黃浩華

出自維基百科,自由嘅百科全書
Jump to navigation Jump to search
黃浩華
母校香港科技大學 喺Wikidata改呢個
職業數據科學家軟件工程師 喺Wikidata改呢個
政黨IT Vision 喺Wikidata改呢個
網站howawong.hk

黃浩華英文Wong Ho Wa1987年—)係一個軟件工程師數據科學家香港民主派政治人。佢係 g0vhk(香港零時政府)創辦人、資訊科技界政團 IT Vision 成員。2020年香港立法會選舉,佢代表泛民主派參選資訊科技界功能界別

早年生涯[編輯]

黃浩華喺公共屋邨長大,中學讀北區東華三院甲寅年總理中學聖芳濟各書院,喺香港電腦奧林匹克贏過幾次獎[1][2]。佢中學時期經歷2003年反對《基本法廿三條》草案運動,並且參與七一大遊行,佢話呢件事係佢嘅政治啓蒙[3][4]

佢喺香港科技大學畢業,畢業之後入行做軟件工程師,喺北京做過一年半嘢[5]。2014年,佢搬返香港冇耐就發生雨傘運動,佢決定留喺香港執業,做數據科學家,同時支持社會運動[4]

提倡開放數據[編輯]

2016年,黃浩華創立g0vhk(香港零時政府),參考臺灣零時政府運動,建立網上平台同埋資訊科技業界網絡,推動開放數據[4]2016年香港立法會選舉,佢整咗個 g0vhk 開放政治資訊網站,整合香港立法會議員出席記錄、表決記錄,同埋候選人資料,俾選民喺投票嘅時候參考[6]。同一年年尾,佢加入香港泛民主派資訊科技界政團 IT Vision,參選2016年香港選舉委員會界別分組選舉,喺全票制、業界選民普遍支持民主派之下,IT Vision 名單全員當選[7][8]

黃浩華認爲推動開放數據有兩個層面,首先係公共機構肯公開啲內容俾人睇,滿足公衆知情權;跟住,公開嘅資訊內容要可以用機器處理,否則左一個 PDF 右一張圖片,就「得個睇字」。佢提倡香港設立《檔案法》,監管公共機構保存檔案同埋公開資訊,因爲既有嘅《公開資料守則》雖然有個機制俾公民索取政府資訊,但冇監管要點畀資訊,亦冇執法權力[4][9]

佢認爲開放數據需要喺公衆知情權同埋個人私隱之間做好平衡。佢批評香港政府嘅保守態度,成日匿埋喺私隱原則後面唔肯公開資訊,例如警察喺邊度放催淚彈、拉咗幾多人呢啲資料應該要盡快公開,免得傳媒、公衆亂咁猜測[9]。另一方面,佢反對香港政府使用可以影到人樣嘅「智慧燈柱」,因爲就算政府保證唔會用人面辨識,都唔保燈柱影片會唔會洩漏,甚至變成中國社會信用評級系統嘅一部分[10]。2019年反逃犯條例修訂運動期間,有示威者破壞智能燈柱;黃浩華代表資訊科技界出席民間記者會嘅時候提出,噉係因爲示威者質疑智慧燈柱嘅用途,而科技發展嘅前提係互信,如果香港政府唔應承五大訴求,建立唔返政府誠信,講乜科技政策都嘥氣[11][12]

2019年香港區議會選舉,佢帶領 g0vhk 社羣建立《Vote 4 Hong Kong》(網址、簡稱:Vote4.hk;直譯「投票爲香港」),整理候選人資料,製作投票指南[13][9]。雖然非建制派喺2019年大選由建制派手上贏走大部分區議會嘅主導權,但係黃浩華表示新一屆區議會喺數據開放方面仍然落後,例如好多工程撥款數據好難搵到,有啲財政文件公開咗出嚟竟然係打印完再掃描返嘅紙本文件,令到市民好難監察議會[14]

2020年武漢肺炎大流行香港疫情爆發初期抗疫資訊好混亂。黃浩華同 Vote4.hk 拍檔梁逸風黃漢斌就用兩日時間揼咗個《武漢肺炎民間資訊》網站出嚟,收集確診人數、高危地點、口罩價格等等抗疫資訊俾公衆睇。民間資訊團隊後來擴展到有大概廿個義工,用網絡爬蟲工具配合人手更新,定期更新資訊[15]。黃浩華認爲搞呢個網站最辛苦嘅係,調查黑心口罩同口罩炒家要搵人核實(fact check),需要好多有心義工投入支持[16]。佢又話政府官方網站上載疫症統計數據慢手慢腳,衛生防護中心開完每日記者會之後幾個鐘先更新網站數據,要追得貼最新數據只能夠靠義工人手更新[17]。不過,黃浩華亦讚賞香港政府之前幾年喺開放數據方面一路進步緊,有啲數據已經有得機讀,只不過仍然輸俾上海、臺灣,相比《開放數據指數》嘅標準仍然有唔少改善空間[18][19]

參選立法會[編輯]

2020年7月頭,時任香港立法會資訊科技界議員莫乃光宣佈唔會競逐連任,因爲希望推舉新人接棒[20]。莫乃光接受訪問嘅時候話,佢本來係爲咗應付呢屆立法會選舉政府可能大規模 DQ(取消資格)民主派現任議員,所以要搵定 Plan B(後備),搵下搵下就發現不如俾新人做 Plan A(首選)仲好,所以提名期臨開始先決定唔尋求連任[21]

7月19號,提名期開始,黃浩華開記者會宣佈,會喺2020年香港立法會選舉參選資訊科技界功能組別。黃浩華表示自己向來追求自由民主,資訊科技界亦最注重資訊自由,而香港國家安全法威脅到香港嘅網絡自由,「中國嘅防火長城已經殺到埋嚟」。佢希望用資訊科技嘅專業技能實踐資訊自由、開放政府、公民參與嘅理念[3][22]。黃浩華參選除咗有莫乃光同 IT Vision 全體支持,仲有「滑鼠娘娘」鄺頌晴、九龍城區議員鄺葆賢醫生等等廿幾人幫佢站台[5][22]

評論多數將黃浩華歸入泛民主派入面嘅溫和派。佢話會簽選舉事務處嘅《確認書》,確認擁護《香港基本法》。而佢自己就話好難界定自己嘅政治派系,因爲業界嘅光譜好闊[23][22]

參考[編輯]

  1. "Results of HKOI 2004". Hong Kong Olympiad in Informatics (英文). 喺2020-07-25搵到.
  2. "Results of HKOI 2006". Hong Kong Olympiad in Informatics (英文). 喺2020-07-25搵到.
  3. 3.0 3.1 "立法會選舉|黃浩華宣布參選資訊科技界 稱會簽署確認書 (14:45) - 20200719 - 港聞". 明報新聞 (中文). 2020-07-19. 喺2020-07-25搵到.
  4. 4.0 4.1 4.2 4.3 鄭祉愉 (2016-09-17). "檔案法 民間 VS 政府資訊戰". 明報周刊: 054–085.
  5. 5.0 5.1 "黃浩華競逐IT界 關兆倫出戰建測". 香港蘋果日報 (中文). 2020-07-20. 喺2020-07-25搵到.
  6. "【g0v雙年會特別報導】借鏡臺灣g0v經驗,不管多困難都要堅持開放香港數據". iThome (中文). 喺2020-07-25搵到.
  7. "【選委戰果】業界大團結!民主派全取IT界30席". 香港蘋果日報. 2016-12-12.
  8. "【選委選舉】資訊科技界30席全由泛民取得,包括單仲偕等人". 經濟通. 2016-12-12.
  9. 9.0 9.1 9.2 "未來城市:政府開放數據 公眾更知情?" (中文). 明報. 2019-10-13. 喺2020-07-25搵到.
  10. "【數碼監控】走訪觀塘解構智慧燈柱 人臉辨識+高清鏡頭監控交通定市民?IT人憂為社會信用系統鋪路" (中文). Apple Daily 蘋果日報. 2019-08-12. 喺2020-07-25搵到.
  11. 黃詠榆 (2019-10-17). "【民間記者會】林鄭稱部分訴求不符法治 發言人斥不提法治合理性" (中文). 香港01. 喺2020-07-25搵到.
  12. "民間記招斥未提5訴求 批強推置業斷錯症". 明報. 2019-10-18.
  13. "藥房一周狂加價三成 網站揭炒罩黑店 民間團隊:政府疫情數據不足". 香港蘋果日報. 2020-04-11.
  14. "招標公告公屋輪候數據未開放 業界促改善". 明報. 2020-05-15.
  15. "【IT人●抗疫】無酬自設「武漢肺炎民間資訊」網站 政府開放數據慢又亂要靠人肉更新" (中文). Apple Daily 蘋果日報. 2020-02-14. 喺2020-07-25搵到.
  16. 陳嘉慧 (2020-02-01). "【武漢肺炎】 民間製自救資訊網站 開發者亦為口罩惆悵". 香港01 (中文). 喺2020-07-25搵到.
  17. "【政府開放數據落後】IT人和義工自製互動網抗疫:官方上載Data應早過張竹君" (中文). 眾新聞. 2020-05-02. 喺2020-07-25搵到.
  18. "香港開放數據進展欠佳". 信報. 2020-05-15.
  19. 歐陽德浩 (2020-05-14). "香港開放數據發展落後 協會籲借鑑上海設公眾平台" (中文). 香港01. 喺2020-07-25搵到.
  20. "「個人決定」 莫乃光不爭連任 稱發現更有能力年輕人 「非和某大佬傾好」" (中文). 明報. 2020-07-16. 喺2020-07-25搵到.
  21. "莫乃光不連任:搵Plan B時發現佢地做Plan A仲好". 香港獨立媒體網. 2020-07-16. 喺2020-07-25搵到.
  22. 22.0 22.1 22.2 "立法會選舉|黃浩華宣布參選資訊科技界 稱會簽署確認書" (中文). 明報. 2020-07-19. 喺2020-07-25搵到.
  23. Shum, Michael (2020-07-20). "Pan-dem duo get back to basics in Legco race". The Standard (Hong Kong). 喺2020-07-25搵到.

出面網頁[編輯]