跳去內容

韓國公務員考試文化

加新連結
出自維基百科，自由嘅百科全書

喺韓國，公務員被視為非常穩定嘅工作，所以吸引唔少人（特別係大學畢業生）去應考，所以亦衍生咗好多補習班。好多為咗可以專心讀書嘅人，會直接喺補習班附近住落嚟。而為咗呢啲考生而建嘅「考試院」嘅建築，連同附近嘅餐廳同其他商店演變成「考試村」。

不過，踏入2020年代，有啲媒體就認為，韓國公務員工作已經唔再好似以前咁吸引。

考試熱潮

[編輯]

韓國1997年經歷咗亞洲金融風暴，搞到韓圜大跌，股市崩潰，企業接連倒閉[1][2][3]。跟住喺2008年又有金融海嘯，韓國一度被認為可能會破產，咁就業市場咁差，穩定性高嘅公職變成咗大家追捧嘅金飯碗。之後喺2011年之後出現咗公務員考試熱潮，家長都覺得做公務員有「收入唔錯」、「穩定」、「養老金制度好」、「福利待遇齊全」等優點，考上咗就唔使擔心因為經濟環境或者企業文化被裁員或者被迫退休，公職變成咗大學生搵工嘅首選，甚至公職仲被稱為「神嘅職場（신의 직장）」，考到公職就可以代表光宗耀祖[2][4][5]。所以就算人工比唔上外面，依然吸引咗好多人成為公務員[2][6]。

另一方面，由於韓國輕人文重理工嘅文化，就算係「SKY」三大名校，都好難搵到工，亦令好多人轉移嘗試尋求公務員職位[7]。

其中2018年嘅九級公務員考試大約有1.4萬個名額，但係吸引咗超過20萬人來應考[1]。洛杉磯時報曾經報導過，韓國公務員考試嘅競爭取錄率只有2.4%，比起入哈佛大學（4.59%）更加激烈[8]。

考試班嘅興起

[編輯]

因為越來越多人考公職，所以公職考試補習班順應時勢出現。因為有大量人潮湧入準備考試，搞到韓國公務員考試難度相當高，就算係最低職等嘅公務員都要花1-3年時間備考[2][4]，有啲人甚至十年都考唔到[9]。而呢啲考試入面，最多人考嘅就係9級公務員考試[9]。

有啲補習班會要求考生早上六點起床，先進行點名同士氣喊話，之後就要上整整一日嘅課程、考試同訓練；呢種訓練營式嘅補習班，為咗唔畀學生有鬆懈嘅空間，會進行軍隊式嘅合宿管理。即使日子過得好辛苦，但係好多人仍然會堅持[6]。

另外，呢啲補習班亦有一啲係用來考教師資格試、警察同消防員考試[1][9]，或者考入三星等大型企業[7]等等。

考試村／考試院嘅出現

[編輯]

好多為咗專心讀書嘅人，會選擇直接喺補習班附近長住，而為咗呢啲考生而建嘅「考試院」嘅建築，亦都成為咗韓國特有嘅奇觀──房間內空間好細，大部分只配有床同書桌，咁樣可以減少唔必要嘅開支，準備長期應戰。「考試院」每棟建築入面有上百個單間，數唔清嘅考試院都搞到鷺梁津地區被稱為「考試村」（고시촌），有啲考試院會提供源源不絕嘅白飯、泡麵、泡菜畀住客[10][11][12][7][9]，衣食住行都唔需要離開[13]。

而家首爾有兩大考試村，一個係新林洞考試村，另一個就係鷺梁津考試村[4][2]。在江南開發之前，鷺梁津一直都是連結首爾與全國的水陸交通要塞[3]，70年代末期，本來聚集喺市中心嘅大學重考補習班，因為首爾政府重整市中心，咁好多呢啲補習班就遷咗去較外圍，交通方便又物價低嘅地方「鷺梁津（노량진）」[2][3]。呢度會根據唔同考試有相應嘅補習學院，涵蓋唔同等級公務員試、教師資格試、警察同消防員考試等等。喺高峰時期，鷺梁津附近嘅學院同補習班高峰期有250多間以上[1][3]。甚至有人話，2010年前後嘅鷺梁津已經超越咗1980到1990年代嘅第一波全盛期，氣勢如日中天[6]。喺呢度準備考試嘅人，甚至會出現一個7－11文化，即係朝早7點起身，上堂或補習，去到夜晚11點[9]。

因為考試院唔需要好似其他套房、公寓咁，事先要付出高額嘅按金，最多都係一個月嘅房租作為押金，所以除咗考生，亦有啲離家出嚟工作嘅人同埋老人，都會住喺考試院[10]。另外，考試院亦成為一啲台灣YouTuber開箱嘅題材，有啲YouTuber甚至會分享點樣搵到考試院[14][15]。

飲食／消費文化

[編輯]

喺考試村入面，因為考生用餐需求量極大，但呢啲考生會覺得連食飯嘅時間都唔好浪費，所以就出現咗一排排的杯飯小攤聚集成鷺梁津杯飯街（노량진컵밥거리），拿著杯飯邊讀書邊學習成，或者這好快地食完就再返去讀書，為當地文化嘅特色[2][1]。呢啲杯飯主要包括簡單嘅餐肉、煎蛋、泡菜同埋小菜[3][12][9]。相關嘅餐廳等就如雨後春筍咁冒出嚟，變成咗應試者聚集嘅地方[2][1][6]。

另外，考試村入面仲有一間每月每日三餐嘅平價考試食堂，相對其他地方便宜2-4成嘅超級市場（例如出面賣1000韓圜嘅拉麵，呢度只需要850[13]），只賣港幣6.5（2023年物價）嘅美式咖啡，廉價嘅電子遊樂場、酒館、KTV、K書中心、按摩店、健身室（部分俾人用來訓練體能考警察或消防員）同咖啡廳等[12][1][16][17][9]。其中有部分餐廳甚至提供月票，一個月任食（2022年價格大約係21萬韓圜）[3][17]。另外，位於이데아大廈地下嘅美食廣場，入面有間「比臉大豬排」，連唔係考生嘅首爾人，甚至外國遊客都會特意過嚟[16]。另外，呢啲餐廳亦唔係只係考生成績去幫襯，亦有唔少中年人士或者上班一族去光顧[17]。

部分相關事件／議題

[編輯]
  • 2013年，鷺梁津因為販賣杯飯嘅攤販實在太多，引起執法單位嘅注意；當局為咗保持市容美觀同增加稅收，開始大力取締呢度嘅無照攤販同店鋪，結果引來民眾反彈，最終政府決定喺當地設立合法嘅「鷺梁津杯飯街道」（노량진컵밥거리）[12]。
  • 考試院入面有唔少獨居孤獨死嘅個案，之前仲有獨居者喺考試院入面過世咗一個星期先被發現嘅情況[10]。
  • 由於考試村有好多年輕選民，所以下選舉時不得不額外設立位於考試村嘅臨時投票站[7]。

居住環境

[編輯]

考試院居住嘅環境一般都好細，裏面淨係有一張小小嘅單人床、書桌同小衣櫃，要煮飯就要去公家廚房[9]，比較好嘅考試院會有獨立冷氣、小冰箱同小電視，但係隔音都好差，有窗戶嘅房間已經被視為高級[13][11][10]，甚至有啲考試院，連廁所都要共用[9]。有部份媒體認為，喺唔夠3坪嘅考試院長期居住，會令人自閉抑鬱[11]。

另外，考試院嘅消防設備通常都唔夠，一旦發生火災就好危險。2018年11月，首爾鐘路區有間考試院發生火警，帶走咗七條人命，所以社會上都開始有立法聲浪，要求政府幫助低收入族群加強對考試院嘅消防同出租規範。之後，首爾市政府開始為考試院定明標準，要求限期改善，其中就包括每間房間最少要有7平方公尺，而有獨立衛浴嘅房間要達到10平方公尺。住喺考試院嘅人每個月可以獲得5萬韓元嘅補助，預計可以幫到一萬多名住喺考試院嘅韓國人。另外，首爾市仲會協助考試院裝設滅火設備，並要求考試院改善公共空間[10]。

考試文化衰落

[編輯]

不過，喺2020年代開始，報考人數就開始減少。2022年，好多年輕畢業生報考嘅國家九級公務員，報考人數只有165,524人，比起5年前（2017年）嘅228,368人，減少咗62,844人，跌咗27.5%。咁競爭率都大幅下降。2010年七級公務員嘅競爭率係115.4比1，九級公務員係61.6比1，而七級考試嘅競爭率就降到42.7比1，九級就係29.2比1，全部都創咗近年最低紀錄[2]。

而就算考到嘅，都有唔少人想辭職。除咗人工比唔上出面，另外亦因為缺乏成長機會、老派階層文化、缺乏工作生活平衡[2][18][19][20]。仲有專家話千禧一代（1981-1995年出生嘅人）同Z世代（1996-2005年出生嘅人）更加鍾意做一些高薪同有挑戰性嘅工作[19]。另外，越嚟越多年輕人放棄咗所謂嘅穩定，轉而追求自我實現、個人幸福，同埋希望通過創業一舉成功[16]。

除咗公務員職位無以前咁搶手，2020年嘅武漢肺炎疫情，亦令到考試村唔再好似以前咁多人[2]。其中規模最大嘅考試食堂「高句麗食堂」亦因為老闆健康惡化同當地活動嘅考生人數大幅減少而結業[3]。2022年，韓國媒體YTN喺當地取材報道，甚至展現咗十室九空嘅鷺粱津，好多杯飯店去到中午都尚未開門，路上行人也顯著減少[16]。

有觀點認為，近年就算係下榻考試村嘗試考取公職，都已經係唔細嘅消費，所以有啲人開始選擇以線上課程取代補習班授課、利用住家附近嘅圖書館取代考試村嘅生活[3]。

相關影視作品

[編輯]
  • 電視劇《獨酒男女》：描繪鷺梁津考試村[3]
  • 電視劇《他人即地獄》：以「考試院」為背景，但住客包括殺人魔陰沈牙醫，笑裡藏刀管理員大嬸，以驚悚為主題[11]。

睇埋

[編輯]

參考來源

[編輯]
  1. ↑ 1.0 1.1 1.2 1.3 1.4 1.5 1.6 陳靜雅。〈走入首爾考試村！韓國人為做公務員日溫書16小時 3至10年才「出村」！〉。{{cite web}}: CS1 maint: url-status (link)
  2. ↑ 2.00 2.01 2.02 2.03 2.04 2.05 2.06 2.07 2.08 2.09 2.10 〈跌落「神壇」的韓國公職：曾比大企業還搶手！如今卻有近半年輕公務員想離職？｜聖依／踏上韓國旅夢｜換日線〉。《換日線 Crossing》 (臺灣中文)。喺2025-05-21搵到。
  3. ↑ 3.0 3.1 3.2 3.3 3.4 3.5 3.6 3.7 3.8 聯合新聞網。〈翻轉首爾：考試一輩子的韓國鷺梁津「考試村」〉。《轉角國際 udn Global》 (中文)。喺2025-05-21搵到。
  4. ↑ 4.0 4.1 4.2 〈失落的「考公」夢：韓國人為何不再一窩蜂地去當「神」了？ | 端傳媒 Initium Media〉。theinitium.com (繁體中文)。2023-12-18。喺2025-05-21搵到。
  5. ↑ 志祺七七 X 圖文不符 (2023-11-09)，《韓國曾經的「神職業」！千辛萬苦考上公務員，如今卻有近半年輕人想離職？｜志祺七七》，喺2025-06-01搵到
  6. ↑ 6.0 6.1 6.2 6.3 〈韓國工作都月入10萬台幣？別傻了...「名校畢業即失業、蝸居考公務員」，比22K還慘的「88世代」〉。《商周財富網》 (臺灣中文)。喺2025-05-21搵到。
  7. ↑ 7.0 7.1 7.2 7.3 編輯, TNL (2015-06-02)。〈為了有份好工作，數萬名韓國人住進「考試村」〉。《TNL The News Lens 關鍵評論網》 (中文)。喺2025-05-21搵到。
  8. ↑ X (2019-02-06). "In a tough market, young South Koreans vie for the security of government jobs". Los Angeles Times (美國英文). 喺2025-05-31搵到.
  9. ↑ 9.0 9.1 9.2 9.3 9.4 9.5 9.6 9.7 9.8 Mill MILK (2023-08-11)，《#MM｜走入首爾考試村！韓國人為做公務員日溫書16小時 3至10年才「出村」！多達250間補習社＋$1,200港元月票任食考試食堂 成物價最平社區 韓國公務員曾被稱「神的職業」｜#旅遊上癮 #4K》，喺2025-05-21搵到
  10. ↑ 10.0 10.1 10.2 10.3 10.4 〈韓國考試院租屋文化-韓國(Creatrip)〉。Creatrip (臺灣中文)。喺2025-05-21搵到。
  11. ↑ 11.0 11.1 11.2 11.3 〈在不足 3 坪的韓國「考試院」蝸居，是怎樣一種體驗？〉。{{cite web}}: CS1 maint: url-status (link)
  12. ↑ 12.0 12.1 12.2 12.3 陳慶德 (2022-05-23)。〈首爾「考試村」鷺梁津：嚮往鐵飯碗的韓國年輕人一生必經之地〉。《TNL The News Lens 關鍵評論網》 (中文)。喺2025-05-21搵到。
  13. ↑ 13.0 13.1 13.2 Mill MILK (2023-08-11)，《#MM｜走入首爾考試村！韓國人為做公務員日溫書16小時 3至10年才「出村」！多達250間補習社＋$1,200港元月票任食考試食堂 成物價最平社區 韓國公務員曾被稱「神的職業」｜#旅遊上癮 #4K》，喺2025-05-31搵到
  14. ↑ 溜溜花료료화 (2023-06-20)，《韓國住所Room Tour✨如何找韓國考試院大公開🙌🏻｜韓國經驗談系列｜溜溜花료료화》，喺2025-05-21搵到
  15. ↑ 《韓國考試院room tour 大公開！3坪不到真的可以住嗎？｜阿侖 Alun》 (英文)，喺2025-05-21搵到
  16. ↑ 16.0 16.1 16.2 16.3 〈「比臉大豬排」消失了！全韓最大考試村鷺粱津不復往日繁華，韓網友反而拍手慶賀：「這才是正常」〉。《KSD 韓星網》 (繁體中文)。喺2025-05-21搵到。
  17. ↑ 17.0 17.1 17.2 小白Cloudiecandy、背包豬Roasterpig。〈鷺梁津水產市場附近景點2024：品嚐鷺梁津考試院平民自助餐+感受韓國地道文化 | All You Can Eat Restaurant in Noryangjin〉。《花小錢去旅行》 (香港中文)。喺2025-05-21搵到。
  18. ↑ 〈韓國公務員鐵飯碗生鏽？近兩年辭職人數翻倍〉。Yahoo News (中文)。2024-01-31。喺2025-05-21搵到。
  19. ↑ 19.0 19.1 〈"铁饭碗"不香了？韩国公务员报考人数持续下滑，政府放宽年龄限制〉。{{cite web}}: CS1 maint: url-status (link)
  20. ↑ 〈「傻子才當公務員」 空蕩蕩的韓國考試村〉。vocus.cc (繁體中文)。2024-09-27。喺2025-05-21搵到。
由「https://zh-yue.wikipedia.org/w/index.php?title=韓國公務員考試文化&oldid=2278414」收