Wikipedia:起緊屋就唔好拆屋

呢版係篇論文；唔同政策同指引，佢只反映一啲編者嘅意見。若有需要，請更新佢，又或者響討論版度傾。

未發展好嘅文章，就好似呢間仲起緊嘅屋一樣。幫手啦，唔好直接拆！

有時編輯只係整咗個基本框架，打算之後再補充，或者等其他人嚟加落去。

有個人想起間屋，於是就叫咗幾個鄰居幫手；大家都好努力、好有條理，就好似起屋嘅人應該咁樣做咁。

冇耐，一個建築督察嚟咗，一睇就話：「呢條樓梯，睇落唔係好對路喎！」於是就攞卷尺出嚟度，一度就話：「嗱！度到真係唔夠闊！」

起屋嘅人答：「未整好啫。」

督察繼續睇，就若無其事咁講：「呢埲bung6牆唔夠支持力。」

起屋嘅人答：「當然未啦，都未整好。」

督察又話：「睇！連屋頂都冇！屋主落雨一定會嬲！」

起屋嘅人駁佢：「唔會呀！間屋整好咗就有屋頂㗎啦！」

督察唔理佢，就話：「喂你呢班起屋嘅，呢間屋，唔得唔得！一定要拆咗佢！」第二日，督察就派人嚟拆屋。

就好似呢個荒唐嘅故仔入便嘅情節咁，作為維基友，我哋要放眼將來，睇到嗰間將來先至起好嘅屋。雖然維基百科有潛力成為「人類知識嘅總和」，但係基本上都係一個進行中嘅工程；佢唔係一次過寫完晒，然後出版一次就算，而係逐步演變、慢慢成長。每篇文章，雖然可能寫得慢，但係都係寫緊；正如西方格言有話，｢羅馬唔係一日就起好｣，文章亦唔可能第一個版本就完美。

寫文就好似起屋咁，都係需要時間嘅。想像下，如果起屋嗰陣成日俾人拆屋，會點？

任何文章，開始嗰陣​——​即係仲係寫緊、仲係搵緊料、仲係驗證緊資料嗰陣​——​篇文一定又唔長，又冇咩來源，又唔多資訊，所以先叫佢做 ｢楔位文｣（stub）；但係話明係楔位，就即係諗住會加料㗎啦。起步文章之所以短，就係因為仲未擴充。

有時你會見到一篇文章，或者文章嘅一部分，好似冇咩內容，又或者得啲要鏟走嘅廢料；但係好多時，只係因為文章仲係 ｢工程進行中｣。與其即刻拎去刪文討論（AfD）叫人鏟咗佢，不如試下落手擴充下佢？與其直接打回頭，不如試下就咁掛個清理／重寫模？

如果篇文講嘅嘢你根本係識嘅，更加唔好即刻刪文；不如去幫篇文搵出處、搵資料？

如果真係唔識，可以搵啲識嘅人囉。

或者你真係唔識，但係又唔驚做研究，咁咪自己做研究囉！做得多研究，遲早變成嗰個領域嘅專家，搵資料就會容易好多。

建立知識就好似起屋咁，係需要時間嘅。唔好好似故仔入便嗰個督察咁，成日拆嚟拆去，仲未有得睇就鬧。唔可以期望每篇文章一開始就完整。如果真係咁，維基百科早就失敗。記住維基嘅精神係 ｢分享知識｣。

提醒一句

如果樓梯已經整好，但係真係唔夠闊，行上行落唔安全，就可能真係要拆；又或者如果屋頂用咗草，但係法例規定要用石板，屋頂亦真係要拆。你要起屋，就起啦！但係唔好起間唔住得人、全年漏水、樓梯會冧嘅屋。喺你起一百間屋之前，唔該首先學識點樣先至叫做起一間起得好嘅屋。雖然學好係要時間，但係學識咗，就唔怕扭親腳，唔怕䂿濕頭。手藝差只係比完全冇手藝好丁咁多；喺維基百科寫文，並唔係要喺寫爛文比賽鬥贏邊個寫最多篇爛文。

如果間屋已經起好，但係真係唔住得人，就唔好嬲市政府話要拆。就正如標準同法例會隨住時間而改善，對文章嘅要求亦會隨住時間而變；你以前喺維基起嘅屋，以前可能覺得好靚，但係按而家嘅標準可能會算係唔住得人，呢啲文章可能會被人掛維護模、或者合併入另一篇更合適嘅文章，甚至被人提名刪除；避免呢啲收場嘅最好方法，就係學識點樣起好屋！維基最唔需要嘅就係又一間一落雨就冧嘅爛屋。