解謎遊戲係遊戲嘅一個大類，重點特徵係會要求玩嘅人用腦慢慢思考。諸如七巧板、數獨同扭計骰等都屬於解謎遊戲，而自從二十世紀開始，遊戲界興起咗解謎電子遊戲－即係以電子遊戲形式存在嘅解謎遊戲，好似係源自一九八〇年代嘅俄羅斯方塊就好經典。解謎遊戲考玩家嘅智力，要求佢哋用數學、邏輯、空間以至語文等方面嘅知識嚟解開謎題。
