以後佢又重返官途,建中四年(783年)做咗滁州刺史(而家安徽)[11][6]。貞元元年(785年)改任江州刺史[6][12]。貞元四年(788年)佢做蘇州刺史[註 2][6]。貞元六年(790年)佢引退,寓居喺蘇州城外嘅寺院永定寺,世稱韋蘇州。佢做官期間啲民衆好服佢[6]。喺日後白居易赴任蘇州刺史,佢就對韋應物有幾高評價。唐德宗時嘅貞元七年(791年),韋應物喺蘇州嘅官舍過身,嗰陣時佢約54歲[註 1]。所以確證嘅係,大和年間生存嘅劉禹錫赴任蘇州刺史時並無佢嘅任官推薦。

文學[編輯]

吳經熊,韋應物作詩年間,時勢動盪,無强力嘅中央統治,尤其係安史之亂對佢影響好深,呢啲都反映到佢嘅詩作。吳經熊分析《滁州西澗》中「無人嘅船飄蕩喺荒野」(野渡無人舟自橫)嘅意象,係意味住國家呢部船無一個人掌舵[13]。據學者阮獻黎,喺代詩歌中韋應物屬「自然」派[註 3]。佢吟詠自然嘅詩幾工巧,當中以自然之靜、山水之美爲主題嘅詩最優秀。呢種詩風繼盛唐嘅孟浩然王維之後,佢同柳宗元一齊並稱爲「王孟韋柳」,係唐代山水田園詩嘅四位代表。傳落嘅有《韋蘇州集》10卷(又叫《韋江州集》)。

韋應物有段唔尋常嘅人生,開頭時放䠋(fong3 pe5),之後又變虛心,畀心機讀書,然後變成清廉嘅官員,對民衆嘅疾苦曉得幾透。呢兩種極端嘅生活方式影響到佢思想同詩歌藝術嘅複雜性[5]

縱觀佢嘅全部作品,寫隱士嘅閒暇同心情嘅詩佔大份,如呢啲:《寄全椒山中道士》、《東郊》、《答李儋》、《效陶彭澤》、《幽居》

遞種類型嘅詩雖少啲,但亦有幾多作品。佢嘅感慨詩有好多讚做「滿腔憂時憫世」[1],如呢啲:《登高望洛城作》、《登重玄寺閣》、《擬古詩十二首》

另外,佢亦有啲詩對統治階級有明顯嘅憤恨,同時深切同情勞動人群,如詩《廣德中洛陽作》、《答崔都水》、《雜體五首》

喺描寫方面,散落喺佢嘅詩度有好多「極美而精細」嘅畫面,可以喺呢啲詩中搵到:《滁州西澗》、《賦得暮雨送李曹》、《東郊》、《長安遇馮著》、《夕次盱眙縣》[1]

另外,佢寫嘅一類有關朋友同熟人嘅詩亦幾受注意,因爲呢啲詩好熱切、透露真情,如呢啲詩:《淮上喜會梁川故人》、《寄李儋元錫》、《初發揚子寄元大校書》、《送汾城王主簿》、《秋夜寄丘員外》等等。

喺藝術上,佢嘅詩好似陶潛,得到白居易蘇軾讚賞(特別係五言詩)[14];喺研究界評價佢風格淡遠清麗,所謂「簡而不陋,美而不豔」[15][註 4]

詩作舉例[編輯]

韋應物嘅作品有五言古詩(《幽居》)、五言絕句(《聞雁》)等。

滁州西澗
獨憐幽草澗邊生,
上有黃鸝深樹鳴。
春潮帶雨晚來急,
野渡無人舟自橫。
聞雁
故園渺何處?
歸思方悠哉。
淮南秋雨夜,
高齋聞雁來。
賦得暮雨送李曹
楚江微雨裏,建業暮鐘時。
漠漠帆來重,冥冥鳥去遲。
海門深不見,浦樹遠含滋。
相送情無限,沾襟比散絲。
淮上喜會梁川故人
江漢曾為客,相逢每醉還。
浮雲一別後,流水十年間。
歡笑情如舊,蕭疏鬢已斑。
何因北歸去,淮上對秋山。
送汾城王主簿
少年初帶印,汾上又經過。
芳草歸時徧,情人故郡多。
禁鐘春雨細,宮樹野煙和。
相望東橋別,微風起夕波。
秋夜寄丘員外
懷君屬秋夜,
散步詠涼天。
山空松子落,
幽人應未眠。
寄全椒山中道士
今朝郡齋冷,忽念山中客。
澗底束荆薪,歸來煮白石。
欲持一瓢酒,遠慰風雨夕。
落葉滿空山,何處尋行跡?
幽居
貴賤雖異等,出門皆有營。
獨無外物牵,遂此幽居情。
微雨夜來過,不知春草生。
青山忽已曙,鳥雀繞舍鳴。
時與道人偶,或隨樵者行。
自當安蹇劣,誰謂薄世榮。

[編輯]

  1. 1.0 1.1 關於出世年,啲史書、墓誌銘都無記。傅璇琮據韋應物《京師叛亂寄諸弟》:「弱冠遭世難,二紀猶未平」,同埋姚寬《西溪叢語》卷下:「當天寶十五載六月,明皇避安祿山之難,是年,應物年二十 。」,考證出佢嘅生年係開元二十五年(737年)左右。至於死年,墓誌銘記話「尋領蘇州刺史。下車周星,豪猾屏息,方欲陟明,遇疾終於官舍。池雁隨喪,州人罷市。素車一乘,旋於逍遙故園。……以貞元七年十一月八日窆於少陵原,禮也。」傅璇琮推測嘅「韋應物大約在貞元七、八年間(791— 792)卒於蘇州」講法同墓誌銘大致吻合。
  2. 傅璇琮喺《唐代詩人叢考·韋應物繫年考證》以繁複嘅考證工夫確認韋應物任蘇州刺史嘅時間應喺貞元四年,推翻過去貞元二年嘅講法。
  3. 「自然」派嘅主張同「社會」派調轉。呢派嘅各成員認爲無任何改造到時勢嘅機會,於是厭世,想隱居避世。呢派嘅人受影響嘅風氣來自陶潛謝靈運中文謝靈運,又受影響於,於是樂於歌頌閒散之趣同造化美景。「自然」派嘅代表,除外韋應物,仲有孟浩然柳宗元同埋王維。據阮獻黎《中國文學史大綱》第443頁、第455頁。
  4. 對於詩《寄全椒山中道士》同埋《滁州西澗》,學者阮獻黎讚話「都係清雅、情感曠達而隱約」(據《中國文學史大綱》第452頁)。

[編輯]

  1. 1.0 1.1 1.2 1.3 據陳黎保《文學辭典》(新版)第1990頁~1991頁。
  2. 據陳黎保《文學辭典》新版第1990頁、中國社科院文研所《中國文學史》第二冊第160頁。
  3. 韋應物《贈舊識》:「少年遊太學,負氣蔑諸生。蹉跎三十載,今日海隅行。」
  4. 4.0 4.1 4.2 韋應物《逢楊開府》:「少事武皇帝,無賴恃恩私。身作里中橫,家藏亡命兒。朝持樗蒲局,暮竊東鄰姬。司隸不敢捕,立在白玉墀。驪山風雪夜,長楊羽豬時。一字都不識,飲酒肆頑癡。武皇升仙去,憔悴被人欺。讀書事已晚,把筆學題詩。兩府始收跡,南宮謬見推。非才果不容,出守撫惸嫠。忽逢楊開府,論舊涕俱垂。坐客何由識,唯有故人知。」
  5. 5.0 5.1 據中國社科院文研所《中國文學史》第二冊第160頁。
  6. 6.0 6.1 6.2 6.3 6.4 據陳仲金《唐詩》第100頁。
  7. 據《唐才子傳》:「及崩,始悔,折節讀書。為性高潔,鮮食寡欲,所居必焚香掃地而坐,冥心象外。」
  8. 8.0 8.1 據易君左《中國文學史》第449頁、第451頁。
  9. 韋應物《示從子河南尉班》詩前小序:「永泰中,余任洛陽撲抶軍騎,時從子河南尉班亦以剛直為政,俱見訟於居守,因詩示意,府縣好我者豈曠斯文。」孫望《韋應物事跡考述》:「大約在代宗廣德二年(公元764年),他就到洛陽謀到了縣丞的職司」。
  10. 沈作喆作嘅補傳:「永泰中為洛陽丞。兩軍騎士倚中貴人勢,驕橫為民害,應物疾之,痛繩以法,被訟,弗為屈。棄官養疾同德精舍。」
  11. 韋應物詩《寄諸弟》,題下自注:「建中四年十月三日,京師兵亂,自滁州間 ……」
  12. 韋應物《登郡樓寄京師諸季淮南子弟》:「始罷永陽守,復臥潯陽樓。懸檻飄堞寒雨,危侵江流。迨茲聞雁夜,重憶別離秋……」,永陽守即滁州刺史。
  13. 據吳經熊《唐詩四季》第162頁。
  14. 據阮獻黎《中國文學史大綱》第452頁,同埋易君左《中國文學史》第449頁。
  15. 據中國社科院文研所《中國文學史》第二冊第163頁。

參攷資料[編輯]

  • 孫望. .
  • 傅璇琮. 代詩人叢考·韋應物系年考證.
  • 丘丹. .
  • 袁行霈、羅宗强. 四編 隋唐五代文學:第五章 大曆詩風. . 高等教育出版社.
  • 辛文房. 四:韋應物傳. .
  • Trần Lê Bảo陳黎保) (2004年). . Từ điển văn học(漢喃:辭典文學;中譯:文學辭典 (越南文). 世界出版社(家出版世界Nhà xuất bản Thế giới). {{cite book}}: templatestyles stripmarker in |publisher= at position 7 (help); templatestyles stripmarker in |title= at position 79 (help)
  • Wu, John C. H (1972年). 《The Four Seasons of Tang Poetry》 (英文). Charles E.Tuttle.
    • 吳經熊(著);徐誠斌(譯) (2003年). . 洪範書店.
  • 余冠英錢鍾書、范寧. . . 中國社會科學院文學研究所.
    • Lịch sử văn học Trung Quốc(漢喃:歷史文學中國 (越南文). 越南敎育出版社(家出版敎育越南Nhà xuất bản Giáo dục Việt Nam). 1993年. {{cite book}}: templatestyles stripmarker in |publisher= at position 9 (help); templatestyles stripmarker in |title= at position 90 (help)
  • Trần Trọng Kim陳仲金) (1974年). Đường thi(唐 (越南文). 新越出版社(家出版新越Nhà xuất bản Tân Việt). {{cite book}}: templatestyles stripmarker in |publisher= at position 7 (help)
    • Trần Trọng Kim(陳仲金著);Tản Đà傘沱譯) (1989年). Thơ Đường(漢喃:詩唐;中譯:唐詩 (越南文). 少兒出版社(家出版𥘷Nhà xuất bản Trẻ). {{cite book}}: templatestyles stripmarker in |publisher= at position 7 (help); templatestyles stripmarker in |title= at position 73 (help)
  • 易君左 (1973年). . 華聯出版社.
    • 著:易君左;譯:Huỳnh Minh Đức(字未定,僅參攷:滎明德) (1992年). . Văn học sử Trung Quốc(漢喃:文學史中國 (越南文). 少兒出版社(家出版𥘷Nhà xuất bản Trẻ). {{cite book}}: templatestyles stripmarker in |publisher= at position 7 (help); templatestyles stripmarker in |title= at position 85 (help)
  • Nguyễn Hiến Lê阮獻黎) (1997年). Đại cương văn học sử Trung Quốc(漢喃:大綱文學史中國;中譯:中國文學史大綱 (越南文). 少兒出版社(家出版𥘷Nhà xuất bản Trẻ). {{cite book}}: templatestyles stripmarker in |publisher= at position 7 (help); templatestyles stripmarker in |title= at position 95 (help)
  • 前野直彬註解. 詩選 (日文). 岩波書店.