馬甸尼

出自維基百科,自由嘅百科全書

保羅馬甸尼Paolo Maldini1968年6月26號—)係前意大利足球員,專打左後衛。

馬甸尼阿爸施薩馬甸尼曾經係AC米蘭球員,所以馬甸尼亦都係喺AC米蘭受訓。1985年佢第一次跟隨AC米蘭打意甲;1988年贏咗職業生涯第一個意大利甲組足球聯賽(意甲)冠軍;又係1988年,佢第一次踢意大利足球代表隊

馬甸尼成個球員生涯都係打AC米蘭,喺1990年代佢相當威水。嗰陣時佢唔但只成日贏意甲,重贏咗幾個歐洲聯賽冠軍盃冠軍。因為佢打後衛,每季入球都好少,大概兩、三球咁上下。多數評論都集中佢嘅防守功夫,話佢嘅防守以至佢嘅組織能力,喺意甲數一數二。1995年佢角逐咗世界足球先生,攞咗第二名,而嗰陣得主係非洲人韋亞(George Weah)。

喺國家隊佢贏過1994年FIFA世界盃亞軍。不過打咗國家隊咁多年,始終攞唔到冠軍,連歐洲國家盃都係。2000年荷蘭舉行嘅嗰屆佢搏盡老命打入咗決賽,但最後輸咗畀法國。喺2002年FIFA世界盃之後佢退出國家隊,但係成日都有人叫佢復出國際賽。

臨退休嗰幾年馬甸尼雖然冇以前咁好力,但仍然有獎攞。2007年佢贏咗歐聯冠軍。佢本來話打算喺呢一年退休,但應AC米蘭要求再打多兩年。到2009年佢終於宣告退役。

[編輯]