頭版 (網頁)

  想搵第二個意思嘅話，請睇頭版 (搞清楚)。

  提示：呢篇文講嘅唔係版頭。

頭版（英文：home page），又叫首頁，喺萬維網，係種瀏覽器自動打開嘅網頁，通常指網站嘅入口網頁，亦即係打開網站之後睇到嘅第一頁；不過，喺最初設計萬維網喺陣，頭版其實本來打算係每個用家自訂，類似現時嘅書籤。

網站頭版

一個網站嘅頭版係乜嘢，主要係取決於網站嘅伺服器點樣解析（resolve）嗰個網站嘅根目錄（/）。喺早期嘅網頁伺服器，如果唔做任何設定，用家打一個域名，出嚟嘅就係對應網站嘅根目錄 嘅檔案目錄，亦即係出一大堆可以點擊嘅檔案名（可能有埋更新日期等等嘅中繼資料）；但係網站管理員通常可以喺根目錄擺一個特定名嘅電腦檔案，咁伺服器就會顯示嗰個檔案嘅內容，而唔會顯示檔案目錄。呢個檔案嘅內容就係所謂頭版。

但係咁並唔代表頭版一定係一個文檔，因為好早已經有CGI，所以頭版好早已經可能係由程式生成；呢啲幕後嘅程式有時會根據用家嘅語言設定或者地理位置等等，決定顯示或者跳轉到唔同版本嘅頭版。

名

頭版本來係指報紙、雜誌或者書嘅第一版，後來引申用咗喺互聯網。喺臺灣，可以見到網站頭版以英文音譯做烘培機、烘培雞，用喺非正式嘅場合。