Talk:四聲

出自維基百科,自由嘅百科全書
Jump to navigation Jump to search

平仄講解[編輯]

係唐人都知,寫詩詞,聲調講究平仄,平聲爲平,上去入爲仄。點解呢?有好多人從美學、文化、甚至玄學嘅角度解釋點解寫詩要講平仄,噉係唔得㗎,一定要從古音入手,先解釋得通呢個問題。大家睇我喺文中標嘅中古音拼音,平聲無標嘢,上聲係x尾,去聲係h尾,入聲p尾,呢個尾就係平仄嘅區別。當然,另外入聲又有t、k尾,去聲有d尾(次入聲)。根據古音研究,最初嘅中文係無聲調㗎,聲調係因爲條尾甩咗,產生嘅補償性語音,平仄嘅區別在於有冇尾,有條尾,你個音就有個煞掣,無得有幾長拖幾長,呢個有冇拖腔就構成咗平仄嘅對立,所以喺朗誦上就有平仄嘅講究。

喺後來,因爲上聲同去聲嘅尾徹底甩咗,只有入聲仲維持住個尾,所以喺後期寫詩詞,上、去通押,而入聲另計,呢個正係中文韻學嘅傳統,就係個音有個煞掣。

BTW,我大學嘅學位論文寫嘅就係廣州話聲調喺詩詞律中嘅樂性研究,嗰陣時睇過啲書,所以對聲調有啲瞭解,不過可能我篇論文有啲諗法係唔多妥嘅,就唔攞出來見笑嘞。--S7w4j9 (傾偈) 2017年8月19號 (六) 10:12 (UTC)

平分陰陽[編輯]

同朋友討論下,平分陰陽似乎仲有個原因,係因爲平聲字太多,所以最容易分陰陽。諗下,若果平聲唔分陰陽,同音字將會係災難性嘅。--S7w4j9 (傾偈) 2017年8月26號 (六) 14:05 (UTC)

擴充提議:中文之外[編輯]

好開心,見到有人來改呢篇文章,爲現代四聲加咗越南文,講明篇文章有人關心嘅。不過呢,呢個改動勾起我一啲諗法。

現代音嗰節,專門討論現代漢語族各門語言嘅四聲分合,所以內容應該僅限喺漢語言,而越南文喺譜系上係南亞語,但因爲佢漢化深,所以聲調可以同中文對應。

我學緊泰文同壯話,我明確話畀你哋聽,壯侗語嘅聲調同中文四聲係對應關係,可惜啊,壯話係少數民族語言,冇人去學,泰文作爲外文多人學,但冇人通解佢同中文嘅對應關係。唔止壯侗語,亞洲複雜聲調嘅語言,佢哋嘅聲調都同中文四聲個個對應。包括苗瑤語、藏緬語,佢哋嘅聲調都係四聲形式。所以我哋可以開一個專門嘅章節,討論中文以外嘅複雜聲調語言,佢哋聲調同四聲嘅對應關係。

不過我來主筆呢個章節,只能夠寫越南文、壯話、泰文三種語言,越南文我可以講多啲,傾下具體嘅字音分派,而壯侗語我仲打緊基礎,我唔係咁夠膽保證壯侗語言當中古漢語借詞嘅演變規律,所以我只會同你哋介紹佢哋嘅聲調系統,具體嘅字詞分派我就唔介紹。好可惜,我唔識講藏緬語、苗瑤語,所以呢兩個章節嘅內容要等專家來寫。不過,我而家學緊基礎梵文,等我學完梵文,我想轉去西藏、緬甸呢啲印度文明潤澤之地去攻城掠地,如果嗰陣時仲冇人寫藏緬語,噉就由我來主筆藏文、緬甸文聲調嘅內容喇。

冇回應,一禮拜後我着手開呢個章節。(其實寫呢大段話,係希望吸引有呢方面知識嘅同好投身入呢個章節嘅寫作,呼朋引伴而已)--S7w4j9 (傾偈) 2018年4月7號 (六) 12:58 (UTC)

啊,仲可以加個古韓文,古典韓文有聲調,喺古韓字中就有聲調符號,佢哋亦係按平上去入來劃分。所以大概可以分出五個章節來講。--S7w4j9 (傾偈) 2018年4月7號 (六) 13:04 (UTC)