User:Al12si

‮現實世界中好多嘢其實唔講得，喺維基都係‬

‮ 我係港裔加拿大人，喺安省美術設計大學畢業｡

---

對引文嘅意見

我明點解有人想乜都有出處，因為真係會記錯嘢，亦都真係有人想搞破壞，但係其實呢個要求好唔合理，而粵文維基嘅人應該好明白｡

撇開粵文維基人可能遇到嘅特有問題，單單係睇專業知識，就算係喺英語世界，好多專業知識都係口傳，你係搵匀全世界都唔會搵到出處 ⦃或者搵到嘅嘢都係行外人廢噏⦄，但係你做某行業，或者讀過某科，你就會覺得嗰啲嘢根本係常識，要寫出處根本係發神經｡

⦃最慘就係學者廢噏然後人人信以為真⸺呢種學者亂噏廿四害死人嘅情況喺無障礙同平面設計嘅交界處非常嚴重，好多而今gaa1寫咗入無障礙標準嘅嘢其實都係亂寫廿四完全冇根據但係除非你讀或者做過美術設計你會以為好科學｡⦘

呢種情形，我以前有寫英文維基嘅時候經常遇到｡ 最荒謬嘅係我甚至唔使講乜嘢陶瓷製作，就算係文字編輯、平面設計或者排版呢啲好似網上好多資料嘅行業，其實好多知識都係靠口傳，而網上點先叫口傳？好多資料都係喺私人羣組、要入密碼甚至係要喺個專業協會真係做付費會員先會見過｡

例如我啱啱寫咗少少嘢講加新社格式，但係冇出處｡ 我有搵，但係堅係冇；但係你喺加拿大做文字編輯，特別係做過報館或者大學網站，都知加新社格式係乜｡

又例如喺英文維基，SDGQ ⦃魁省平面設計師會社⦄ 嘅文曾經被人剷走，話個會唔重要云云wo5，出處都係淨係得個會嘅網站云云；但係如果你係一個明白加國政情嘅加拿大平面設計師 ⦃唔係任何一個阿水加拿大人⦄，即使唔係魁省省民，都應該知道 SDGQ 非常重要｡ 點解？因為其餘兩個會⸺安省嘅 RGD ⦃安省註冊平面設計師協會⦄ 同所謂全國嘅 GDC ⦃加拿大平面設計師協會⦄⸺都係淨係講英文 ⦃有法文名，但係從來唔用法文⦄，淨係得 SDGQ 講法文｡ 任何加拿大人都知，無理剔除一個全國唯一嘅法文組織都會係好有問題嘅做法，但係偏偏英文維基就做咗咁嘅嘢｡

如果 SDGQ 咁唔重要，RGD 將佢個註冊平面設計師資格分畀第個會，就唔會係分畀 SDGQ 然後先輪到 GDC｡

魁省如果要獨立，英文維基絕對要負責｡

利申：我唔係魁省省民｡

---

PS：EAC ⦃加拿大編輯協會⦄ 當年改咗個法文名，就覺得有責任服務法文編輯 ⦃官方紀錄，我當然當年唔會在場⦄，到而今都仲有法文網站 ⦃係真網站，唔係一兩頁就算數嗰隻⦄、法文 web­inar、法文 con­fer­ence ses­sion、其至法文 con­fer­ence 等等｡ 可能因為咁，佢可以到而今都仲係真嘅全國性組織，魁省可以唔使有自己一個獨立嘅編輯協會，唔係好似 GDC 咁結果係一拆為二 ⦃RGD 係由 GDC 度拆出來⦄｡