飲食業

酒樓廚房準備緊

新城市廣場美心酒樓

飲食業又叫餐飲業，係指以製造、供應同銷售嘢食及嘢飲為主要業務嘅行業，涵蓋餐廳、食肆、酒樓、快餐店、咖啡室、外賣服務，以及相關嘅食品加工同餐飲服務。飲食業喺唔同社會入面都扮演住重要角色，除咗滿足基本飲食需要之外，亦同文化傳承、社交活動同經濟發展息息相關。 隨住社會發展同消費模式改變，飲食業嘅經營形式亦唔停咁轉。由傳統家庭式經營、街頭小食，到連鎖餐飲集團同網上外賣平台，飲食業逐漸變得多元化同專業化。根據香港統計處嘅季節性統計調查，本地食肆的收益及購貨額會隨季度、消費模式同市場環境而波動，顯示行業喺面對經濟變化同社會需求時不斷調整營運策略。近年，行業亦受到科技、勞動市場變化同公共衞生因素影響，例如電子落單、自助點餐、外送平台普及，以及對食品安全同可持續發展嘅關注，進一步改變咗飲食業嘅運作模式。

香港飲食業特色

蘭桂坊大排檔

香港飲食業以多元化同高度密集，融合中西飲食文化，形成獨特嘅餐飲生態。香港特區政府嘅資料指出，本港約有接近萬八間食肆，僱用約 224,300 人，佔本地生產總值中佔有重要比重。根據香港政府統計處出版嘅《服務業統計摘要》，餐飲服務業喺 2022 年 所產生嘅增加價值大約係 347 億港元，相等於香港本地生產總值嘅 約 1.3 %；而喺疫情爆發之前嘅 2019 年，增加價值超過 500 億港元，佔當年本地生產總值嘅 約 2 %。

款式由街頭地道小食、茶餐廳，同至米芝蓮級高級餐廳應有盡有，反映出香港人對飲食嘅高需求同包容性。由於香港生活節奏急速，外出用餐同外賣服務相當普遍，飲食業喺市民日常生活中佔有重要位置。

香港飲食業亦受到租金高昂、勞動力短缺同消費模式轉變等因素影響，令業界不斷調整經營模式，例如發展外賣平台、精簡菜單、引入科技提升效率等。同時，政府監管、食品安全標準同旅遊業發展，亦對飲食業嘅運作同發展方向產生重要影響。