鸚鵡式說話

呢幅圖畫描繪想像中嘅鸚鵡式說話。

鸚鵡式說話係一種行為，指緊人重複他人講過嘅說話或者發出嘅聲，亦有啲個案係重複自己啱啱講咗嘅嘢。喺較嚴重嘅情況下，鸚鵡式說話會變得無意識，即係病人講咗出嚟都唔覺，難以控制呢種言語。

鸚鵡式說話個英文名係英文：echolalia，佢啲詞素嚟自希臘文，即係回音式說話噉解。

基本概念

睇埋：講嘢同話段

鸚鵡式說話可以分為即時同延遲兩種。顧名思義，即時型係喺刺激出現之後即刻或者極短時間內發生，反映由短期記憶快速記返對方講咗乜，以及只經過表層處理嚟接收對方嘅言語。典型嘅兒童例子可以想像：

• 阿媽問明仔：「你想食晚飯未呀？」
• 明仔回答嗰陣，首先重複問一句「你想食晚飯未呀？」，停一停之後先答「想呀，有咩食？」

有陣時，某啲病人出現鸚鵡式說話，可能識得將啲代名詞同句法轉換返至講出嚟。譬如想像以下噉嘅對話：

醫生問阿明：「你要去邊？」

阿明跟住答：「我要去邊？」

由以上呢個例子可見，阿明將啲代名詞改返啱，先至鸚鵡式噉講返句嘢出嚟。好似噉嘅鸚鵡式說話，就顯示病人嘅腦對聽到嘅話語進行咗一定程度嘅語言處理。

延遲型嘅鸚鵡式說話，就係指病人喺幾個鐘頭、幾日，甚至幾年後，先至重複返之前聽過嘅詞語、語句，甚至成大段說話。

相關障礙

睇埋：自閉症譜系

鸚鵡式說話好多時都係障礙嘅跡象。研究表明，某啲障礙嘅患者，成日都會出現鸚鵡式說話嘅情況。

對於部分自閉症譜系嘅細路嚟講，佢哋因為個腦嘅「駁線方式」同常人有別，好多時都難以自發噉產生言語。而研究顯示，鸚鵡式說話有時可以係一種應對機制：佢哋要自發講出說話有困難，於是就重複對方講過嘅嘢，用以應對。二十世紀八十年代嘅研究仲指出，喺某啲語境下，延遲鸚鵡式說話有時可能包含溝通意圖。

睇埋

• 語用
• 話段
• 鏡神經元

資源

• （香港繁體）減少鸚鵡式說話：篇文夾雜咗少量粵文，講到自閉症譜系兒童身上嘅鸚鵡式說話。