陰曆

陰曆，太陰之曆，曆一種。陰曆睇月，按月相之盈虧，來判斷月嘅周期，此為朔望月。另有種陰曆，按月行白道上，月每日行，皆對唔同恆星，月返去到同一星位，或者睇同一赤經，此為恆星月。恆星月短過朔望月，兩者相差兩日。

朔望月而言，朔在日月相合，日同月同一赤經，睇唔到月。望，在日月相沖。日同月相反方向，會見月圓。朔之後初見月光叫朏。古時至初都以朏做月首，至為直觀。後尾計算技術高咗，計到日月同經，用朔來就更精準。月相除咗方便睇之外，日月方位，會影響潮漲潮退，月相光暗，會改變生物行為，生理週期，捕獵、捕魚，或者兵家等，都要睇埋朔望月。朔望月平均為二十九日半左右，大概輪流小月二十九日，大月三十日就可以。之不過，月繞地球軌道唔係正圓，所以有快有慢，真真要啱朔望，連續幾個大月都可能。

恆星月，要睇星象，逐日所到之星為月舍，睇月嘅星位，就得出邊一日。由於恆星月有介乎二十七日到二十八日，會有二十八宿或二十七宿。

華夏有兩者都有用到。朔望月為曆法基礎，以朔日為月首，而且日食月食，亦與朔望月相關，必須計算。恆星月，為上古之民紀日所用，衍生出二十八宿。之不過後尾已好少用來紀日，而且歲差之故，流傳二十八宿位置，同白道偏離好大，除非換一套先有用。大宋以來通書寫二十八宿，與天象無關，實為占卜之演禽術得來。

有陰曆自有陽曆，按日行斷定年季同埋日。華夏唔單止用陰曆，重有用陽曆，即二十四節氣，七十二候。

回曆保留上古遺風，用朔望月編曆，皆因回教先知話要睇朏之日，定為月首。十二個月為一年。故此回曆，同季節完全無關，完全用唔到農事之上。而十二個月係短陽曆十日左右，年數會快過陽曆好多。所以實務唔靠回曆，回曆只限於宗教同紀日之用。