2021年大埔公路雙層巴士失事

出自維基百科,自由嘅百科全書
跳去導覽 跳去搵嘢

2021年11月18號夜晚大約11點,大埔公路大圍段一架九巴88K線雙層巴士翻側,造成1死11傷。一名37歲男乘客頭部重傷,當場證實死亡,另外58歲男巴士司機、1名男乘客同9名女乘客受傷,被送往伊利沙伯醫院威爾斯親王醫院救治[1]。司機通過酒精呼氣測試,涉嫌危險駕駛引致他人死亡危險駕駛引致他人身體受嚴重傷害被捕[1][2]

意外過程[編輯]

夜晚大約11點16分[1],涉事司機揸住架九巴88K線雙層巴士沿大埔公路大圍段顯徑方向行駛,駛經成運路橋面時,車長懷疑因為行錯路,扭軚轉線失事撞石壆向左翻側[2],多名乘客被困。

救援[編輯]

事發之後,一位駛經現場嘅的士司機梁先生見到即刻停車,同幾位市民一齊打爛巴士玻璃救人[3]

高級消防隊長鄭銘生表示,事發後3分鐘已經到達現場,共派出8架消防車、14架救護車次、31名消防員及36名救護員到現場拯救,喺到場後16分鐘將全部傷者救出,分別送往威爾斯醫院同伊利沙伯醫院。高級救護主任林景祺指,傷者共有3男9女,年齡介乎19至70歲,其中1人當場死亡,另有1人內出血重傷,其餘多為擦傷[2]

各界回應[編輯]

市民回應[編輯]

有大圍居民指出,事發地點係出九龍嘅必經之路,但係88K線係由駿景園開去顯徑,唔應該經過嗰個位,巴士司機應該係行錯路[4]

九巴回應[編輯]

九巴安全總監關翠蘭同行政總監許鎮德指,涉事車長駕駛紀錄普通,過去3年發生過3宗輕微意外,對上一宗係2021年年初,同輕型客貨車相撞發生輕微意外,當時已為車長提供輔助訓練,車長亦已經完成相關訓練;又話有關司機嘅駕駛經驗足夠,九巴對呢次意外十分重視,會全力配合調查[2]

汽車交通運輸業總工會九龍巴士分會回應[編輯]

肇事司機據報一日要揸幾條線,搞到撈亂咗路線。工會九龍巴士分會主任黎兆聰表示,多年前運輸署同工會、公司協定指示車長每日只可以揸3條線,但工會曾接獲其他車長投訴,曾一日接獲5個order(揸5條線),質疑安排係有違協定[5]。女車長陳淑萍表示,佢自己都要揸3條線,包括46X、286X同涉事嘅88K[5],3條線嘅路線有一部份相同,例如有成6至7個站相同,佢自己亦都試過行錯路[6],又話涉事車長一向駕駛態度良好,唔係粗心大意嘅人[6]

黎兆聰又話,一發生意外九巴管理層就話涉事車長駕駛紀錄普通,年初曾涉及一單同輕型貨車相撞嘅輕微意外,有關言論係同車長「割席」,強調呢啲輕微碰撞係好常見[6]。九巴就回應所有車長嘅編更及工作安排都符合甚至好過政府指引[5][6]

參考[編輯]

  1. 1.0 1.1 1.2 頭條日報. "大圍九巴翻側|警方:58歲司機涉危險駕駛兩罪扣查 10傷者分送2間醫院". 頭條日報 Headline Daily (中文). 喺2021-11-28搵到.
  2. 2.0 2.1 2.2 2.3 頭條日報. "大圍九巴翻側|疑深夜行錯路急扭軚撞壆釀1死11傷 車長涉危駕被捕". 頭條日報 Headline Daily (中文). 喺2021-11-28搵到.
  3. 頭條日報. "大圍九巴翻側|死者遭巴士壓頭當場死亡 的士司機打爛擋風玻璃救人". 頭條日報 Headline Daily (中文). 喺2021-11-28搵到.
  4. 頭條日報. "大圍九巴翻側1死11傷 事發橋面非原定行車路線 疑「行錯路」急切線". 頭條日報 Headline Daily (中文). 喺2021-11-28搵到.
  5. 5.0 5.1 5.2 陳浩然, 陳傲淇 (2021-11-19). "大圍翻九巴│工會批九巴管理混亂 有車長需日駕5條路線疲於奔命". 香港st01 (中文). 喺2021-11-28搵到.
  6. 6.0 6.1 6.2 6.3 "翻車慘劇 歸咎九巴3大問題 工會嘆行錯路難免". hk.news.yahoo.com (中文). 喺2021-11-28搵到.