高度

  呢篇文章講嘅係幾何同空間概念。假如你想揾嘅係人類生得有幾高，請睇「身高」。

圖中嘅係圓柱體想像圖：r 係佢個圓形底嘅半徑，而 h 就係其高度。

高度（粵拼：gou1 dou6 ）係指物體或者位置喺垂直方向上嘅距離，通常係講緊由某啲平面做基準開始度，當中平面可以有地面或者海平面呀噉。如果由海平面量度，高度通常會嗌做海拔。

基礎

睇埋：幾何學同距離

高度屬於距離一種，喺幾何學中，距離係講緊兩個物體或者位置中間隔幾遠，只會係正數或者 0 冇得係負數，而高度就係指緊打戙嘅距離，通常會攞某塊平面嚟做「地面」或者「海面」嚟計。

喺幾何學上，高度係非常基礎重要嘅概念，計算物體嘅體積嗰陣成日會用到。以圓柱體為例，假設計數嘅人想計某個圓柱體嘅體積，就必須要用到佢嘅底面積同埋佢嘅高度，條式係：

$V=\pi r^{2}h$

當中 V 係體積，$\pi$ 係圓周率，r 係個圓形底嘅半徑，而 h 就係高度。計第啲立體形狀嘅體積，都無可避免實會用到高度嘅概念。

應用

建築設計相關工作，亦好關注建築物嘅高度。圖中嘅係香港嘅中銀大廈，佢係全球排名最高嘅摩天大廈之一。

喺建築設計同都市規劃上，做設計嗰陣預想中嗰棟建築物嘅高度係重要嘅考量。原因有好多，比如係棟嘢嘅高度會影響周圍嘅環境，影響附近嘅建築物受到幾多太陽光同埋風。

高度對地圖嚟講係重要資訊，所以製作地圖嘅人，時常會用等高線等嘅符號嚟標示唔同位置嘅高度。

喺視像遊戲嘅關卡設計上，高度扮演住重要角色，尤其係要用嚟控制玩家嘅流動同探索節奏：喺好多跳台遊戲入面，設計師會將關卡唔同部份設定唔同高度，從而決定玩家邊啲地方去得、邊啲地方暫時去唔到；而喺薩爾達傳說：曠野之息入便，關卡大規模運用咗縱向嘅地圖設計，初期用嚟教玩家點樣玩嘅區域，高過周圍空間好多，即使冇隱形牆，玩家跳出去嘅話必定會跌死，所以就焗住要留喺區內，跟教學指示學點樣玩，教學搞掂晒之後，玩家先會得到道具畀佢安全噉離開教學區。

身高

内文：身高

身高係指人類身體嘅高度，由腳板底至頭頂之間嘅高度嚟計。

人類身高係人體測量學其中一個研究範疇。雖然環境因素會對人類身高差異造成一定影響，但係單靠呢啲因素並唔足以解釋，唔同人口之間嘅唔同，加埋出遺傳因素，對解釋唔同人口之間嘅身高差異相當重要。

聯合國會利用身高（連同其他統計數據）去監察發展中國家營養狀況嘅變化。喺人類人口之中，平均身高可以大概反映一個群體嘅出生背景、成長環境、社會階層、飲食習慣同醫療制度等多方面嘅情況。

Baten、Stegl 同 van der Eng 幾位歐美學者喺研究中指出，平均身高嘅改變可以視之為經濟發展轉變嘅一個指標。透過分析印尼嘅大量數據，研究人員認為，該國史上發生嘅多件事，唔單止影響咗經濟發展，亦同時改變咗人口嘅平均身高。

睇埋

• 海拔
• 地圖
• 笛卡兒坐標系統

引咗

引用咗嘅文獻：

• Wentworth, George; Smith, David Eugene (1913), Plane and Solid Geometry, Ginn and Co.