音板

音板（英文：soundboard）係弦樂器負責擴音嘅主要部分，原理係透過增加震動嘅表面面積來增強音量；佢亦都負責畀件樂器有佢獨有嘅音色，通常係木造，好嘅音板會用實木（不過大塊嘅可能要幾塊細嘅用膠水黐埋），冇咁好嘅可以係夾板。

木結他嘅音板係前面有竉嘅木製部分，鋼琴嘅音板喺入便。

因為音板好大程度上決定咗樂器嘅音質，接觸式拾音器通常都係黐喺音板；亦都有喺音板後面吊咪嘅做法。

唔同樂器嘅音板，形狀唔一定係一樣；例如，鋼琴同小提琴嘅音板有少少拱形，物理上令啲聲放得大聲啲，結他嘅音板就係平嘅。

書目

• 許紹文 (2021年10月11號)。《鋼琴調音課程1、鋼琴歷史、結構、生產、參觀鋼琴工廠》。喺2023年1月4號搵到。
• 湯福泉 (2011年12月22號)。《為何每部鋼琴（就算同一 Model）音色都不一樣？》 (短片)。喺2023年1月2號搵到。