Talk:孫權

甄字讀音：一啲討論成果

現時粵語嘅「甄」讀成 jan1 其實係好古怪嘅，因爲照計應該係讀 zan1（普通話讀zhēn，越南文讀chân，都係讀爲真；韓文讀견，係讀爲堅；日文讀しん係讀真，讀けん係讀堅）。一年前我搦去問人，但問唔出結果，今日攞入語言學羣組度討論，最後我哋得出結論係讀錯字。大概就係古人眼花，將甄字當咗湮字之類，又或者係望住聲符讀半邊，讀成噉嘅樣。大概係因爲甄氏嘅分佈偏北，郡望喺中山無極（如今石家莊一帶），粵地甄姓少，作爲詞，諸如甄別，用嘅頻次唔高，對於粵地就係隻生僻字，於是唔流通嘅字就讀半邊，原本該讀真，而訛成同因同音。

關於眼花認錯字，古人比較常見。比如佛教嘅護法韋陀，來源自印度教嘅室建陀（skanda；濕婆同雪山女神嘅大仔），簡稱建陀，但抄經時寫錯字，寫成韋陀，然後喺漢傳佛教就將錯就錯。粵語裏頭嘅讀錯音然後流傳嘅例子亦有，比如「瓣」字本該讀 baan6，但讀成 faan5；「埠」本該讀 bou6，但讀成 fau6，呢啲字喺古音唔係三等字，所以佢哋唔係輕脣字。其中「埠」係讀咗「阜」呢個半邊音，呢個現象亦出現喺外地，比如天津地名宜興埠，埠當地讀fu；又比如江蘇阜寧，本來係埠寧。一個更典型嘅例子係「芡實」（him3 sat6）因爲眼花而讀成「茨實」（ci4 sat6），前者其實係「打芡」（daa2 him3）嘅字。但日積月久，「茨實」已經內化成粵語特別詞彙，我就同群中朋友笑稱係「DNA複製出錯導致基因突變」。

導致噉樣嘅情況，我估同廣東嘅歷史進程有關。唔似得南便嘅越南及早分家稱帝、大興科舉，廣東人唔多好做官，鍾意做生意，自然亦唔多歡喜讀書，而嶺南又係天高皇帝遠嘅地方，身爲漢語同其他漢話唔易互通有無，因而語言喺民間之中容易產生「字音突變」。而廣東文教確實同北方比，唔係發達嗰隻。以下段話唔好聽，但係事實：南漢自詡中原正統，來求婚聯姻嘅大長和國，雖然係白子而非漢人，本來畀人認爲係雲貴高原上嘅蠻夷，只係長期崇拜漢文化，但兩國一鬥詩文，使者水平仲叻過南漢君臣，一時令朝廷尷尬無比，唯有應承嫁公主過去；直到今日，廣東依然如同南漢時噉，經濟一流，而教育短板（雖則經已進步過嗰時多多聲）。當然啦，今時廣東文教唔及北方，有好多原因，比如定中南大區時將資源傾斜晒畀武漢，係其中一個當代體制因素。

另外一樣嘢：「甄」字本音係 gin1。都知《紅樓夢》中嘅「甄士隱，賈雨村」係官話隱射嘅「真事隱，假語存」，而我哋廣東人讀「jan1 si6 jan2, gaa2 jyu5 cyun1」，就覺得「甄」字令人尷尬，但就不妨讀成「gin1 si6 jan2, gaa2 jyu5 cyun1」，所謂「堅定流」「堅嘢」，係「堅嘢收埋，假話留低」。惗到「甄」本身有「審查、鑑定」嘅意思，話唔埋係甄字讀堅音喺口語中嘅意外遺傳，畢竟「件事係咪真㗎」等同於「件事係咪堅㗎」，可能因此當初甄字避諱改音就噉樣改「堅」音爲「真」音。當然，只係我哋假設啫，唔敢包係。--S7w4j9 (傾偈) 2019年10月20號 (日) 11:21 (UTC)

對外連結有變 (2019年12月)

各位編輯仝人：

我啱啱救返孫權上面嘅 1 個對外連結。麻煩檢查下我改嘅嘢。有咩查詢，或者想隻機械人唔理啲外連，或者想隻機械人成版唔好掂，請睇呢版簡明嘅問答頁。我改咗呢啲外連：

• 加咗存檔 https://web.archive.org/web/20110502041943/http://www.saohua.com/shuku/xishuosanguo/ldf33.htm 落 http://www.saohua.com/shuku/xishuosanguo/ldf33.htm

如果隻機械人有錯，請睇問答頁嘅指示。

唔該晒！—InternetArchiveBot (報告軟件缺陷) 2019年12月17號 (二) 03:33 (UTC)