南丘

南丘名勝，七姊妹崖。

南丘，英國南部丘地一串，英格蘭東南部近海、唔算高，南嗰邊地質白堊岩，有啲部份，可謂英國名勝，好似七姊妹崖咁，露出懸崖、一片白色，好鬼壯觀。成個面積有成六百七十平方千米。

佢由拗比斯造山運動造出來，板塊推出東西向摺曲山脈，而中間山脊一直風化凹陷，南方變成南丘，北方變成北丘，平行咁走。呢個山脈本身去到法國，之不過遠古地理事故，斷開成英倫海峽，即南丘東端。

西起衡州郡葉淳谷，東至東修適士必慈角。南面崖下有啲平地，成為英國南岸。北面亦有斷崖，過崖就韋奧地方，喺南丘同北丘之間，好鬼開闊。

南丘國家公園，就唔止南丘，連帶大部份韋奧都包埋入去。年年有三千九百萬遊客，英國至多人去國家公園。

南丘地貌，白堊連綿起伏，草剪得好整，有乾谷，即無水山谷，譽為英格蘭至重要白堊地形景觀之一。亦係英格蘭南部四大白堊丘地之一，另外三個，有北丘，喺根德郡同舒梨郡，有釗頓丘，倫敦西北，有北韋息士丘，橫貫渭州郡、多實郡、衡州郡同柏莎郡。

南丘一帶，英格蘭東南之中，人口算少。之不過，沿海有大渡假城，尤其白禮頓賀夫，正蠶食白堊丘地。呢帶自古就有人住，某啲時期特別多，尤其羅馬不列顛時期，歷史遺跡同考古遺物都好豐富，例如防禦工事、古墳、同農地邊界等等。南丘環境敏感地區入面，就有三十七個具特殊科學價值地點，當中包括大片白堊草原。

南丘有古白堊草原，草地有薄薄一浸泥，好疏水，經過幾百年放牧綿羊，加埋野兔唔停啃食，形成一浸草皮，細密、短身、有彈性。呢種草地景觀，成為今日南丘陵標誌。到二十世紀中，農夫用咗新耕法，叫做羊麥耕法。長用維持住生態系統。村民會將綿羊，尤其至出名南丘綿羊，圈養喺小麥田入面，羊屎幫田施肥，之後再放羊上山。不過，一九四〇年開始，第二次世界大戰期間，英國政府要增加本地糧食生產，要開多啲耕地，一直到二十世紀五十年代先停。結果，草原差唔多變晒耕地，地貌變，生態系統變，少咗好多唔同生物。東部本來有四五成古白堊草原，剩落百分之三四。破壞生態同周圍住地擴張，至終促成設立南丘國家公園。公園二〇一一年四月一號全面運作，保護同復育南唐丘陵。

自然英格蘭劃南丘做國家地貌區第一百廿五號，同衡州郡丘、韋奧登綠砂、低韋奧同皮文士原等地貌區接壤。南接南衡州郡低地同南海岸平原。

佢休閒好去處，非常受歡迎，深受行山人士、騎士同山地單車手歡迎。有條遠足徑兼馬徑，叫南丘道，沿住白堊山脊走，由溫車士打一直伸到義本。沿途有大量山徑同馬徑相接，方便出入。

亞雲朵岩馬榮園莊園望出去，全景相拍攝，可以見到南兵嘅順坡面，風景遼闊。

名

英文South Downs。英國南面唔少山都叫down，意思丘，通常印象圓啲，生滿草咁。downs就一串丘咁解。隻字源自古英語 dūn，呢個字同英文dune同源，沙漠或者海邊啲沙丘。downs，去到十四世紀左右，開始有升高起伏草原咁意思。South指南便，皆因四十八公里北，過韋奧地區，又有串平行丘地，叫北丘。

地質

英格蘭東南地質圖，白惡岩淺綠表示。

東修適士郡地質橫切面。睇出原本摺曲山脈。

南丘成大片厚厚白堊層構成，呢啲白堊喺白堊紀沉積而成，大約一百萬到六千六百萬年前。當時英國大部分地區，浸喺淺海之下，接住整個西北歐洲。白堊岩出自浮游生物微細骨骼，因而白色。構成岩層，有大量化石，夾雜成帶燧石。白堊分成三層、下白堊層、中白堊層同上白堊層。當中，下同之間，有一層白堊層，薄薄哋、奶黃色、粒狀，叫做美邦岩，睇成兩層之間界線。

英格蘭東南部地層，包埋白堊層，曾經畀拗比斯造山運動輕微摺曲，拗起成穹狀構造，呈東西向，叫做韋奧亞叉華背斜，由英國伸到法國。個背斜呈圓頂形，長期有風化侵蝕，中間部分，經已侵蝕殆盡，剩返邊緣部分，化成平行南丘北丘。南丘北斷崖，北丘南斷崖。兩條斷崖對稱排列，好似原本穹頂攔腰切開咁，圖解上睇得出。南北斷崖之間，背斜中間地區，因應唔同岩層耐蝕程度，侵蝕唔均等，形成多層地貌，逐圈向內呈現出由山地與低谷交錯結構。有綠砂脊，至明顯位於韋奧北部，有英格蘭東南最高山，列符山。有低韋奧，黏土谷地，由韋奧黏土構成，抗蝕力較低，地勢低而平。高韋奧，砂岩高地，砂岩組成，耐蝕力較強，喺背斜中央，有亞殊丹森林。

白堊岩多窿疏水，水滲入地底，南丘北邊邊緣，冬季多雨時，成為冬季間歇河。

地理

南丘白堊斷崖，綿綿長長，長一百一十公里。西面衡州郡，溫車士打附近，有葉淳河谷。南丘由呢度開始，一直東伸，伸到東修適士郡義本，喺必慈角入英倫海峽。北面斷崖坡，好斜。崖後順層坡，白堊高地，緩緩咁斜，斜向南，起起伏伏咁，南延至 闊十一公里。較遠北方高處南望，例如高韋奧或者北丘高處，南丘條北斷崖，會好似高牆，擋住地平線，而山頂草地，叢叢樹林點綴，例如出名燦頓伯利環。

西面，南丘白堊山脊匯合北丘，化成衡州郡丘。東面，斷崖喺施福同義本之間到盡頭，直插英倫海峽，形成白色海岸斷崖，好鬼壯觀。名勝有施福角，有七姊妹崖，一列乾鈶斷面而成，同必慈角，英至高白堊海崖，高一百六十二米。

南丘分部，包括東衡州郡丘、西邊丘同東邊丘，再加上一眾河谷穿插其中，同埋佢哋下面低地斷崖腳。西邊丘同東丘陵，合稱修適士丘。西邊丘，喺亞雲河西，就好多樹，尤其斷崖面一帶。相比之下，東邊丘就冇乜樹，光禿禿。呢段東邊丘，反而更經典南丘，皆因十九世紀末之前，一般講南丘，就指呢段，尤其文學同美術，無論作家定美術家，都述寫呢一帶。作家吉百齡就咁形容，頭堀堀，好似弓，眾丘似鯨背。艾力路菲梨兀士都有佢水彩畫。

南丘有四河谷，鑿穿山地，有亞雲河，雅打亞河、烏士河同曲咩亞河，高低映襯。居民用水，來自白堊含水層，其次冬季間歇溪流。丘地有一眾露水塘，人工開鑿，有代表特色，專畀牲畜飲用。

南丘至高處畢莎山，高峯海拔二百七十一米。丘唔規規則，頂似高原，喺衡州郡彼德士菲腰南，史前時時都有人活動，地方劃咗做國家自然保護區。

南丘陵國家公園，包括埋南丘以北西韋奧。西韋奧至高處黑丘，西修適士境內，海拔二百八十米。不過佢唔喺南丘，而喺綠沙脊，西韋邊緣。

隨後有山表，西向東排，齋列高過七百呎，大約二百一十米以上。

山	就近聚居地	公制高度	英制高度	註
畢莎山	彼德士菲	二百七十米	八百八十八呎	南丘至高處。
西哈廷丘	南哈廷	二百二十九米	七百五十一呎
煙墪山	南哈廷	二百卌二米	七百九十三呎
連柱丘	別頓	二百卌八米	八百一十四呎
列徒頓丘	東拉揈頓	二百二十五米	八百卅六呎	修適士丘至高處，踢格利斯冠。
格拉廷煙墪	瑟頓	二百卌五米	八百零三呎
燦頓伯利山	華盛頓	二百卅八米	七百八十二呎	燦頓伯利環山寨遺址
錯利山	上必定	二百一十六米	七百零八呎
秩處梨煙墪	秩處梨	二百卌八米	八百一十四呎
法奧煙墪	法奧	二百一十七米	七百一十三呎

史

薛士伯里寨平面圖，顯示垂直坑

考古證據顯示，南丘幾千年前，經已有人利用有人住。新石器時代，有燧石礦場，好似薛士伯里咁。有遠古墳塚，好似魔鬼跳臺同魔鬼駝峯咁。重有山寨，好似燦頓伯利環。呢啲地貌上非常突出。

估計南丘陵三千幾年前，經已斬晒森林。現下見到貼地草皮，長年放牧綿羊得出來。

國家公園

二十世紀四十年代，就想要將南丘設為國家公園。不過要去到一九九九年個構思先得政府正式支持。二〇〇二年到二〇〇九年間，經公眾諮詢，政府最終喺二〇〇九年三月卅一號，宣布成立南丘陵國家公園。二〇一一年四月一號正式運作。公園範圍，唔單止正宗南丘，連西韋奧地區都收入去。呢區地質同生態，都同南丘截然不同。

南丘國家公園取代原本兩個傑出自然美景區，即東衡州郡傑出自然美景區，同埋修適士丘傑出自然美景區。公眾諮詢過程中，討論過劃界，至終令兩者範圍唔同，有啲自然美景區原本包，現下國家公園唔包。反之亦然。

國家自然保護區

南丘有好幾個國家自然保護區。

修適士丘內國家自然保護區，有好幾處。一有傾利谷，近芝車士打，自然英格蘭講呢度有歐洲頂好紫杉林，園中林中古樹，實屬英國至長壽、至古老生物。此外，佢又有法定古蹟十四個，喺南英格蘭考古遺址，非常重要。二有衞城山，白禮頓同路依時間，草原來，打理古老而傳統，同類中俵俵者。三有路依時丘，又叫奇賓山，白堊丘地，以傳織打理，同時屬考古遺址。拉寧頓荒地，喺義本西北，拂列斯頓林北邊。白堊荒地之中，縱橫喺英國數一數二。

東衡州郡丘亦有好幾處。一有畢莎山，近彼德士菲，南丘至高處，有一大片白堊草地。當中一大範圍，劃做法定古蹟，反映出佢歷史價值，特別青銅時代同鐵器時代。舊溫車士打山，低地草原，喺明谷斷崖中西坡南坡。煙墪山，舊溫車士打山以西五公里，高質白堊草原。

旅遊、休閒同體育

一九二三年，修適士丘人協會成立，目標係保護當地獨特嘅自然景觀。會後來改名南丘協會。

人遊山玩水，好中意行南丘，一眾行山路徑，長三千二百公里，管理完善，指示清晰，容易出入。當中至長主要馬徑，叫南丘徑。而由窩士打出發君王徑，亦會橫過南丘，到達濱海紹咸。

南丘唔少運動玩，好似滑翔傘、山地單車、騎馬同遠足行山。逢秋天，東邊丘義本搞越野馬拉松，叫必慈角馬拉松，舊名七姊妹馬拉松。賽事地勢起起伏伏，走個圈又返去義本。另外，南丘徑馬拉松，亞雲朵附近士令頓村起步，走到彼得士菲南面伊利莎伯女王郊野公園。

再長啲都有，南丘徑有超級馬拉松，走一百哩，由必慈角走到伊利沙伯女皇郊野公園。又有七十五哩夜間山地單車賽。

勝景

窩明頓長人。刻喺東修適士南丘斜坡上。

南丘上三處名勝，用大圖案刻喺白堊坡上，一望就見。一個窩明頓長人，一個列靈頓白馬，以及奇離頓風車。重有座戰爭紀念碑漆地里，紀念第一次世界大戰西線戰場受傷後，送到白禮頓一帶醫治，至終傷重不治死去印度士兵而建。

列靈頓白馬近列靈頓村

文學南丘

作家吉百齡喺故居卑文氏形容南丘陵，我哋個丘，堀頭弓頭鯨背。詩人希萊亞卑洛，一九二〇年寫首詩，叫南國，形容南丘做南國偉山。而詩人拗者農查奧斯士溫本作品南岸入面，形容南丘，丘翠綠、平滑、起伏無盡。

博物學家兼作家威廉亨利赫臣寫過，必慈角到哈廷，全長五十三英里，沿途地勢，唔高過八百五十呎，但我哋感覺到世界之巔。

詩人凡舍時威廉波地容寫詩南丘上。南丘有唔少作家住過。珍柯士田，住過衡州郡南丘邊緣坐頓村。南丘樂磨有間文氏屋，作家伍爾芙喺烏斯谷住處，般隆士伯里派成員經常拜訪。亞發，田尼臣勳爵，迫力丹入便柯獲夫有佢第二個屋企。雖則呢度實情南丘以北韋奧地區，不過今日喺南丘國家公園之內。

柯南道爾短篇故事集有最後一躬。序言入面，華生醫生講到福爾摩斯已經退休，搬去義本附近細農場，南丘附近。故事福爾摩斯仲講過，南丘住兼養蜂。另外，短篇故事獅鬃講述，福爾摩斯喺南丘居住期間，破咗一單案。

作家格拉咸格連首本出版小說，一九二九年本內在之人，大部分故事都喺南丘附近展開。書入面主角安德魯斯徒步穿越南丘，去路依時出席巡迴法庭。佢對風景同感受，都有好詳盡描述。

作者衞士一八九八年出版本書叫隱形人，入面寫咗句，佢逃到南丘。

圖庫

• 
  南丘東望向修適士魔鬼堤
• 
  七姊妹崖。英倫海峽海岸伯靈峽白堊崖
• 
  必莎山，南丘至高處，二百七十米。必莎山山國家自然保護區 ，彼得士菲西南， 有二百四十公頃，具特殊科學價值地點 同特別保護區
• 
  西修適士潔法士山標高柱，二百一十三米。喺南丘徑，士多靈頓對上。
• 
  飛霍山顯示典型南丘地形。圖左樹林北斜坡。以及南緩坡，牧場同林地。
• 
  東修適士路依時風景

讀

• Hudson, W. H. (1901), Nature in Downland, London: Longmans and Green.
• Brandon, Peter (1998), The South Downs, Chichester, UK: Phillimore, ISBN 1-86077-069-X