香港熊貓

香港熊貓目前一共有6隻，其中4隻由中共中央贈送，另外2隻喺香港出世。香港先後有3批熊貓由中央贈送，每批都有一隻公同一隻乸。第一對安安同佳佳喺1999年嚟香港，都已經過身。第二對熊貓樂樂同盈盈喺2007年嚟香港，喺2024年8月15號生咗龍鳳胎，帶嚟第一批喺香港出世嘅熊貓。第三對安安同可可喺2024年嚟香港。除咗第二批因為到香港嗰陣得編號而喺香港改名之外，所有贈港熊貓都保留咗喺中國大陸嘅原名。

目前，所有香港熊貓都住喺香港海洋公園入面，並且由公園嘅護理員照顧起居。喺展覽方面，海洋公園海濱樂園嘅「香港賽馬會四川奇珍館」同「大熊貓之旅」係熊貓嘅居所兼展覽場地。

在世熊貓

圖片	名	性別	出生日期	簡介
	樂樂	公	2005年8月8號	2007年4月27號贈送到香港嘅第二對熊貓之一，為慶祝香港主權移交十週年。個名經由香港人從提名比賽入面挑選出嚟，嚟港之前得編號606。常駐場館係大熊貓之旅。
	盈盈	乸	2005年8月16號	2007年4月27號贈送到香港嘅第二對熊貓之一，為慶祝香港主權移交十週年。個名經由香港人從提名比賽入面挑選出嚟，嚟港之前得編號610。常駐場館係大熊貓之旅。
	可可	乸	2019年6月26號	2024年9月26號贈送到香港嘅第三對熊貓之一。經過提名比賽決定保留原名。常駐場館係香港賽馬會四川奇珍館。
	安安 （第二代）	公	2019年6月28號	2024年9月26號贈送到香港嘅第三對熊貓之一。經過提名比賽決定保留原名。常駐場館係香港賽馬會四川奇珍館。
	家姐	乸	2024年8月15號 凌晨2點05分	樂樂同盈盈嘅龍鳳胎仔女，民間暫時叫佢「家姐」。
	細佬	公	2024年8月15號 凌晨3點27分	樂樂同盈盈嘅龍鳳胎仔女，民間暫時叫佢「細佬」。

過身熊貓

圖片	名	性別	出生日期	逝世日期	簡介
	佳佳	乸	1978年7月28號	2016年10月16號	最長壽圈養熊貓。1999年定居香港，2016年過身。
	安安 （第一代）	公	1986年8月	2022年7月21號	1990年作為親善大使出訪新加坡。 最長壽嘅圈養熊貓公，1999年定居香港，2022年過身。