2020年香港立法會選舉民主派初選

出自維基百科,自由嘅百科全書
跳去導覽 跳去搵嘢

2020年香港立法會選舉民主派初選英文2020 Hong Kong pro-democracy primaries ),係指民主派就原定第7屆香港立法會選舉,喺2020年7月11至12號舉行,喺地區直選,功能界別中的區議會(第二)界別同埋衛生服務界所舉辦嘅初選。初選由民主動力協助籌辦,希望透過初選決定邊個出選相關立法會選舉議席,但係無法律約束力,由香港選民投票[1] ,投票數達61萬人次。

呢次初選得到民主派主要政黨同埋唔少新興組織,好似公民黨人民力量民主黨社會民主連線,天水連線、屯門社區網絡,醫管局員工陣線、專業議政,仲有部份無黨籍民主派本土派人士同埋政治素人參與。

不過,城邦派政黨熱血公民,就批評選舉唔符合民主基本意思。選舉亦受到香港官員批評,指初選違反《中華人民共和國香港特別行政區維護國家安全法》。去到2021年2月28號,政府仲指控47名參與初選嘅民主派,以「串謀顛覆國家罪」嘅名義起訴佢哋。

背景[編輯]

反對逃犯條例修訂草案運動爆發以嚟,民主派2019年香港區議會選舉攞到壓倒性勝利。民主派支持者希望民主派利用呢股氣勢,喺立法會選舉中取得同樣嘅大勝,獲得過半數席位(35席,坊間俗稱「35+」)從而向特區政府施加更大壓力,迫使政府回應五大訴求[2]

2020年上旬,唔少民主派同埋本土派人士已公開表示有意出戰[3] [4] [5]。當時,香港大學法律系副教授戴耀廷喺回覆《香港蘋果日報》查詢時透露,民主派陣營未考慮就區一議席舉行初選,同埋即使多人參選,議席落入建制派嘅機會亦唔大,佢仲話民主派喺區議會(第一)功能界別「有絕對優勢」,相信選舉唔會破壞團結。另外,香港中文大學政治與行政學系高級講師蔡子強認為,選舉期間難免會有互相攻擊、批評嘅畫面出現,擔心黨同伐異嘅情緒會擴散到不同界別,令部份民主派有機會獲勝嘅界別無法協調單一候選人,直接影響民主派立法會議席過半嘅戰略目標。因此,蔡建議舉辦初選解決分歧,並指民主派應就整場立法會選舉成立「初選委員會」,討論初選安排,透過初選畀選民選出候選人,增加選民嘅參與,佢亦相信呢個做法符合選民嘅期望。

2020年3月,各大政黨分別展開黨內程序,而各區有意參選人亦開始四出進行「摸底」探路[6]。呢個時候,戴耀廷同埋區諾軒一齊倡議包含「公民參與」嘅協調機制,以減少出選名單為目標,又指期望促成「棄選」共識,以攞到最多議席。3月10日,戴耀廷喺《香港蘋果日報》撰文,提出兩階段協調同埋公民參與,最終目標係盡量減少參與官方選舉嘅名單數目,越接近該區嘅目標議席數目就越好[7]。之後,戴耀廷同埋區諾軒開始走訪各區,以協調初選機制[8],最終經過多個協調會後,初選機制逐漸成形[9]

2020年4月28號,戴耀廷喺《香港蘋果日報》發表題為「真攬炒十步這是香港宿命」嘅文章,指出民主派成功攞到35席之後,點樣實現同政權攬炒。文中提及要實現這十步,就需要「進行協調出選」以開始攬炒第一步[10]

機制[編輯]

民主派喺2020年6月8號舉行35+協調機制記者會
大埔廣場外投票站有多人排隊等候投票

報名期為6月13至20號,參選人要提交100名選民提名及10000元嘅保證金,6月24號公佈最終名單。市民可以喺7月11至12號到各區嘅票站參與投票。呢次嘅投票系統由香港民意研究所設計,市民需要掃描票站內嘅二維碼進入系統,並需要輸入少量個人資料避免重複投票。市民需要提供住址證明等證明自己嘅選民身份。若獲推薦嘅參選人畀政府剝奪資格,將由該人指定後備人選。最終派出名單數目如下:[11]

界別/選區 議席數目 名單 目標議席數目
有效報名數目 派出數目
地區直選 香港島 6 7 4 4
九龍西 6 9 4 4
九龍東 5 6 5 3
新界西 9 8 6 6
新界東 9 12 7 6-7
功能界別 區議會(第二) 5 5 4 3-4
衛生服務界 1 4 1 1
31 27-29

另外,因應武漢肺炎香港疫情,初選主辦方喺7月9號公佈5大防疫安排措施:[12]

  1. 所有進入票站投票嘅市民都需配戴口罩。
  2. 主辦單位會確保所有票站嘅工作人員不需要進行家居檢疫或者任何形式嘅檢疫。
  3. 喺可行嘅情況下,所有進入票站嘅人士都需要量體溫。
  4. 票站嘅工作人員需確保票站內嘅人數符合限聚令所規定嘅數目。
  5. 若票站內外排隊嘅人數多於限聚令所規定嘅數目,票站職員會要求市民先離開票站,晏啲再返嚟投票。

另外,市民亦可以先喺屋企完成投票程序,再回到投票站投票。

宣佈參選[編輯]

溫和民主派[編輯]

民主黨[編輯]

民主黨係上屆立法會非建制派嘅第一大黨,有7席。但其中許智峯同埋黃碧雲任內分別受搶手機風波[13]同埋議會表現欠佳[14]嘅批評。今屆,兩人經黨內甄選依然分別繼續參選香港島同埋九龍西選區,而黃碧雲喺黨內甄選時受深水埗區區議員袁海文挑戰。去到會員大會嘅時候,亦被唔少黨員批評,但黃碧雲最終仍然勝出黨內初選。

另外,其餘五位現任議員經黨內甄選後均獲通過,推薦參選。分別係胡志偉九龍東)、林卓廷新界東)、尹兆堅(新界西)、鄺俊宇同埋涂謹申則各自參選區議會(第二)功能界別。黨主席胡志偉喺記者會強調「35+(即立法會非建制派議席過半)」係民主派嘅總目標。民主黨將尊重民主派初選嘅結果[15]

公民黨[編輯]

公民黨係上屆立法會中非建制派嘅第二大黨,今屆決定派出名單參與4區地區直選同埋2個功能界別選舉。名單喺5月30號的記者會上公佈。現任嘅楊岳橋,同埋梁嘉善合組名單參選新界東選區郭家麒同埋葵青區議員冼豪輝參選新界西選區。譚文豪就嘗試連任九龍東選區。上屆議員陳淑莊因佔中九子案罪成而失去參選資格,今屆港島區派出上屆排喺陳淑莊名單次位嘅東區區議員鄭達鴻參選[16]

功能界別方面,法律界現任議員郭榮鏗競逐連任。中小企食店聯盟召集人林瑞華就參選飲食界。原本有意參選區議會(第二)功能界別沙田區區議員黃文萱後嚟退出咗。特別黨員大會上,公民黨黨員通過授權執委會遇到緊急情況時可為正式參選名單作最終決定。公民黨主席梁家傑解釋日後情況好難預估、千變萬化。指若郭榮鏗畀選舉主任剝奪參選資格,執委會會展開徵召機制,更不排除非黨員代表公民黨參選[17]

工黨[編輯]

工黨喺黨內甄選前有多張名單有意參選,包括:前立法會議員劉小麗港龍空勤人員協會前主席施安娜、職工盟主席吳敏兒同埋工黨主席郭永健。但劉小麗同埋郭永健最後都發聲明決定唔參選[18],施安娜就未獲提名。最後,工黨只派出吳敏兒出選新界西選區[19]

激進民主派[編輯]

社會民主連線[編輯]

社會民主連線(社民連)喺6月24號舉辦記者會,宣佈派出梁國雄同埋岑子杰分別參加新界東同埋九龍西初選。記者會有多名多名工黨成員到場支持,包括李卓人同埋張超雄等立法會議員。當中岑子傑曾被盛傳會參選超級區議會[20],佢喺記者會表示自己住喺九龍西多年,非常熟悉呢區。又認為劉小麗唔參選後,九龍西需要有代表弱勢社群嘅參選人[21] 。 《香港01 》引述民主派人士分析,岑子傑有社民連成員同埋民陣召集人嘅雙重身份,故預料支持者嘅政治光譜較闊[22]

新民主同盟[編輯]

新民主同盟喺3月25號召開執委會,開始黨內甄選。6月254號舉辦記者會,宣布派出范國威同埋西貢區議會區議員黎銘澤以一張名單參選新界東,譚凱邦參選新界西。而自2004年已擔任區議員嘅任啟邦,將挑戰區議會(第一)功能界別[23]。當中范國威名單同埋譚凱邦會參與今次初選。

本土派[編輯]

天水連線[編輯]

6月20號,天水連線發表聲明,正式宣佈參與初選。元朗區區議員伍健偉同埋林進合組一張名單參選新界西地方選區。伍健偉透露自己已經賣咗自己層樓作為選舉嘅資金來源,並希望香港人能團結一致「拯救香港」。林進認為過往有好多代議士「不作為」,因此需要自發行動,向「港共政權」宣戰[24] [25]

屯門社區網絡[編輯]

屯門社區網絡屯門區區議員張可森喺6月20號宣佈參選新界西地方選區。張可森形容初選係「唯一一次,甚至最後一次」畀選民自由選擇嘅機會,因此認為必須發出抗爭嘅聲音[26]

獨立或其他候選人[編輯]

6月18號,劉頴匡沙田新城市廣場中庭聯同8名沙田同埋大埔區區議員,宣佈參與新界東初選。劉頴匡揀喺歷經多次警暴嘅新城市廣場舉行記者會宣布參選,認為呢個地方係新界東「最能見證到過去一年的地方」 [27]。同日,何桂藍宣佈參選新界東。佢指自己嘅前立場新聞記者身份令佢反思點樣做多啲,於是決定參與議會抗爭。佢指,喺《港區國安法》之下,民主派議員應該用盡一切方法同中央政府周旋到底,又認為只有反抗先可以改變香港宿命。

宣傳及投票日情況[編輯]

激進親共派騷擾參加民主派初選人士拉票街站[編輯]

呢次嘅初選,民主派一啲人士都曾經受過激進親共派嘅滋擾。

7月7號早上,林卓廷上水擺設街站宣傳初選,呼籲市民投票嘅時候,就遭到至少30名香港同心會嘅成員滋擾,呢啲人恐嚇林卓廷嘅義工,話「個場係我哋」,要求佢哋離開,佢哋甚至撕毁民主派嘅宣傳物品。義工曾經報警要求協助,但警察就話,之前已經有警員在場觀察,認為「一切平靜」。林卓廷事後話,而家報警求助嘅效用已經唔大[28]

7月11號傍晚6時,前香港眾志秘書長黃之鋒喺太古康怡廣場外為袁嘉蔚拉票嘅時候,激進親共派石房有忽然現身騷擾佢哋嘅拉票活動,用電話拍攝佢哋,又指罵黃之鋒係「漢奸走狗」,又引述之前已被多方證明不實嘅假新聞[29],屈對方拎咗2,000萬買樓。擾攘約10分鐘後,在場好多人指罵石房有,結果石房有自行離開現場[30]

後續[編輯]

保安局局長李家超話,民主派意圖經過初選,攞到過半立法會議席,否決財政預算案,令特首落台同埋癱瘓特區政府,涉嫌違反國安法「顛覆國家政權罪」[31]

不過《香港基本法》第50條列明,立法會唔通過財政預算案,協商過後都未能達成一致意見,行政長官有權解散立法會;第52條列明,重選過後嘅立法會再一次否決財政預算案,行政長官先至要落台[32]

47名被拉人士俾警方用串謀顛覆國家政權罪名告[編輯]

內文:針對2020年香港民主派初選嘅政治檢控拘捕

2021年1月6號,香港政府以國安法大量拘捕參與過呢次初選嘅候選人。喺2021年2月28號,警方用「串謀顛覆國家政權」嘅罪名,提早告仍然坐緊監嘅前香港眾志秘書長黃之鋒,仲收押緊嘅人民力量副主席譚得志、前民主黨主席胡志偉,同埋戴耀廷區諾軒趙家賢何桂藍郭家麒譚文豪楊岳橋林卓廷林景楠岑子杰等47個人。而涂謹申鄺俊宇劉凱文袁偉傑關尚義安德里李國麟同埋李芝融就暫時唔告住,要喺5月4號報到多次[33]

參考[編輯]

  1. "民主派7.11一連兩日舉行35+公投 決定立法會參選名單". 明報. 2020-06-09. 原著喺2020-06-11歸檔. 喺2020-06-11搵到.
  2. "35+ 初選的目標可以是甚麼". 立場新聞. 原著喺2020-06-30歸檔. 喺2020-07-18搵到.
  3. 香港蘋果日報 (2020-02-24). "【立法會選舉●區一】李家偉劉偉聰陳振哲三素人欲出戰 學者倡初選定出線權" (中文). 原著喺2020-07-25歸檔. 喺2020-07-25搵到.
  4. 周禮希 (2020-03-02). "【立法會選舉】民協、工黨有意參選者曝光 CY「仇家」擬戰新西" (中文). 香港01有限公司. 原著喺2020-03-02歸檔. 喺2020-07-25搵到.
  5. 吳倬安 (2020-03-09). "【立法會選舉】劉頴匡擬戰新東 傳與沙田樁腳合作 丘文俊戰區一" (中文). 香港01有限公司. 原著喺2020-05-20歸檔. 喺2020-07-25搵到.
  6. "【立法會選舉】戴耀廷推「協調機制」代「初選」 冀達棄選共識免嘥票". Apple Daily 蘋果日報 (中文). 原著喺2020-07-19歸檔. 喺2020-07-19搵到.
  7. 戴耀廷 (2020-03-10). "齊上齊落 目標35+" (中文). 香港蘋果日報. 原著喺2020-07-25歸檔. 喺2020-07-25搵到.
  8. 頭條日報 (2020-03-31). "【Kelly Online】政府「限聚」 民主派協調會延期" (中文). 原著喺2020-07-19歸檔. 喺2020-07-19搵到.
  9. 香港蘋果日報 (2020-04-15). "【立法會選舉】新東首輪協調即見成果 部份素人傾向選前初選" (中文). 原著喺2020-07-19歸檔. 喺2020-07-19搵到.
  10. "真攬炒十步 這是香港宿命 - 戴耀廷". Apple Daily 蘋果日報 (中文). 原著喺2020-05-31歸檔. 喺2020-07-18搵到.
  11. 黃鳳儀 (2020-06-09). "立法會選舉|戴耀廷:國安法後DQ機會大 勝初選者可定Plan B人選". 香港01. 原著喺2020-06-11歸檔. 喺2020-06-11搵到.
  12. "民主派初選設 5 項措施防疫 選民可先在家完成程序 再往票站投票". 原著喺2020-07-21歸檔. 喺2020-07-21搵到.
  13. "【政圈風聲】民主黨立會選戰跑馬仔 九龍西乳鴿袁海文硬撼黃碧雲". 香港01. 2020-01-15. 原著喺2020-09-01歸檔. 喺2020-08-30搵到.
  14. "立法會選舉│民主黨原班人馬參選 誰人最大危機?". 香港01. 2020-05-17. 原著喺2020-06-07歸檔. 喺2020-08-30搵到.
  15. "民主黨特別會員大會通過7人籌組參選隊伍 強調尊重泛民協調爭35+". 香港01. 2020-05-17. 原著喺2020-07-14歸檔. 喺2020-08-30搵到.
  16. "公民黨通過立法會選舉推薦名單 4人競逐連任". 香港經濟日報. 2020-05-30. 原著喺2020-06-04歸檔. 喺2020-08-30搵到.
  17. "公民黨通過立法會選舉推薦名單". now新聞. 2020-05-30. 原著喺2020-06-04歸檔. 喺2020-08-30搵到.
  18. "工黨劉小麗宣布不戰立會 冀預留更多時間為民間組織服務". 香港經濟日報. 2020-05-08. 原著喺2020-06-13歸檔. 喺2020-08-30搵到.
  19. "【立會選戰】工黨僅派吳敏兒戰新西 郭永健棄新東 獨媒報導". 香港獨立媒體網. 2020-06-19. 原著喺2020-06-21歸檔. 喺2020-08-30搵到.
  20. "超區料陷入混戰". 蘋果日報 (香港). 2020-03-05. 原著喺2020-03-17歸檔. 喺2020-08-31搵到.
  21. "立法會選舉|社民連梁國雄、岑子杰戰初選 稱反對國安法無懼DQ". 香港01. 2020-06-24. 原著喺2020-06-25歸檔. 喺2020-08-31搵到.
  22. "【立法會選舉】岑子杰擬轉戰九西 超區達共識承諾積極運用否決權". 香港01. 2020-05-15. 原著喺2020-05-19歸檔. 喺2020-08-31搵到.
  23. "【立法會選舉】新同盟擬攻四席 范國威:冀成素人、傳統泛民橋樑". 香港01. 2020-03-30. 原著喺2020-09-01歸檔. 喺2020-08-31搵到.
  24. "【立法會選舉】元朗區議員伍健偉夥林進 參與新界西初選 伍賣樓作競選資金". 立場新聞. 2020-06-20. 原著喺2020-06-22歸檔. 喺2020-08-31搵到.
  25. "天水連線伍健偉賣樓選新西 揹暴動罪林進排第二 獨媒報導". 香港獨立媒體網. 2020-06-20. 原著喺2020-06-23歸檔. 喺2020-08-31搵到.
  26. "【立法會選舉】屯門區議員張可森 元朗區議員王百羽 參與民主派初選". 立場新聞. 2020-06-20. 原著喺2020-06-21歸檔. 喺2020-08-31搵到.
  27. "立法會選舉|劉頴匡宣布出戰新東初選 望本土抗爭派支持". 香港01. 2020-06-18. 原著喺2020-06-23歸檔. 喺2020-08-30搵到.
  28. "【立法會選舉】逾30藍絲有恃無恐 撕毁民主派候選人街站宣傳品 | 蘋果日報". Apple Daily 蘋果日報 (中文). 喺2021-03-30搵到.
  29. "【Kelly Online】傳二千萬購貝沙灣 黃之鋒:假新聞". 頭條日報 (中文). 2019-10-07. 喺2021-03-07搵到.
  30. "【立會選舉】譚文豪初選街站義工遇襲 黃之鋒與「大波man」口角". 頭條日報 (中文). 2020-07-11. 喺2021-03-07搵到.
  31. "【不斷更新】逾 50 民主派初選協調人、參與者被捕 包括戴耀廷區諾軒 被指違國安法「顛覆國家政權罪」". Stand News 立場新聞 (中文). 2021-01-06.
  32. "警拘53名參與初選民主派 涉顛覆國家政權 要求4間傳媒交出資料 李桂華:不會調查投票市民". 香港財經時報 (中文). 2021-01-06.
  33. "【香港大搜捕】民主派47人今赴警署報到 立即被控顛覆國家政權罪明出庭". 蘋果日報. 2021-02-28. 喺2021-02-28搵到. Unknown parameter |dead-url= ignored (help)