2016年香港選舉委員會界別分組選舉

出自維基百科,自由嘅百科全書

2016年香港選舉委員會界別分組一般選舉2016年12月11號朝早七點半到夜晚上十點半舉行,目的係為咗選出1,034個人入選舉委員會,用嚟喺2017年香港特別行政區行政長官選舉選出第五屆行政長官。有466個委員透過自動當選或者當然委員身份入選舉委員會,唔使經過選舉產生。

泛民主派為咗呢次選舉,組織「民主300+」,希望可以攞到多啲席位。結果呢屆選委會界別分組選舉,投票率唔單止創新高,泛民主派攞咗超過300個選委席位。

背景[編輯]

上屆嘅選委會雖然由唐營(唐英年)人馬贏出居多,但係後嚟梁振英喺傳統親中陣營(好似勞工界同漁農界)保送之下成功入閘,唐英年嘅大屋僭建醜聞更加令形勢逆轉,但係梁振英喺臨選舉之前又爆出同鄉事派、江湖人士食飯嘅「小桃園飯局」,不過仍然阻唔到梁振英當選。唐、梁兩個陣營嘅人互相揭發對方嘅「黑材料」,火花四起,成為香港第一場真正有競爭性嘅特首選舉,同時又因為兩個候選人嘅背景,呢次特首選舉畀外界形為係「地產黨鬥共產黨」。

梁振英喺執政5年期間,喺香港推行鷹派作風,激起民望反彈。而且,香港發生咗九二八傘運魚蛋革命等等由泛民、本土派發起嘅民間反抗運動,又催生出香港本土派,提倡港中分隔,甚至香港獨立梁振英被人笑係「港獨之父」。後來政府又推動「DQ」議員嘅行為。由於佢行事作風強硬,搞到香港社會撕裂,唔止泛民主派有啲頂唔順佢,連帶有啲建制派都頂佢唔順,佢哋喺選委會選舉提出「ABC」口號(「Anyone But CY」,即係邊個做都好過梁振英),喺上屆提名過佢嘅選委人人自危,今屆都唔敢講支持邊個。到12月9號,梁振英話佢要「照顧個女」為由宣佈放棄連任[1],當時推測佢係為咗幫建制派選情止血,所以揀喺呢個時候至講。

結果[編輯]

泛民主派推出「民主300+」,佢哋打住「ABC」嘅旗號,橫掃好多個界別嘅席位,成功達到超過300席嘅目標。另外唔少人都打住「ABC」嘅旗號攞到席位,但係表明係「ABC」嘅人始終佔少數,皆因好多個位都係界別入面「圍威喂」,自動當選。

  1. 振英:不會爭取連任 需要照顧家庭 中央表示理解 | 立場報道 | 立場新聞. 場新聞 Stand News (中文). 原著喺2020-11-27歸檔. 喺2020-04-16搵到.