STAR 原則

STAR 原則係面試嘅常用技巧，見工嗰陣成日會用到。呢個詞嚟自英文，大致係講緊人答面試問題嘅時候，要清楚講述喺過往經驗之中遇到咩情境、有咩任務要做、自己採取咗咩行動、以及係最後得出點樣嘅結果。呢種技巧就連管理學研究都有討論。

基本概念

睇埋：開放式問題同解難

STAR 原則乃係面試（以至第啲要講述自己經歷嘅場合，例如演講）常用嘅作答架構，英文全名為

Situation, Task, Action, Result

當中

• 第一隻詞意思係情境，即係要首先講述當時嘅境遇係點，時地人事，等聽者得知所處之景。
• 第二隻詞意思係任務，即係要講明自己當時肩負乜嘢責任，有咩目標要達到。
• 第三隻詞意思係行動，即係要講述返自己當時做咗乜，採用咗咩策略，彰顯自己嘅能力。好多專家主張，呢個部份要明顯長過其餘嗰三部份—有關具體長度為何，唔同專家見解各異，不過一般嚟講佢哋都認為行動呢橛，起碼要係情境或任務嘅兩至三倍咁長。
• 第四隻詞意思係結果，即係最後要說明行動引致嘅成效或者學習嘅所得，最好係具體、量化得到嘅。

四個詞語，攞佢哋喺英文嘅開頭字母 S-T-A-R（當中英文 star 係指星星或者明星噉解）就成為咗呢條原則嘅名。呢種作答法，被指係啱晒用嚟答開放式問題，用嚟清楚展現自己嘅才能，當中才能可以包括專業知識，亦可以係一啲軟技能，譬如時間管理、解難、人際相處等方面嘅能力。

事實係唔少面試官都會採用 STAR 原則，認為噉做能夠更全面噉了解面試者嘅性格同行為模式，無需直接觀察佢哋嘅工作表現。佢哋透過情境、任務、行動、結果嘅架構收集具體案例，藉此掌握面試者嘅工作風格、能力水平以及有咩地方需要加強。

實用例子

例子一：

• 情境：喺聖誕檔期，我哋鋪頭突然間客流爆滿，啲顧客投訴話等得耐，心情唔好。
• 任務：我係副店長，負責調配人手同處理顧客服務，要喺唔加班嘅情況之下令等候時間減半。
• 行動（重點）：我即刻召開臨時會議，請唔同部門協調流程，將收銀同包裝分開處理，仲即場寫低咗一個輪更表...
• 結果：三日之內，等候時間由 15 分鐘降至 7 分鐘，顧客滿意度上升 20%，公司亦用我哋鋪頭做範例俾其他分店學習。

例子二：

• 情境：我曾經喺一間初創公司負責經營佢哋嘅社交平台專頁。
• 任務：老闆要求我兩個月內令專頁嘅 fan 士人數增加 20%。
• 行動（重點）：我研究咗受眾數據，重新規劃貼文主題，增加互動貼文比例，同時用 A/B 測試揀出最有效嘅廣告文案...
• 結果：兩個月後 fan 士數量增加咗 22%，連帶網站銷售額升 15%，老闆話「終於見到成果」。

好似噉嘅 STAR 作答範例答案，互聯網上大把。

睇埋

• 見工
• 履歷
• 入學面試
• 英雄旅程

外拎

• （英文）STAR 面試問答，YouTube 短片，用英語講解點樣用 STAR 技巧。