筆架山

  提示：呢篇文講嘅唔係柏架山。

  想搵香港九龍塘住宅區嘅話，請睇筆架山 (九龍塘)。

筆架山
筆架山
海拔	458米（1,503英尺）
位置	香港九龍北
座標	22°20′59″N 114°10′12″E
筆架山 呢座山嘅地理位置

筆架山、煙墩山，英文叫做Beacon Hill，係香港一峯，高四百五十八米，九龍山脈之上，山脈亦即古籍講官富山。佢喺正新九龍同新界天然交界，山頂起咗雷達站。

香港本地旅行家，黃佩佳、吳灞陵，有份創立庸社，都叫個山做煙墩山。而香港山嶺志中，作者黃垤華話，棄本名煙墩山，以Beacon音取名筆架山，咁係妄作。筆架山個名，出於二十世紀五十年代，將Beacon Hill Road，音譯雅名筆架山道搞出出來，後尾街名影響到山名。而筆架山喺戰後一段時間，實指港島柏架山 ，完全無厘啦更。

二十世紀初，地圖都標有煙墩山當時本地音譯In Tan San，又有人反音譯燕壇山，好似日軍地圖咁。而筆架山音譯，到七十年代出咗倒轉音譯，Pat Ka Shan。煙墩山個名，至少一九八〇年報紙仍然用緊。地產商開咗畢架山一號，令人以為叫畢架山，更加混亂。

九廣鐵路喺山底，先開煙墩山隧道，貫通九龍沙田，鐵路電氣化後又開筆架山隧道。南山腰近大窩坪，同埋九龍塘歌和老街以北有同名住宅區。

地理

筆架山東面係獅子山，西面係尖山（鷹巢山）。筆架山同獅子山之間嘅山脊上面，重有兩個矮峰，近筆架山嗰邊有個鐵路拗（Railway Pass），近獅子山嗰邊就有九龍拗。

筆架山向北落山可以去到沙田地龍口落徑口，向南走就係大窩坪落石硤尾。

語源

雖則有人話筆架山似筆架而來，但無舊時文獻證明，無法證明呢個講法。喺戰前文獻並無筆架山呢個名。

煙墩山

香港詩人學者，兼香港公務員黃佩佳，佢寫香港新界百詠，一九三八年七月十五號嗰則，煙墩山一詠一文。佢提到個山又有土名泰火山，又有燕壇山，但佢認為In Tan San應該叫做煙墩山，英人取名Beacon Hill，同土名相近，而土人又講，以前山上舉烽火示警。佢另一睇法，個山形確似墩。佢從無提過筆架山。

一九〇一年，英國人標出個峯做Dragon Hill。一九〇四年標出Beacon Hill，又標明本地音In Tan San，煙墩山對譯。之後由於拼音方法唔同，In Tan San，又倒轉頭譯做燕壇山，例如日軍預備侵港地圖。

大明大清沿海，一直海賊猖獗。海防上，喺高處以燒草放煙發訊號，以警海賊動向。咁無論唐字煙墩定英文 Beacon，軍事上都係咁意思。

煙墩山至少一九八〇年都重用緊，六月四號工商日報咁寫，「煙墩山新火車隧道將啓用、舊隧道將修改爲有毒廢物貯存庫」。

筆架山

筆架山喺戰後，指港島柏架山。煙墩山仍然叫煙墩山。

二十世紀五十年代，就開闢歌和老街以北。新街名以英國地名命名，除咗筆架山道。一九五四年已大幅開地，當時開咗Beacon Hill Road，或許師爺連同其他街，將英國地名變得文雅，義德、義本、朗德、安域，Beacon Hill就譯做筆架，而忽畧本地名煙墩山。一九五八年報導，已見到佢叫筆架山道，喺九龍塘。

到七十年代就有變化。一九七〇年，圖上Beacon Hill多咗Pat Ka Shan個名，即筆架山。

二〇〇四年，屋苑畢架山一號落成，更加擾亂，有人誤以為有畢架山。

史

一九五二年十月十號雙十節之後，發現煙墩山寫咗五隻大字，擁護蔣總統。過成八十丁方尺，九龍塘深水埗睇得清楚，中環干諾道海旁都隱隱見到。

交通

由龍翔道有龍欣道上煙墩山頂，去到山頂雷達站。成座山脊都響獅子山郊野公園裏面，麥理浩徑第五段亦都幾近山頂。