香港海洋公園水上樂園

出自維基百科,自由嘅百科全書
  呢篇文講2021年開張嘅第二代水上樂園。想搵已經執咗嘅第一代水上樂園嘅話,請睇香港海洋公園水上樂園 (第一代)

香港海洋公園水上樂園英文Water World, Ocean Park Hong Kong)係香港嘅水上樂園。係亞洲第一個並且唯一一個全年365日、全天候開放嘅臨海水上樂園,樂園設有五個主題區域,共有27個室內同戶外玩樂設施。水上樂園位於香港南區大樹灣,由香港海洋公園所擁有。水上樂園興建工程喺2014年展開,經多次宣佈延期落成之後,園方曾經表示推斷落成時間為2019年冬天,但因為工程問題再推遲至2021年開幕[1]。2021年6月24號,園方公佈水上樂園嘅正式官方名為「水上樂園」(英文Water World[2]。水上樂園嘅原址為海洋公園嘅集古村、雀鳥天堂、節慶活動用地同公園位於山上(而家稱為「高峰樂園」)部份嘅出入口,以上設施喺2011年開始關閉並陸續清拆以配合水上樂園嘅工程[3]。新水上樂園喺2021年9月21號正式開幕。

2021年12月1號開始,水上樂園改為每個禮拜開放五日(逢禮拜三、四休園,公眾假期除外)直至另行通知。

收費[編輯]

要注意海洋公園嘅入場費係唔包括水上樂園嘅入場費,調返轉都係一樣。

門票[編輯]

水上樂園門票採用動態定價系統,售價將根據之後60日嘅季節性因素、禮拜六日或公眾假期、而變動價格。

  • 成人門票:HK$320-460
  • 小童門票:HK$225-280
  • 長者同合資格殘疾人士門票:HK$150

水上通行證[編輯]

有啲玩樂設施可能要用30至90分鐘排隊,如果唔想排咁耐隊,可以另外加錢買快證,享用優先使用服務。水上通行證 - Lite,可以享用設施內自選最多4次嘅優先使用服務,水上通行證 - Pro,可以享用設施嘅無限次優先使用服務。

  • 水上通行證 - Lite:HK$213
  • 水上通行證 - Pro:HK$298

儲物櫃[編輯]

三款儲物櫃提供按日收費嘅自助物品寄存服務,可以喺租用嗰日重覆開啟使用。

標準儲物櫃(1-2人) 家庭儲物櫃(3-4人) 特大儲物櫃(5人或以上)
價錢 每日HK$120 每日HK$200 每日HK$280
尺寸(長x闊x深) 41 x 28 x 40 厘米 55 x 28 x 40 厘米 83 x 38 x 40 厘米

停車場車位[編輯]

  • 禮拜一至五嘅非繁忙日子:每日HK$200
  • 禮拜六、日、公眾假期同繁忙日子:每日HK$250

主題區域[編輯]

歡樂堡礁[編輯]

神秘國度嘅探索之旅從「歡樂堡礁」臨海而建嘅廣闊區域開始。可以沿住海濱散步並享受海風迎送,或者立即投入刺激好玩嘅水上樂園之旅!抵達水上樂園廣場之後,會有嚮導送上熱烈歡迎,並準備一連串精彩體驗。由解構大自然嘅神秘密碼開始,就好似歡樂堡礁嘅符號一樣,逐步拆解呢個由「魚」同「草」結合而成嘅珊瑚歡樂世界!

躍動流域[編輯]

將「歡樂」同「水」兩個符號合而為一,就係表達「躍動流域」裏愉快體驗嘅最佳方法。玩家可以挑戰各個令人血脈沸騰嘅滑梯裝置!旋風雙子梯同急轉雙子梯上感受旋轉急彎帶嚟嘅快感;八彩天梯上較量衝刺;享受神秘迷沖同急流漩渦帶嚟嘅震撼體驗!亦可以同朋友或屋企人坐上巨型橡皮筏,暢快噉漂流到迷失部落。

迷失部落[編輯]

「迷失部落」嘅神秘符號由「人」同「山」組成,代表隱藏於神秘國度深處嘅失落文明。流水從四面八方湧進,為坃家嘅冒險之旅帶嚟更多樂趣。嚮導將教授大家衝浪嘅技術。亦可以喺天海灣嬉水,或者同細路喺威威水地帶度玩。更可以喺漂流探秘嘅「迷失部落」坐喺水泡上面漂浮,擴闊對神秘國度嘅認知。

冒險灣岸[編輯]

就好似「冒險灣岸」嘅符號一樣,「冒險灣岸」係一個以「水」同「樹」所構成嘅神秘綠洲。能夠感受隱藏喺自然中嘅海洋力量。「冒險灣岸」係一個熱帶天堂,可以喺呢度享受陽光,亦可喺湧浪灣衝浪。沿住激流旅程順流而下,更可以喺映灣小屋中輕鬆一下,亦可以喺灣岸小食買嘢食。

絕嶺深谷[編輯]

企響山谷之巔,可以望到成個深谷同海洋,咁驚心動魄嘅主題區域最能夠吸引勇於挑戰極限嘅玩家。「絕嶺深谷」由象徵「能量」同「水」嘅神秘符號組成,代表咗驚險體驗嘅開始。到達山頂之後,玩家會喺勇者之顛同深谷飛瀑中挑戰極速飛墜嘅震撼刺激,喺極速迴環同沖天瀑布中橫衝直撞,直至進入迷失部落。

玩樂設施[編輯]

設施名 簡介 主題區域 室內/戶外 身高限制 體重限制 設施限制
激流旅程 玩家沿住戶外漂流旅程,可以玩噴射水槍、倒水桶、拱形噴霧等互動水上設施,去到終點可以睇到無邊際壯麗嘅海景。 冒險灣岸 戶外 冇限制 冇限制
  • 細路要由一位大人陪住玩
  • 嚴禁跳水
  • 唔識游水或游得唔叻要着救生衣
天海灣 室內造浪池可以造出多種人造浪模式,當中包括猛烈澎湃嘅雙鑽浪,大家可以盡情投入唔同嘅感官體驗!半透明天幕設計更加能夠透入和暖溫柔嘅陽光,感受微風輕拂嘅陽光。天海舞台設有特大LED屏幕,早晚都可以上演各類精彩嘅娛樂節目。 迷失部落 室內 冇限制 冇限制
  • 細路要由一位大人陪住玩
  • 嚴禁跳水
  • 唔識游水或游得唔叻要着救生衣
漂流探秘 玩家可懶洋洋噉坐喺水泡上面慢慢漂流,穿越四個唔同嘅主題區,展開室內漂流之旅。先喺熱帶雨林中感受一股霧氣撲面而來,跟住會見到由雨水幻化成色彩斑斕嘅彩虹,最後置身於北極冰洞,享受同家人、朋友嘅美好時光。 迷失部落 室內 冇限制 冇限制
  • 細路要由一位大人陪住玩
  • 嚴禁跳水
  • 唔識游水或游得唔叻要着救生衣
湧浪灣 玩家可以喺戶外欣賞南區海岸美景,享受多種唔同模式嘅人造海浪。遠處嘅瀑布同流水更構建成優美嘅景致,極盡視覺享受。 冒險灣岸 戶外 冇限制 冇限制
  • 細路要由一位大人陪住玩
  • 嚴禁跳水
  • 唔識游水或游得唔叻要着救生衣
威威水地帶 威威水地帶係為細路而設嘅一個大型多層玩樂設施,提供一個安全嘅遊樂環境。設施包括噴水裝置、起泡機、隧道、水簾,滑梯包包美雪齊齊滑、小紅熊伏匿匿、大嘜伏匿匿、威威旋旋轉、樽樽旋旋轉。比較細嘅玩家可以喺德仔小天地同德仔三角洲嘅幼兒嬉水池玩,大水桶間中會倒水! 迷失部落 室內 威威與樽樽旋轉樂:
100厘米或以上
包包美雪齊齊滑/小紅熊大嘜伏匿匿:
90厘米或以上
威威與樽樽旋轉樂:
136千克或以下
包包美雪齊齊滑/小紅熊大嘜伏匿匿:
90千克或以下
  • 6歲以下細路要由大人陪住玩
  • 只限11歲或以下細路同陪佢嘅人參與
衝浪先鋒 香港第一個室內衝浪機,玩家可以喺專業教練嘅指導之下嘗試衝浪嘅小技巧,體驗滑浪嘅快感。 迷失部落 室內 120厘米或以上 冇限制
  • 唔可以攜帶容易鬆脫物件
  • 身上唔可以攜帶尖銳物件(例如:介指、頸鏈、耳環等)
八彩天梯 玩家喺色彩鮮艷嘅滑水梯,趴喺滑行墊上接受極速挑戰,先喺神秘漆黑嘅密封迴旋管道中不停旋轉,到中段開放式管道重見光明,突然間向下高速衝到終點。滑道終點上面有計時器,可以同大家比賽鬥快! 躍動流域 戶外 110厘米或以上 136千克以下
  • 唔可以攜帶容易鬆脫物件
  • 唔可以攜帶尖銳物件
神秘迷沖 喺直徑2.7米嘅漆黑巨型管道中同其他人一齊展開漂流冒險之旅,感受急彎旋轉嘅刺激快感。 躍動流域 室內 120厘米或以上 個人:136千克以下
二至四人一組:總體重320千克或以下
  • 唔可以攜帶容易鬆脫物件
  • 嚴禁跳水
  • 唔可以攜帶尖銳物件
急流漩渦 玩家可以同其他人喺巨型水泡之中,感受躍進急流漩渦無盡嘅感官刺激!衝入巨大湯碗中旋轉,感受由戶外玩到戶內嘅驚心動魄玩樂時刻,最後極速衝入漏斗,強大離心力令到巨型水泡劇烈左右搖晃,充滿刺激! 躍動流域 室內 120厘米或以上 個人:136千克以下
二至四人一組:總體重320千克或以下
  • 唔可以攜帶容易鬆脫物件
  • 嚴禁跳水
  • 唔可以攜帶尖銳物件
沖天瀑布 坐喺巨型水泡上面穿越蜿蜒曲折嘅地帶,由滑板底部衝上同水平成70度角嘅巨型大滑板頂端。喺最高點上短暫懸浮,體驗一飛沖天嘅感覺,然後高速飛墜,迂迴滑行結束旅程。 絕嶺深谷 室內 110厘米或以上 個人:136千克以下
三至六人:總體重454千克或以下
  • 唔可以攜帶容易鬆脫物件
  • 嚴禁跳水
  • 唔可以攜帶尖銳物件
旋風雙子梯
急轉雙子梯
黑暗嘅旋風雙子梯充滿神秘快感,而半透明嘅急轉雙子梯就隱約透光。設有連續急彎旋轉嘅「雙子梯」為大家帶嚟截然不同嘅刺激。 躍動流域 戶外 110厘米或以上 個人:136千克以下
合併:182千克以下
  • 唔可以攜帶容易鬆脫物件
  • 唔識游水或游得唔叻要着救生衣
  • 唔可以攜帶尖銳物件
千克極速迴環
深谷飛瀑
勇者之巔
三條直立式滑梯提供截然不同嘅刺激,玩家可以喺極速迴環瘋狂迴旋到終點;而深谷飛瀑感受突然高速垂直飛墜嘅快感;勇者之巔係開放式滑梯,玩家自行控制滑下垂直嘅管道,更加刺激! 絕嶺深谷 室內 120厘米或以上 136千克以下
  • 唔可以攜帶容易鬆脫物件
  • 嚴禁跳水
  • 唔可以攜帶尖銳物件

休閒設施[編輯]

水上樂園有幾個需要另外收費嘅休閒設施。

映灣小屋[編輯]

玩過水上樂園刺激驚險設施之後,可以喺洋溢度假風情嘅「映灣小屋」同朋友食吓嘢、休息吓,喺怡人海景伴隨之下欣賞南區海岸綫迷人景致同山林嘅遼闊山景享受共聚空間。

設施名 主題區域 可供使用人數 設施
叢林小舍 冒險灣岸 2人
  • 一個帳篷小屋
  • 兩張太陽椅
  • 一個充電插座
  • 一個茶几
  • 一個迷你保管箱
海洋小舍 冒險灣岸 2人
  • 一個映灣小屋
  • 兩張太陽椅
  • 一個充電插座
  • 一個茶几
  • 一個迷你保管箱
  • 兩個座墊
海濱小屋 冒險灣岸 2人
  • 一個映灣小屋
  • 兩張太陽椅
  • 一個充電插座
  • 一個茶几
  • 一個迷你保管箱
  • 兩個座墊

映灣台[編輯]

喺海景之下,可以投入開揚露台景觀嘅私密VIP休憩空間。

設施名 主題區域 可供使用人數 設施 其他服務
海景台 冒險灣岸 8人
  • 一個帳篷小屋
  • 一把太陽遮
  • 一張太陽椅
  • 一個充電插座
  • 一個迷你保管箱
  • 一個迷你冰箱
  • 一張梳化
  • 一張6人餐檯
  • 一張6人用餐椅/長凳
  • 一個家庭儲物櫃
  • 免費毛巾
  • 迎賓小食/飲品
碧海台 冒險灣岸 12人
  • 一個帳篷小屋
  • 一把太陽遮
  • 一張太陽椅
  • 一個充電插座
  • 一個迷你保管箱
  • 一個迷你冰箱
  • 一張梳化
  • 一張8人餐檯
  • 一張8人用餐椅/長凳
  • 一個家庭儲物櫃
  • 免費毛巾
  • 迎賓小食/飲品

餐飲設施[編輯]

灣岸小食[編輯]

主題區域:冒險灣岸

位置:2樓室外

享受即場炮製香脆多汁嘅炸雞,然後再去湧浪灣繼續大玩特玩!喺欣賞無際海景期間,可以一邊飲住冰涼飲品,絕對係對抗熱浪嘅最佳之選。

百味洞[編輯]

主題區域:迷失部落

位置:2樓室內

提供多種環球美食,更提供新派食材選擇,例如植物肉同環保海鮮,提供多元化美味嘅選擇。亦可以向正喺漂流探秘暢遊嘅朋友揮手。

洞天美食[編輯]

主題區域:迷失部落

位置:3樓室內

位於天海灣旁邊,提供各式各樣已經獲得清真認證嘅美食,例如烤肉卷、餡餅、漢堡,訪客可以一邊欣賞天海舞台嘅表演、一邊享用多款清真嘢食。除咗提供不含麩質同素食選項之外,餐單已經獲得香港回教信託基金總會認證。

購物設施[編輯]

深海奇珍店[編輯]

主題區域:歡樂堡礁

位置:1樓室內

喺海洋公園水上樂園入口旁邊,精心搜羅咗林林總總嘅實用裝備,例如泳衣、泳褲、沙灘拖鞋、太陽眼鏡、毛巾、泳鏡等。亦有公園主題限定商品,「威威與好友」精品。

激流裝備站[編輯]

主題區域:迷失部落

位置:3樓室內

可以喺中途補充所需用品,防曬產品、毛巾、防水袋、太陽眼鏡、泳鏡等裝備一應俱全。

住宿設施[編輯]

香港海洋公園萬豪酒店[編輯]

坐落南港島,鄰近香港海洋公園,酒店提供471間結合咗現代設計同自然風格裝飾嘅客房同套房。抵達酒店大堂,首先會見到一個高達16米嘅水族缸。酒店可以享用各種餐飲選擇,飽覽花園同泳池美景。

香港富麗敦海洋公園酒店[編輯]

一間可持續發展同臨海奢華度假酒店,亦係香港第一間富麗敦酒店同全球第一間富麗敦度假酒店。酒店提供425間精心設計嘅客房,全部都可以飽覽南中國海美景,為客人提供一個温馨寧靜嘅休閒勝地。酒店設有4間餐廳、無邊際泳池、兒童嬉水池、室內兒童玩樂區、健身中心、水療中心。

參考[編輯]

  1. 香港海洋公園「新水上樂園」2019年竣工!梯田設計,無邊海景!
  2. 洋公園水上樂園 歡樂刺激神秘國度開始解碼. 原先內容歸檔喺2021-06-27. 喺2021-06-24搵到.
  3. http://www.as2.net/q-36.html 互聯網檔案館歸檔,歸檔日期2019年4月1號,. 香港海洋公園有哪些已經消失的園區或設施?

出面網頁[編輯]