Sandy Hook 槍擊案

二〇一二年十二月十四號，美國康涅狄格州紐敦嘅 Sandy Hook 小學 發生咗一宗大規模槍擊事件。兇手係二十歲嘅 Adam Lanza，佢開槍殺死咗二十六個人。死者包括二十名六歲至七歲嘅細路，同埋六名成年教職員。喺同一日較早時間，Lanza 喺駕車前往學校之前，已經喺佢哋位於紐敦嘅屋企槍殺咗佢阿媽。當第一批到場人員到達學校時，Lanza 用槍射頭自殺身亡。

呢宗事件係康涅狄格州歷史上最致命嘅大規模槍擊案，亦係美國歷史上發生喺小學入面最嚴重嘅槍擊事件。槍擊案之後，再次引發對美國槍械管制嘅廣泛討論，包括建議將即時刑事背景審查系統（National Instant Criminal Background Check System），全面適用，以及提出新嘅聯邦同州級槍械法例，禁止銷售同製造某啲類型嘅半自動槍械，同埋可擺得多過十粒子彈嘅彈匣。

康涅狄格州檢察長辦公室喺二〇一三年十一月發表嘅報告指出，Lanza 單獨行動，而且事前有計劃，但冇提供任何關於佢動機嘅說明，亦冇解釋點解會將學校定為目標。兒童保護專員辦公室喺二〇一四年十一月發表嘅另一份報告就表示，Lanza 有亞氏保加症（Asperger's syndrome），而且青少年時期曾經受到抑鬱症、焦慮症同強迫症影響，但結論指出，呢啲因素「既冇造成，亦冇導致佢嘅殺人行為」。報告亦指出，「佢嚴重而且不斷惡化嘅內化精神健康問題 [...]，加上對暴力嘅非典型執著 [...]，以及可以接觸到致命武器 [...]，最終形成咗一個造成大規模謀殺嘅致命組合」。