食物選擇

嚟買餸嘅人：「嗯... 今晚同屋企人食乜嘢好呢？」

二〇一九年一日，喺香港一角有人擺檔賣零食，呢啲嘢食得多好易肥。

食物選擇係一系列嘅跨學科研究，目的係想理解人類選擇食物嗰陣嘅決策，尤其係講緊呢啲選擇可以受乜嘢因素影響，當中因素包括有生理、心理、空間、文化、社會環境、經濟條件... 等諸多方面嘅考量。呢啲研究有好多實用價值，譬如世界多地嘅政府都想探討人點解會偏好某啲食物，尤其係有冇方法可以誘使普羅大眾食得健康啲－即係想佢哋多啲揀新鮮蔬菜同水果嚟食，同時少啲食垃圾食物。

食物選擇研究嘅目標，好多時都係想鼓勵人飲食均衡，同預防式醫療亦有一定關係。

生理因素

睇埋：味覺同味覺皮層

味覺系統嘅特性會左右人點樣揀食物：有研究指，消費者普遍將味道視為影響食物選擇嘅首要因素。而對苦味嘅感知能力嘅遺傳差異，被指會影響人願唔願意食苦嘅蔬菜，進而影響埋佢哋對甜味同食物脂肪含量嘅偏好。

甜味偏好係指人對甜味食物嘅喜好程度。心理學同營養學研究指，人類天生就對甜味有正面嘅反應，呢點喺細路身上尤其明顯－細路往往比大人更好甜。而且就算喺大人之間，甜味偏好程度亦存在明顯嘅個體差異，有啲人對甜味零舍敏感，傾向揀高糖嘢嚟食，而噉嘅飲食習慣被指會增加肥胖嘅風險，亦同肥胖相關嘅疾病（例如糖尿）有相關。因此，甜味偏好廣泛被視為食物選擇同公共健康上嘅重要課題。

環境因素

睇埋：食物沙漠、食物沼澤同輕推理論

好似城市設計等嘅環境因素，都可以影響啲人會揀咩嚟食。

食物沙漠係指緊某笪地區冇乜容易負擔又有營養嘅食物：事實表明，唔同社區空間特性都唔同；有啲社區比較多快餐店，而快餐店成日提供埋晒一啲高脂肪又少膳食纖維嘅食物，又有啲社區較少超市，而超市係新鮮蔬菜同生果嘅重要來源；若果健康食品易搵－例如住處近超市，附近少快餐店－人比較傾向會食得健康啲。事實係研究指，住喺食物沙漠嘅人比較容易出現肥胖、糖尿病同埋心血管疾病等嘅問題。因此唔少研究者都開始同城市規劃等領域嘅工作者合作，設計城市同社區嗰陣將食物嘅可及度納入考慮範圍之內。

二〇二一年影到香港一角有間麥當勞。

食品份量大傾向提升進食量：例如有美國做嘅研究指，餐廳同廚房上菜嗰陣上大份啲，會令到啲人食更多嘢，即使啲食物望落唔好食，結果都係一樣。譬如有研究檢驗「上大份啲，進食量會多啲」呢個效應，發現就算上咗嘅食物係擺咗兩個星期、已經唔新鮮嘅爆谷，呢個效應依然會出現。

社經因素

睇埋：食物價格同糧食通脹

收入同教育程度，會影響人有冇資源買高質素食物，亦會影響佢對有營養替代品嘅認識，兩樣嘢都會進而左右食物選擇。一般嚟講，社經地位同食物質素成正比，社經地位高食物嘅質素就高，而相反嚟講社經地位低，食物嘅質素亦會低啲。對於低收入嘅家庭嚟講，決定買唔買某種食物，可能主要取決於價錢，而非味道或者營養質素。呢點被指係局部解釋到點解低收入群體預期壽命會比較短。同樣地，教育程度高通常表示個人對食物嘅功能有更高期望，亦更傾向避開食物添加劑。

同傳統食物比較，有機食品嘅成本較高；收入低嘅人可能較難負擔或取得呢啲食品。

睇埋

• 公共健康
• 膳食纖維
• 營養學
• 營銷學
• 烹飪

文獻

• Locke AE, Kahali B, Berndt SI et al. (2015) Genetic studies of body mass index yield new insights for obesity biology. Nature, 518, 197-206，有研究指，人嘅體重遺傳度高達 80% 咁多，而體重同食物選擇息息相關。

拎

• （英文）Society for the Study of Ingestive Behavior (SSIB)（譯：進食行為研究會），呢個學會雲集生理學、動物行為學、營養學同埋社會科學等領域嘅專家，一齊研究食物選擇相關嘅行為。
• （英文）感官系統 | 味覺系統，網上教科書，講人腦係點處理味覺資訊嘅，期間提到味覺皮層。