Ipsative

喺教育同心理學中，ipsative（國際音標 /ˈɪpsətɪv/，近似粵音：ip1 se1 tik4）係問卷數據嘅一種，每位受測者答完後，量表分數總和都係一個固定值。呢種數據通常係因為份問卷用咗強制選擇量表：喺呢種問卷中，受測者唔可以話每一項都非常同意，一定要做取捨。呢種設計同傳統嘅李卡特量表（例如 1 至 5 分話自己幾同意某句說話）明顯有別；後者冇固定總分。

基礎概念

睇埋：性格測驗同李卡特量表

李卡特量表係心理測量學上常見嘅工具，用嚟評估受測者對某啲陳述嘅認同程度，幫助研究員量度性格特質等嘅變數。例如想測試一個人嘅外向度（五大性格特質之一）可以用以下噉嘅陳述：

「我鍾意參加社交聚會，識新朋友。」

受測者可以根據李卡特量表揀一個選項，例如 1 表示非常唔同意，2 表示唔同意，3 表示中立，4 表示同意而 5 表示非常同意。如果一個人選擇 4 或 5 可能反映佢比較外向；如果佢揀 1 或 2 可能反映佢傾向內向。呢種量表方便分析，仲可以用喺大量受試者身上。

強制選擇量表就好唔同。喺一個用強制選擇嘅區塊（block）入便，受測者會被要求根據每條題目有幾能夠描述自己（自己嘅行為或者睇法等）為 n 條題目排序。例如如果有三條題目（n = 3）係：

「我鍾意參加社交聚會，識新朋友。」 [e]

「我傾向保持低調，唔太表露情緒。」

「我享受安靜嘅環境，同自己相處。」

受測者要由最似我到最唔似我排 1 2 3。因為佢哋唔可以話每條都揀非常同意，所以呢種格式就可以阻止啲人（例如）求其填，冚唪唥都答非常同意。

強制選擇呢種題目，會產生自比 (暫譯)（ipsative，嚟自拉丁文：ipse，大致係佢自己噉解）型嘅分數：強制選擇題目出嘅分數，會被倒轉再加返落佢哋所屬嘅量表上形成總分數（每個量表對應一個性格特質）例如某受試者將外向嗰句嘢 e 排第三（佢覺得句嘢最唔描述到佢）佢喺外向度量表上攞 1 分，如是者佢答咗若干個區塊嘅問題後，佢就會得到一個外向度總分。

數學模型

内文：比較判斷法則

睇埋：舒士頓模型

強制選擇問卷通常由多個選擇區塊組成，每個區塊包含若干句陳述，受試者需要對呢啲陳述進行排序。例如一個區塊包含四句陳述（A B C D；或者叫四個 item），受試者需要將佢哋按最符合自己到最唔符合自己嘅程度排序。為咗分析呢啲排序數據，研究人員會將每個區塊內嘅陳述成對比較，將結果編碼為二元變量，喺四個陳述嘅例子中，會有六個成對比較：

A 對 B、A 對 C、A 對 D、B 對 C、B 對 D、C 對 D。

每個比較嘅結果會編為 1（表示受試者偏好第一句）或者 0（表示受試者偏好第二句）。呢種二元編碼方法可以將排序數據轉換為適合統計模型分析嘅格式。

自比型嘅數據可以用比較判斷法則嘅思維嚟諗。模型假設每個 item 都有一個潛在效益值，當中 t_i 係第 i 句嘢嘅效益，當受試者比較兩個 item i 同 k 嘅時候，如果 t_i > t_k 佢就會偏好 i ，即係話選擇 y 可以模擬成

$y={\begin{cases}1{\text{ if }}t_{i}\geq t_{k},\\0{\text{ if }}t_{k}>t_{i}.\end{cases}}$

噉嘅模型可以用 m × n 矩陣（m 係 item 數量而 n 係有幾多對要比較）形式表示，矩陣入面每個值表示其中一對 item 對之間嘅比較，得到嘅問卷分數仲可以用因素分析模型嚟計。

睇埋

• 心理測量
• 智商測試