黃色油漆嘅辯論

若果關卡吓吓都用噉嘅黃色箭咀指住邊道門可以打開，玩家會唔會唔中意，甚至覺得遊戲設計師當咗佢哋係細路？

黃色油漆嘅辯論（參見英文：yellow paint debate），又或者叫黃色油漆論戰，係關於電子遊戲關卡設計嘅一場爭論，始於二〇二〇年代初。呢場爭論嘅重點，在於引導玩家嘅提示要整到有幾顏色鮮明、容易辨識：有啲設計師主張，關卡入便梗要有一啲提示，話俾玩家知有邊啲物件係可以與之互動嘅，而且呢啲提示仲要做到好明，譬如係牆上有個安全黃噉色嘅大箭咀，指住玩家要去邊，或者有邊啲物件係玩家要撳嘅，當中要撳嘅物件有開門用嘅掣等；有咗大箭咀或類似嘅佈置，就方便玩家理解跟住落嚟要做乜；但另一方面，又有唔少設計師唔中意噉樣嘅設計，覺得噉做會破壞沉浸感；於是乎遊戲設計界就起咗一場爭論。

背景概念

睇埋：關卡設計

喺自然界以及人類嘅日常生活中，鮮色往往有警示作用，例如安全黃呢種色就出名在能夠迅速吸引注意力。設計遊戲關卡嗰陣，由於玩家可能會錯過環境線索，睇唔到環境中嘅路徑、可攀爬嘅表面或者可以與之互動嘅物件，遊戲開發者有時會選擇使用鮮色提示，令玩家一眼就睇到有邊啲嘢要留意，例如關卡嘅地面有個大型嘅黃色箭咀，指住要行嘅方向。

正反觀點

睇埋：沉浸感

支持者認為，好似黃色油漆箭咀噉嘅物件望落明顯，可以減少玩家蕩失路或者類似嘅情況，提升遊玩嘅流暢度。

反對者就一般覺得噉樣嘅指示物太突兀，削弱環境氣氛、破壞探索嘅樂趣，破壞沉浸感，甚至搞到玩家覺得遊戲設計師當正佢哋係細路。

另見

• 承擔特質
• 可用度
• 暫停懷疑