鬼面罩

1930 年 Packard Eight Roadster，車側輪拱前面加咗塊防石板，用嚟擋沙石，保護車身油漆。

Packard Standard Eight Roadster，呢架就冇裝防石板，可以清楚見到兩者外觀分別。

1952 年 Rolls-Royce Phantom IV，前面用咗好標誌性嘅「巴特農神廟」式水箱鬼面罩。上面同前面啲表面睇落好似完全平，但其實有少少凸起，係跟古希臘建築嗰套視覺設計原理整出嚟，令肉眼睇起上嚟更似真平面。

Crown Victoria Police Interceptor，用咗黑色蜂巢狀鬼面罩。

Toyota Crown，前面有一個好誇張、好搶眼、做成皇冠形狀嘅鬼面罩，強調車名「Crown」同豪華感。

喺汽車工程入面，鬼面罩係車身上一個開口位，用嚟俾空氣入去或者出嚟。大多數車喺車頭都有個鬼面罩，保護水箱散熱器。 Merriam-Webster 詞典話，鬼面罩就係「一個網狀嘅遮擋或者屏風，尤其係裝飾用，裝喺汽車前面。」鬼面罩最早係由以前用嚟保護散熱器嘅防石網演變出嚟，大概三十年代初之前啲車都有用。

鬼面罩嘅英文【Grille】 係指一塊大硬身嘅網，所以嘅仲可以喺其他位置，例如保險桿下面、車輪前面（幫煞車散熱）、前擋風玻璃底嘅通風位，或者尾蓋上面（後置引擎車）。

不過，喺香港廣東話裏頭，只係講車頭中間嗰塊。喺香港嘅嘅巴士，鬼面罩就係巴士車身一部份，喺巴士車頭擋風玻璃以下、泵把以上嘅金屬或玻璃纖維組件。

設計

車頭面板（fascia）喺吸引買家方面好重要。鬼面罩主要功能係俾冷空氣入去水箱散熱。不過，車個樣往往比實際功能更加重要 。

鬼面罩係車頭最搶眼嘅部分之一 。設計得靚，成架車都好睇，仲可以反映品牌歷史同風格 。

而家好多大鬼面罩其實純粹裝飾 。唔同車牌都有自己獨特鬼面罩設計，好似 Jeep 嘅七格鬼面罩已經登記咗商標。Rolls-Royce 會人手調整啲直條，確保完全筆直 。

Bugatti 有馬蹄形鬼面罩，BMW 用雙腎形，Rover 有「牙仔」設計，三菱（Mitsubishi）嘅 Lancer 同 Evo X 用咗飛機咀風格，Dodge 有十字架形，Alfa Romeo 用六角盾形，Volvo 有斜斜條，Nissan 用倒梯形，萬事得（Mazda）似轉子引擎形，Audi 用單框鬼面罩，Pontiac 用分開嘅橫條，而 Plymouth 用格仔款。Lexus 用紡錘形，Plymouth Barracuda 1971 年款個鬼面罩被叫做「磨芝士板」。Ford 喺 2006 年 Fusion 推出三條橫杠式鬼面罩，都好有代表性。Porsche 因為以前空冷引擎傳統，依然保持冇乜鬼面罩嘅風格。

有啲品牌會反其道而行，好似 Cadillac 三十年代尾開始，每年都轉下花樣，試過用橫條又試過用交叉格，好似時裝一樣。二戰之後，美國車廠通常改用少啲但厚啲嘅鬼面罩條。

「Billet 鬼面罩」係改裝零件，用嚟美化或者提升原廠設計，多數用鋁條整成，有啲甚至係 CNC 一整塊鋁切出嚟。

Hyundai Mobis 喺 2021 年推出咗「主動進氣系統」。新一代鬼面罩可以根據冷卻水溫度自動開關。水溫高時打開，幫手降溫；水溫低時關上，減低風阻，慳油又慳電 。

改車嘅人好鍾意改鬼面罩，甚至攞其他品牌嘅鬼面罩換上去。有啲人仲用有打窿嘅金屬板代替，夠創意。

電動車

去到電動車年代，鬼面罩設計又要重新諗過。因為電動摩打唔需要咁多散熱窿 。不過，買家仲係習慣見到鬼面罩，所以好似 Nissan 咁，都特登喺電動車加返裝飾型鬼面罩 。

而 Tesla、Rivian 呢啲新品牌，就乾脆完全唔要傳統鬼面罩設計，因為佢哋冇舊有品牌傳統、設計風格要繼續 。

巴士

一般來講巴士嘅鬼面罩，都有着疏氣散熱嘅功能，同埋令車頭搶眼啲。現代嘅巴士，特別喺香港見到嗰啲新款雙層巴士，都係後置引擎，副偈放喺車嘅後邊。而真係攞嚟疏氣嘅 grille，幫手冷卻副偈嘅入氣位，會喺巴士嘅後側，或者車尾。

類型

鬼面罩類型

• 水箱鬼面罩：前置引擎車用嘅。
• 車頂或尾箱鬼面罩：多數係後置引擎車。
• 泵把下方鬼面罩：有啲裝喺前或者尾。
• 擋泥板鬼面罩：用嚟幫煞車通風。
• 呀嘜位（引擎蓋進氣口）鬼面罩：幫中冷器進氣。

按款式分

• 原廠款（OEM）：同廠出貨一樣，冇分別。
• 改裝款（Custom）：小量生產，用唔同材料，好多變化。

按裝法分

• 外蓋式（Bolt over）：直接加喺原鬼面罩上面，用螺絲、扣件固定，唔洗鑽孔或者切割。不過外觀冇替換式咁乾淨，因為下面個原件仲見到。裝好大約半個鐘。
• 替換式（Replacement）：要拆走原廠鬼面罩再裝新嘅。呢個做法要鑽孔甚至切割，難度高啲。通常隨件附說明書，但都要啲時間。

史

1934 ``年 Bugatti Type 57 Stelvio 散熱器 鬼面罩

鬼面罩喺汽車上最早出現係 1903 年。之後幾年拱形設計好流行，成為標準。1923 年 Alfa Romeo 首次用咗「分開式」鬼面罩。

去到三、四十年代，各廠創意大爆發。有啲用鐘形（好似 Buick、Chevrolet、Pontiac），有啲係分開再輕輕摺曲嘅（Silver Arrow、Mercury、1946 Oldsmobile），有啲用十字形（戰前 Studebaker Champion、1941 Cadillac、1942 Ford）。

不過 Packard、Rolls-Royce 同 MG-TC 仲係保持舊式拱形風格。

二戰之後，鬼面罩款式又變。1947 年 Buick、Studebaker、Kaiser 出新款之後，鬼面罩開始變矮變闊，配合新車身造型。

睇埋

• Bottom breather：啲冇鬼面罩，用底部入風嘅車款
• 車底擾流裝置（Diffuser）
• 汽車零件一覽