2025年7月大災難預言

2025年7月大災難預言係2025年上半年喺東亞地區（尤其係日本、臺灣同香港）流行嘅一個預言，指2025年7月（或者精準到7月5號日本時間凌晨4點18分）日本同菲律賓之間嘅西太平洋海域會爆發有史以嚟最大規模嘅地震同海嘯，甚至被形容係世界末日。 呢個預言嘅由來主要係建基喺日本漫畫家龍樹諒嘅漫畫作品《我睇到嘅未來》（日文：私が見た未来），被認為曾經成功預言2011年日本三一一大地震，所以有啲人認為好大機會再講中。

不過，日本氣象廳已經強調以而家嘅科技預測唔到地震嘅具體時間、地點同規模，呼籲民眾唔好信謠言。而龍樹諒亦澄清佢描述嘅情景冇講明日子，「2025年7月5號」嘅日子只係編輯擅自加上去，唔係佢原本意思。

最終喺嗰個精準嘅時刻並未有任何災難發生，而同一月份入面，就喺7月30號日本時間朝早8點24分喺日本東北方嘅俄羅斯琴察加半島對開海底發生8.8級地震同引發海嘯，但由於遠離人口稠密地區，人命財產損失輕微，同預言形容嘅極大破壞相差好遠。

文化影響

• 呢件事後來仲被改編成日文電影《2025年7月5日午前4時18分》，由古川大晃導演，小栗有以同船ヶ山哲主演，故事圍繞主角原遙喺「預言日」前後經歷嘅一連串怪事。
• 受日本地震恐慌影響，喺2025年5月到訪日本嘅香港旅客同舊年同期跌11.2%到19.31萬人次，係錄得跌幅嘅唯一地區。
• 香港ViuTV同HOY TV都喺2025年上半年推出用防災做題材嘅電視節目，分別係《逃出災難紀》同《求生記》。
• 香港ViuTV亦喺7月2號到4號晚同7月5號凌晨推出特備直播節目《有得吹好吹》，探討呢個預言同埋希望可以見證預言來臨一刻喺各地嘅情況。