油麻地站少女跳軌傳說

出自維基百科,自由嘅百科全書
跳去導覽 跳去搵嘢

油麻地站少女跳軌傳說,係指1981年一名少年喺香港地鐵油麻地站跳落路軌,好多人當時以為搞出人命,但點知停車後完全無意外迹象,好多人誤以為係「集體撞邪」嘅事件,但後來傳媒人馮睎乾喺2019年3月,喺自己專欄寫文提及嘅時候,就收到讀者聯絡,話當年真係有人墮軌,但後來自己從月台離開咗[1]

事件經過[編輯]

喺1981年11月10號(一說法係11月11號)下晝1點半,一列由中環開去觀塘嘅地鐵駛入油麻地站嘅時候,車長突然見到一名着校服嘅女學生跳落路軌,當時等車嘅乘客目擊情況大叫司機停車。司機即時拉剎車掣,但列車仍然滑行,好多人都覺得個女學生應該被捲入車底,之後警察同消防到場拯救,地鐵亦暫停佐敦至旺角站嘅服務。但搜索咗一粒鐘,路軌完全搵唔到血跡、屍體或者其他意外迹象,就連吊起列車後都無發現[1][2][3][4]

之後事件被列作誤報。地鐵發言人話,涉事車長健康良好,精神狀況無問題[1]

鬧鬼傳言[編輯]

由於當時車長同乘客都有目擊,有人就以為係墮軌者係靈體,令車長同乘客「集體撞邪」,亦有說法指女學生只係看到一個同自己一樣嘅人墮軌,之後嚇到仆番屋企,幾日後因病身亡,形容係「死亡預告」[1][2]

關於傳言真確性[編輯]

傳媒人馮睎乾喺2019年3月,喺自己專欄寫文提及事件,並且喺Facebook分享文章,之後有兩名表示認識女事主嘅人話,事主無死,當年生完BB後懷疑患上躁鬱症,身穿白衣墮軌,但匿埋到路軌中間而無被車過,之後返回月台離開。佢之後信咗基督教,到2019年都重喺度,生活平凡安穩[1]

參考[編輯]

  1. 1.0 1.1 1.2 1.3 1.4 安祖娜 (2019-03-21). "地鐵史上最嚇人傳說? 1981年女生墮軌卻不見了 真相原來是..." 香港01 (中文). 喺2022-05-01搵到.
  2. 2.0 2.1 假期日常, HolidaySmart. "香港都市傳說|鬼門大開!細數香港7大驚悚都市傳說:死人叫外賣/九鐵鬧鬼廣告". HolidaySmart 假期日常 (中文). 喺2022-05-01搵到.
  3. "中古港鐵都市傳說 80年代「女子」油麻地站跳軌(內附新聞及影片)". hk.news.yahoo.com (中文). 喺2022-05-01搵到.
  4. https://www.facebook.com/ETtoday. "油麻地「女鬼跳地鐵」? 多人目擊卻連一滴血都找不到 | ETtoday大陸新聞 | ETtoday新聞雲". www.ettoday.net (中文). 喺2022-05-01搵到.