香片

香片，係一種花茶。與就咁將乾燥嘅花混入茶葉嘅花茶唔同，香片係經過鮮花窨製嘅茶葉，令到茶葉帶有花香。早在16世紀明朝嘅《茶譜》、《香乘》等等書籍，就有記載窨茶。窨茶工藝係將鮮花同茶胚混合，茶吸附花香之後，揀走花瓣（稱為「起花」），再經過烘焙，除去多餘水分，所以正宗嘅香片只見茶葉不見花。

最常見嘅香片係茉莉綠茶，香片亦成為茉莉綠茶嘅代名詞。除咗茉莉，適合窨茶嘅香花有好多，例如梔子花、桂花、蔷薇花、珠蘭花、白蘭花、荷花、橙花、梅花、秀英花等等，適合窨嘅茶葉種類包括綠茶、白茶、烏龍茶等等，而最常用係綠茶。