頻率學派推論

頻率學派推論（參見英文：frequentist inference）係一種舊時嘅統計學詮釋方法。根據呢種理解，推論統計嘅作用在於測試某件事有冇發生。頻率學派嘅研究者做嘅嘢係將個試驗重複若干次，再睇吓喺呢 N 次實驗當中，有幾多次得出撐個假說嘅結果。呢種做法俾人詬病，話用佢得到嘅結果會受實驗嘅重複次數影響。

概論

内文：概率

根據頻率學派嗰套諗法，某件事件發生嘅概率係指緊件事嘅長期相對頻率。精確定義即係話，假如將某場實驗重複無限咁多次，件事嘅概率係指緊佢發生嘅次數嘅比例嘅數學極限，即係

$P(A)=\lim _{n\to \infty }{\frac {f_{n}(A)}{n}}$

當中：

• $P(A)$ 表示事件 $A$ 嘅概率；
• $f_{n}(A)$ 表示喺頭 $n$ 次實驗中，事件 $A$ 發生咗幾多次（頻率）；
• $\lim _{n\to \infty }$ 係話隨住實驗次數 $n$ 趨近無限大，睇個相對頻率會唔會迫近某個值。

譬如依家掟銀仔，假設個銀仔冇出千，出公出字機率一樣咁大都係 50%，而噉講意思係話假想個銀仔掟無限次，即係 n 趨近無限大，而出公嘅次數會佔咗一半咁多。

批評

頻率學派備受學者批評，例如詬病佢處理唔到極罕有事件。

由頻率派思維衍生出嚟嘅假說檢定法，亦被指係引起咗 p-hack 等嘅問題。

睇埋

• 貝葉斯統計