《新秀歌唱大賽》（英文：New Talent Singing Awards）係香港舊時一個大型歌唱比賽，狹義上專指1982年到1996年由香港無綫電視製作同由華星唱片主辦嘅15屆比賽，廣義上亦包括無綫電視之後用「新秀」個名繼續搞嘅比賽，包括《中文歌曲新秀歌唱大賽》（1997年到1998年）、《全球華人新秀歌唱大賽》（1999年到2003年）、作為香港區選拔賽嘅《英皇新秀歌唱大賽》（2004年到2008年）、《TVB8全球華人新秀歌唱大賽》（2005年到2009年）同《TVB全球華人新秀歌唱大賽》（2010年到2016年），到做完2016年嗰屆後正式停辦。
