Talk:政令指定都市

指定市同副省級市

@Wiki852tc：睇來閣下對呢篇文章幾有興趣。見到閣下改咗副省級市部分，我想問下，何以見得副省級市就同指定市唔同呢？同樣都係隔一層政區，同樣喺隸屬上有所隸屬（呢點同臺灣院轄市非常之唔同，根本無法同指定市比較），同樣有好大嘅自治權（副省級市好多權限接近於係省，離直轄市唔遠），我就唔明白點解閣下要改話佢哋唔似？我就認爲佢哋非常之可以互相比較（相反舉臺灣做例根本做唔到例，臺灣根本無呢樣嘢，直轄、縣轄之類，就係無呢種介乎直轄同縣轄之間嘅市，攞臺灣做例，有夾硬並列陸臺嫌疑）。能否舉出具體嘅例子，講明日本指定市同中國副省級市嘅不同之處呢？望賜教。--S7w4j9 (傾偈) 2017年3月21號 (二) 15:08 (UTC)

@S7w4j9： 我比較埋臺灣因為臺灣亦都係一個主要用中文嘅地方，亦都順便帶出直轄,縣市層級同埋自治權嘅例子(中國副省級,臺灣直轄市)。 另外，請問副省級市有咩權限接近於係省?--Wiki852tc (傾偈) 2017年3月23號 (四) 12:44 (UTC)

@Wiki852tc：你可以去搵中維文章來睇，簡單啲講，就係官員配置好高，所謂副省級，意思就係同省差唔多（連區轄街道都係正處級，諗下），佢嘅前身係計劃單列市，經濟、社會管理權限去到省嗰級。BTW，講得服嘅我話我會畀佢過，我唔係幾服嘅話，最後回應一個禮拜後我會將副省級嗰段比較文段恢復過來，但同臺灣政區嘅比較我會保留。（諗咗下，同臺灣比較應該都係可行嘅。）--S7w4j9 (傾偈) 2017年3月21號 (二) 16:28 (UTC)

@S7w4j9：

唔係官員配置好高,去到省嗰級就代表一様,呢篇文唔係只係比層級大小。重有權力下放,事務嘅範圍,同其他層級嘅互動,官員嘅組成,財政嘅獨立性等等。呢啲正正係政令指定都市嘅特別地方。依家嘅版本:"指定市同中國嘅副省級市一樣同政府之間隔咗一層政區層級",正指出兩者相同嘅地方,如果直接話佢同副省級咁,會令人先入為主,誤以為兩者十分相似。--Wiki852tc (傾偈) 2017年3月23號 (四) 12:44 (UTC)

@Wiki852tc：配置高，就係意味住權限大，所謂官大一級壓死人，層級高咗，決策權就係大咗。攞我哋廣州做例，廣州係副省級市，隔籬嘅佛山而家講同廣州同城化，但佢係普通嘅地級市，呢個身份差距可以講係同城化障礙之一，因爲各自嘅權限唔同，廣州總體上嘅政策比佛山自由，就係因爲權限下放多，事務範圍大，官員高配，財政獨立，你所講嘅指定市嘅特別之處喺廣州同佛山嘅比較都可以見到。應該講，某種意義上，副省級市仲自由過直轄市，因爲直轄市直接受國務院節制，中央話你咩就咩，冇得誒（e1），而廣州有廣東省罩住，唔使受中央咁大控制同衝擊。容我指出一點：指定市同副省級市，確實十分相似。我諗，避免讀者誤會最好嘅方式係寫齊全篇文，有咩講咩，講清楚，自然會令人認識到兩者嘅相同同唔同，閣下拓充篇文咁多，做緊嘅正係噉嘅事。另外，我哋呢度規矩係寫討論要簽名，麻煩閣下自己上述兩段話自己補番個簽名（兩橫四條蛇仔）--S7w4j9 (傾偈) 2017年3月22號 (三) 11:35 (UTC)

@S7w4j9：其實我覺得依家SC96改咗嘅版本更好。呢篇文講緊嘅係日本嘅政令指定都市，如果真係要噤詳細比較佢同其他地方嘅層級，應該考慮另開分頁/分段。--Wiki852tc (傾偈) 2017年3月23號 (四) 12:44 (UTC)

@Wiki852tc：得嘅，或者大體上保留而家呢個樣，但我始終有意見嘅一段係「但係指定市擁有好多地方自治權力」，呢句話畀人印象就好似講副省級市就冇好大嘅地方自治權力噉，應該改成「一樣有好大嘅地方自治權力」。如果贊成，一個禮拜後我就呢句改成噉樣。--S7w4j9 (傾偈) 2017年3月23號 (四) 13:09 (UTC)

@S7w4j9：睇咗中文維基嘅副省級市分頁，但係成篇文主要都係講層級官階，冇詳細講其他野喎。--Wiki852tc (傾偈) 2017年3月23號 (四) 13:28 (UTC)

@Wiki852tc：佢講得唔夠多嗟。官階高，其實就係意味住權限大，對內地政情瞭解就知咩回事。--S7w4j9 (傾偈) 2017年3月23號 (四) 14:26 (UTC)

@S7w4j9：你又叫人睇中文維基，嗰篇文講官階，你又不停噉講官階，呢喥唔係淨係比中國人睇架。你都話"某種意義上，副省級市仲自由過直轄市"，可見城市層級唔係一切。依家嘅版本正正就講緊相同嘅地方就係層級。--Wiki852tc (傾偈) 2017年3月23號 (四) 15:00 (UTC)

@Wiki852tc：關於中國人嘅事，噉係因爲我本身就係中國人啊，諗嘢嘅出發點自然都係從中國人嘅出發點諗嘢。所以需要其他地方嘅人參與補充。所以你話要補充臺灣嘅嘢，我雖則認爲佢哋可比性冇咁強，但我唔諗住刪走。

層級當然唔係一切，但佢好緊要，因爲佢決定埋權限，我就要求一點：講清楚副省級市亦有好大嘅自治權力。--S7w4j9 (傾偈) 2017年3月24號 (五) 09:53 (UTC)

@S7w4j9：但問題係，中文維基同埋你都冇講到副省級市有乜野特別嘅自治權力，唯一確定嘅相同只係同政府之間隔咗一層，噉正係依家SC96嘅版本。如果你話中國人嘅出發點諗嘢就係講官階，噉更加唔應該寫"副省級市亦有好大嘅自治權力"，因為咁唔客觀，無法比較。個人感覺；下級官員唔出聲同真正嘅條文係兩樣野嚟。--Wiki852tc (傾偈) 2017年3月24號 (五) 12:23 (UTC)

@Wiki852tc：算嘞，唔想同你嘈落去，望你個樣應該係香港人，唔明內地咁多嘢，亦都聽唔明點解我講副省級市有好大自治權，既然係噉，斬腳趾避沙蟲，將「但係指定市擁有好多地方自治權力」成句抹走算嘞，無謂嘈落去。--S7w4j9 (傾偈) 2017年3月25號 (六) 08:45 (UTC)